അച്ഛനായ സന്തോഷം പങ്കുവെച്ച് ബിഗ് ബോസ് താരം പ്രദീപ് ചന്ദ്രന്‍; ആശംസ അറിയിച്ച് ആരാധകര്‍

ബിഗ് ബോസ് രണ്ടാം സീസണില്‍ ശ്രദ്ധിക്കപ്പെട്ട മത്സരാര്‍ത്ഥിയാണ് പ്രദീപ് ചന്ദ്രന്‍. ഇതിന് പുറമെ സിനിമാ സീരിയല്‍ മേഘലയിലും പ്രദീപ് ചെറിയ വേഷങ്ങള്‍ ചെയ്ത് ശ്രദ്ധിക്കപ്പെട്ടിരുന്നു. ബിഗ് ബോസിലെ ശക്തമായ മത്സരാര്‍ത്ഥിയായിരുന്നു പ്രദീപ്, എന്നാല്‍ വൈകാതെ തന്നെ ഈ താരം ഷോയില്‍ നിന്നും പുറത്തായിരുന്നു. ഇതിന് പിന്നാലെ തന്നെ പ്രദീപിന്റെ വിവാഹ വാര്‍ത്തയും പുറത്തുവന്നിരുന്നു.

അനുപമ രാമചന്ദ്രനെയായിരുന്നു നടന്‍ ജീവിതസഖിയാക്കിയത്. കോവിഡ് കാലത്തായിരുന്നു ഇവരുടെ വിവാഹം. അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത വിവാഹ ചടങ്ങിന്റെ ചിത്രങ്ങളും വീഡിയോകളുമെല്ലാം മുന്‍പ് സോഷ്യല്‍ മീഡിയയില്‍ വൈറലായിരുന്നു. ഇപ്പോള്‍ മറ്റൊരു സന്തോഷ വാര്‍ത്തയാണ് താരം പങ്കുവെച്ചത്. തനിക്കും അനുപമക്കും ഒരു കുഞ്ഞു പിറന്ന സന്തോഷ വിവരം ആരാധകരുമായി പങ്കുവെച്ചിരിക്കുകയാണ് പ്രദീപ്.

സോഷ്യല്‍ മീഡിയ വഴിയാണ് പ്രദീപ് ഈ കാര്യം അറിയിച്ചത്. ആണ്‍കുഞ്ഞിനാണ് അനുപമ ജന്മം നല്‍കിയതെന്ന് പ്രദീപ് ഫേസ്ബുക്ക് പേജിലൂടെ അറിയിച്ചു. പിന്നാലെ ആശംസ അറിയിച്ച് നിരവധി പേരാണ് വന്നത്. ഇപ്പോള്‍ അച്ഛനും അമ്മയും ആയതിന്റെ സന്തോഷത്തിലാണ് ഈ താരങ്ങള്‍. അതേസമയം
അനുപമയുടെ ഗര്‍ഭകാല ചിത്രങ്ങളെല്ലാം സോഷ്യല്‍ മീഡിയയില്‍ വൈറലായിരുന്നു.

ഇവരുടെ പ്രണയ വിവാഹമല്ലെന്നും അറേഞ്ച്ഡ് മാര്യേജാണെന്നും പ്രദീപ് ചന്ദ്രന്‍ മുന്‍പ് വെളിപ്പെടുത്തിയിരുന്നു. ബിഗ് ബോസിന് മുന്‍പ് വന്ന ആലോചനയാണെന്നും ഷോ കഴിഞ്ഞതിന് ശേഷം വിവാഹം തീരുമാനിക്കുകയായിരുന്നു എന്നും നടന്‍ പറഞ്ഞിരുന്നു. തുടര്‍ന്ന് കഴിഞ്ഞ വര്‍ഷം ഭാര്യ ഗര്‍ഭിണിയാണെന്നുളള വിവരം ഒരു അഭിമുഖത്തിലൂടെ നടന്‍ അറിയിച്ചു. ആദ്യത്തെ കണ്‍മണിക്കായുളള കാത്തിരിപ്പിലാണ് തങ്ങളെന്നാണ് പ്രദീപ് പറഞ്ഞിരുന്നു, പിന്നാലെയാണ് കുഞ്ഞു പിറന്ന സന്തോഷം പങ്കുവെച്ചത്.