ആലപ്പുഴ പുന്നപ്രയില് ട്രെയിനിടിച്ച് മരിച്ച നന്ദു എന്ന ശ്രീരാജിന് മര്ദനമേറ്റതായി പൊലീസ് എഫ്.ഐ.ആര്. ഞായറാഴ്ചയാണ് നന്ദുവിനെ ട്രെയിന് ഇടിച്ച് മരിച്ച നിലയില് കണ്ടെത്തിയത്. നന്ദുവിന്റെ സഹോദരി നല്കിയ പരാതിയുടെ അടിസ്ഥാനത്തില് എട്ട് പേരെ പ്രതിചേര്ത്ത് പൊലീസ് കേസ് എടുത്തിരുന്നു.
മുന്ന, ഫൈസല് എന്നിവര് ചേര്ന്നാണ് നന്ദുവിനെ മര്ദിച്ചതെന്നും പൊലീസ് പറയുന്നു. ഇവര് വീട്ടില് മാരകയുധങ്ങളുമായി എത്തി ഭീഷണിപ്പെടുത്തിയിരുന്നു. ഇവര്ക്ക് പുറമെ നിധിന് തോമസ്, സുമേഷ്, വിഷ്ണു പ്രസാദ്, ഇക്രു, സജീവന്, റോബിന് എന്നിവര്ക്കെതിരെയും കേസെടുത്തിട്ടുണ്ട്.
മര്ദിക്കാന് ഓടിക്കുന്നതിനിടയില് നന്ദു ട്രെയിന് ഇടിച്ചു മരിച്ചെന്നാണ് കുടുംബത്തിന്റെ പരാതി. എന്നാല് ഇക്കാര്യം പൊലീസ് സ്ഥിരീകരിച്ചിട്ടില്ല. മാനസിക വിഷമത്തെ തുടര്ന്ന് നന്ദു ജീവനൊടുക്കി എന്നാണ് പൊലീസിന്റെ നിഗമനം.
ഇതിനുമുമ്പ് ഡി.വൈ.എഫ്.ഐ പ്രവര്ത്തകരുമായി പ്രദേശത്ത് സംഘര്ഷം ഉണ്ടായിരുന്നു എന്നാണ് ബന്ധുക്കള് പറയുന്നത്. പ്രതികള് നന്ദുവിന്റെ വീട്ടിനു മുന്പിലെത്തി ഇരുമ്പ് വടിയുമായി എത്തി ഭീഷണിപ്പെടുത്തിയെന്നും പരാതിയില് പറയുന്നു. ഡി.വൈ.എഫ്.ഐ പ്രവര്ത്തകരാണ് മരണത്തിന് പിന്നിലെന്നാണ് ബന്ധുക്കള് ആരോപിക്കുന്നത്.