‘ശരീരത്തിലാകെ കത്തികൊണ്ട് വരഞ്ഞ പാടുകള്‍; ഇരു വൃക്കകളും തകരാറിലായിരുന്നു’; പ്രവാസിയുടെ മരണത്തില്‍ ദുരൂഹതയുണ്ടെന്ന് ബന്ധുക്കള്‍

മലപ്പുറം പെരിന്തല്‍മണ്ണയില്‍ മരിച്ച അബ്ദുള്‍ ജലീലിന്റെ ശരീരത്തില്‍ മാരക മുറിവുണ്ടായിരുന്നതായി ബന്ധുക്കള്‍. ശരീരത്തിലാകെ കത്തി കൊണ്ട് വരഞ്ഞ പാടുകളുണ്ടായിരുന്നു. തലയ്ക്ക് ഗുരുതരമായി പരുക്കേറ്റിരുന്നുവെന്നും ഇരു വൃക്കകളും തകരാറിലായ അവസ്ഥയിലായിരുന്നുവെന്നും ബന്ധുക്കള്‍ പറയുന്നു.

പതിനെട്ടാം തീയതി രാവിലെ ഒന്‍പത് മണിക്കാണ് അബ്ദുള്‍ ജലീല്‍ നെടുമ്പാശേരി വിമാനത്താവളത്തില്‍ എത്തിയത്. സുഹൃത്തുക്കള്‍ ഒപ്പമുണ്ടെന്നും എയര്‍പോര്‍ട്ടിലേക്ക് വരേണ്ടതില്ലെന്നും പറഞ്ഞു. പെരിന്തല്‍മണ്ണയില്‍ എത്തിയാല്‍ മതിയെന്നും പറഞ്ഞിരുന്നു. കുറച്ച് സമയത്തിന് ശേഷം നിങ്ങള്‍ തിരിച്ചു പൊയ്‌ക്കോ വരാന്‍ കുറച്ചു വൈകും എന്ന് പറഞ്ഞ് വീട്ടുകാരെ നിര്‍ബന്ധപൂര്‍വം പറഞ്ഞയക്കുകയാണുണ്ടായത്. അതിനു ശേഷം അബ്ദുള്‍ ജലീലിനെ കുറിച്ച് ഒരു വിവരവുമുണ്ടായിരുന്നില്ലെന്നും ബന്ധുക്കള്‍ പറഞ്ഞു.

എന്തോ ചതിയില്‍ പെട്ടതാണെന്നാണ് കരുതുന്നത്. അബ്ദുള്‍ ജലീലിന് ക്രിമിനല്‍ പഞ്ചാത്തലമില്ലെന്നും പത്ത് വര്‍ഷമായി സൗദിയിലാണെന്നും ബന്ധുക്കള്‍ പറയുന്നു. സാമ്പത്തിക പ്രതിസന്ധികളുണ്ടായിരുന്നു. ഇത് കാരണം ആരെങ്കിലും പ്രലോഭിപ്പിച്ചോ എന്ന് പറയാന്‍ കഴിയില്ല. വളരെ ഗുരുതരമായ അവസ്ഥയിലാണ് ആശുപത്രിയില്‍ കണ്ടതെന്നും പ്രതിയെ ഉടന്‍ കണ്ടെത്താന്‍ കഴിയുമെന്നാണ് പ്രതീക്ഷയെന്നും ബന്ധുക്കള്‍ കൂട്ടിച്ചേര്‍ത്തു.