ഫേമസ് ആവാന്‍, മേയാന്‍ വിട്ട മൃഗങ്ങളെ പിടിച്ച് കൊന്ന് പാചക പരീക്ഷണം നടത്തി ; യുട്യൂബറും സംഘവും അറസ്റ്റില്‍

യുട്യൂബ് ചാനലില്‍ റീച്ച് കൂട്ടാന്‍ വേണ്ടി പലരും നന്നായി കഷ്ടപ്പെടുന്നുണ്ട്. വേറിട്ട വീഡിയോ ആണ് പലരുടെയും ലക്ഷ്യം. ഇതിനിടെ മിണ്ടാപ്രാണികളെ ദ്രോഹിച്ചും വീഡിയോയുടെ റീച്ച് കൂട്ടുന്നവര്‍ ഉണ്ട്. ഇപ്പോള്‍ പുറത്തുവന്നതും അത്തരത്തില്‍ ഉള്ള ഒരു വാര്‍ത്തയാണ്. തോട്ടത്തില്‍ മേയാന്‍ വിട്ടിരുന്ന വളര്‍ത്തുമൃഗങ്ങളെ കൊന്ന് ഇറച്ചിയാക്കുന്ന യുട്യൂബര്‍ ഉള്‍പ്പെടെയുളള സംഘത്തെ ഇപ്പോള്‍ പോലീസ് അറസ്റ്റ് ചെയ്തിരിക്കുകയാണ്. കൊല്ലം ഏരൂരിലാണ് മൃഗവേട്ടക്കാരെ അറസ്റ്റ് ചെയ്തത്.

തോട്ടത്തില്‍ മേയാന്‍ വിട്ട പശുവിന്റെയും ആടിന്റെയുമൊക്കെ ഇറച്ചിയെടുത്തായിരുന്നു യൂട്യൂബറുടെ പാചകരീതി . ഹംഗ്‌റി ക്യാപ്റ്റന്‍ എന്ന പേരില്‍ യുട്യൂബില്‍ പാചകരീതികള്‍ പരിചയപ്പെടുത്തിയിരുന്ന ചിതറ െഎരക്കുഴി സജീര്‍ മന്‍സിലില്‍ റജീഫ്, റജീഫിന്റെ പിതാവ് കമറുദ്ദീന്‍, കൊച്ചാലുംമൂട് രേഖാഭവനില്‍ ഹിലാരി എന്നിവരെ ഏരൂര്‍ പൊലീസാണ് അറസ്റ്റു ചെയ്തത്.

തോക്ക്, വെടിമരുന്ന്, ഈയം, ബാറ്ററി തുടങ്ങിയവ ഉപയോഗിച്ചാണ് ഇവര്‍ മൃഗങ്ങളെ വേട്ട ചെയ്തിരുന്നത്. ഇതെല്ലാം തെളിവെടുപ്പിനിടെ പ്രതികളില്‍ നിന്നും പോലീസിന് ലഭിച്ചു. പതിനൊന്നാംമൈല്‍ കമ്പംകോട് അഭിലാഷ് ഭവനില്‍ സജിയുടെ ഗര്‍ഭിണിയായ പശുവിനെ കൊന്ന് ഇറച്ചിയാക്കിയതോടെയാണ് വേട്ടക്കാരുടെ സംഘത്തിനായി പൊലീസ് വലവിരിച്ചത്.

പ്രദേശത്തു നിന്ന് അഞ്ച് പശുക്കളെ കാണാതായതോടെയാണ് ഇവര്‍ക്ക് സംശയം തോന്നിയത്. ഇതോടെ ക്ഷീര കര്‍ഷകര്‍ പൊലീസില്‍ പരാതി നല്‍കി. ഇവര്‍ ചെയ്യുന്ന വീഡിയോയിലെ പാചക രീതികളില്‍ ഇത്തരത്തില്‍ പിടിച്ച മൃഗങ്ങളുടെ ഇറച്ചിയാണ് ഉപയോഗിക്കുന്നത്. സംഘം പങ്കുവെച്ച വീഡിയോ എല്ലാം പരിശോധിച്ച് അന്വേഷണം തുടരുമെന്ന് പോലീസ് അറിയിച്ചു.