ലഖിംപൂര്‍ ഖേരി കൂട്ടക്കൊലക്കേസ്; യു.പി സര്‍ക്കാരിനെ വിമര്‍ശിച്ച് സുപ്രിംകോടതി

ലഖിംപൂര്‍ ഖേരി കൂട്ടക്കൊലയില്‍ ഉത്തര്‍പ്രദേശ് സര്‍ക്കാരിനെ വിമര്‍ശിച്ച് സുപ്രിംകോടതി. കേസിലെ പ്രതിയും കേന്ദ്രമന്ത്രിയുടെ മകനുമായ ആശിഷ് മിശ്രയുടെ ജാമ്യത്തിനെതിരെ ഹര്‍ജി ഫയല്‍ ചെയ്യാന്‍ വൈകിയതിനാണ് കോടതി സര്‍ക്കാരിനെ വിമര്‍ശിച്ചത്. എത്രയും വേഗം സര്‍ക്കാര്‍ നിലപാട് അറിയിക്കണമെന്ന് കോടതി ആവശ്യപ്പെട്ടു. അലഹബാദ് ഹൈക്കോടതി നല്‍കിയ ജാമ്യം റദ്ദാക്കണമെന്ന് ആവശ്യപ്പെട്ട് കൊല്ലപ്പെട്ട കര്‍ഷകരുടെ കുടുംബങ്ങളാണ് കോടതിയെ സമീപിച്ചത്.

ഫെബ്രുവരി 10നാണ് ആശിഷ് മിശ്രക്ക് അലഹബാദ് ഹൈക്കോടതി ജാമ്യം അനുവദിച്ചത്. നേരത്തെ മിശ്രയുടെ ജാമ്യത്തിനെതിരായി സമര്‍പ്പിച്ച ഹര്‍ജിയില്‍ സുപ്രിംകോടതി സര്‍ക്കാരിന് നോട്ടീസ് അയച്ചിരുന്നു. പ്രതിക്ക് വിഐപി പരിഗണന നല്‍കി ജാമ്യത്തില്‍ വിട്ടെന്നും കേസിലെ ദൃക്സാക്ഷികള്‍ക്ക് സര്‍ക്കാര്‍ സംരക്ഷണം നല്‍കുന്നില്ലെന്നും കര്‍ഷകര്‍ സുപ്രിംകോടതിയില്‍ നല്‍കിയ ഹര്‍ജിയില്‍ കുറ്റപ്പെടുത്തിയിരുന്നു. തുടര്‍ന്ന് മാര്‍ച്ച് 16ന് ഉത്തര്‍പ്രദേശ് സര്‍ക്കാരിന് സുപ്രിംകോടതി നോട്ടീസയക്കുകയായിരുന്നു.

കേന്ദ്രമന്ത്രി അജയ് മിശ്രയുടെ സന്ദര്‍ശനവുമായി ബന്ധപ്പെട്ട് കര്‍ഷകര്‍ നടത്തിയ പ്രതിഷേധത്തതിനിടെയാണ് ലഖിംപൂര്‍ ഖേരിയില്‍ കൂട്ടക്കൊല നടന്നത്. കേന്ദ്രമന്ത്രിയുടെ മകന്‍ ആശിഷ് മിശ്ര സമാധാനപരമായി പ്രതിഷേധിച്ചിരുന്ന കര്‍ഷകര്‍ക്ക് നേരെ യാതൊരു പ്രകോപനവും കൂടാതെ വാഹനം ഇടിച്ചു കയറ്റുകയായിരുന്നു ഒരു മാധ്യമപ്രവര്‍ത്തകനും കര്‍ഷരും ഉള്‍പ്പെടെ നാല് പേരാണ് കൊല്ലപ്പെട്ടത്.