കുഞ്ഞ് പിറന്ന് രണ്ട് മാസം പൂര്‍ത്തിയാവും മുമ്പ് നെയ്മറും ബ്രൂണ ബിയകാര്‍ഡിയും വേര്‍പിരിഞ്ഞു; പ്രഖ്യാപനവുമായി ബ്രൂണ

സാവോപോളോ: കുഞ്ഞ് പിറന്ന് രണ്ട് മാസം പൂര്‍ത്തിയാവും മുമ്പ് പങ്കാളി ബ്രൂണ ബിയകാര്‍ഡിയുമായി നെയ്മര്‍ വേര്‍പിരിഞ്ഞു. ബ്രൂണ സോഷ്യല്‍ മീഡിയയിലൂടെയാണ് വിവാഹ മോചനക്കാര്യം വ്യക്തമാക്കിയത്.

ബ്രസീലിയന്‍ മോഡല്‍ അലിന്‍ ഫാരിയാസിന് നെയ്മര്‍ അയച്ച സന്ദേശങ്ങളുടെ സ്‌ക്രീന്‍ ഷോട്ട് കഴിഞ്ഞ ദിവസം പുറത്തുവന്നിരുന്നു. പിന്നാലെയാണ് ബ്രൂണ വിവാഹ മോചനം പ്രഖ്യാപിച്ചത്.

ഇതു തന്റെ സ്വകാര്യ വിഷയമാണെന്നും പക്ഷേ അഭ്യൂഹങ്ങള്‍ പരന്നതിനാലാണു വിശദീകരണം നല്‍കുന്നതെന്നും ബ്രൂണ ഇന്‍സ്റ്റഗ്രാമില്‍ അറിയിച്ചു. ”ഞാന്‍ ഇപ്പോള്‍ അദ്ദേഹത്തിന്റെ പങ്കാളിയല്ല. ഞാനും നെയ്മറും തമ്മില്‍ ഇപ്പോള്‍ മാവിയുടെ മാതാപിതാക്കള്‍ എന്ന ബന്ധം മാത്രമാണുള്ളത്.

ഇതുമായി ബന്ധപ്പെട്ട വാര്‍ത്തകളും ചര്‍ച്ചകളുമെല്ലാം ഇതോടുകൂടി അവസാനിക്കുമെന്ന് ഞാന്‍ കരുതുന്നു.” ബ്രൂണ കുറിച്ചു. കഴിഞ്ഞ മാസമായിരുന്നു നെയ്മര്‍ക്കും ബ്രൂണയ്ക്കും പെണ്‍കുഞ്ഞ് പിറന്നത്. അതിനിടെ നെയ്മര്‍ക്ക് അലിനുമായി ബന്ധമുണ്ടെന്ന അഭ്യൂഹങ്ങള്‍ പുറത്തുവന്നിരുന്നു.

ഇതിനിടയില്‍ നഗ്നചിത്രങ്ങള്‍ ആവശ്യപ്പെട്ട് ബ്രസീലിയന്‍ മോഡലിന് നെയ്മര്‍ അയച്ച സന്ദേശത്തിന്റെ സ്‌ക്രീന്‍ ഷോട്ട് പ്രചരിക്കുകയും ചെയ്തിരുന്നു. എന്നാല്‍ വര്‍ഷങ്ങള്‍ക്ക് മുമ്പുള്ള സന്ദേശമാണ് എന്നായിരുന്നു നെയ്മറിന്റെ പ്രതികരണം. ഇതിന് ഇടയിലാണ് തങ്ങള്‍ വേര്‍പിരിഞ്ഞുവെന്ന് ബ്രൂണ വ്യക്തമാക്കിയിരിക്കുന്നത്.

നെയ്മറും ബ്രൂണയും 2012-ല്‍ റിയോ കാര്‍ണിവലിലാണ് പരിചയപ്പെടുന്നത്. ആറു വര്‍ഷത്തെ പ്രണയത്തിനൊടുവില്‍ 2018-ല്‍ ഇരുവരും വേര്‍പിരിഞ്ഞിരുന്നു. എന്നാല്‍ നാല് വര്‍ഷങ്ങള്‍ക്ക് ശേഷം 2022-ല്‍ ഇരുവരും ഒന്നിച്ചു.

വിവാഹനിശ്ചയം വരെ കാര്യങ്ങളെത്തിയെങ്കിലും വീണ്ടും പ്രശ്‌നങ്ങളുണ്ടായി. പിന്നീട് പ്രശ്‌നം സംസാരിച്ച് പരിഹരിച്ച രണ്ടുപേരും 2023-ല്‍ ഒരുമിച്ചു. കഴിഞ്ഞ ഏപ്രിലില്‍ മാതാപിതാക്കളാകാന്‍ പോകുന്ന സന്തോഷവാര്‍ത്ത പങ്കുവെക്കുകയായിരുന്നു.

ഇതിനിടെ ഗര്‍ഭിണിയായ ബ്രൂണയെ നെയ്മര്‍ വഞ്ചിച്ചുവെന്ന രീതിയില്‍ വീണ്ടും വാര്‍ത്തകള്‍ വന്നു. ഇതോടെ താരം പരസ്യമായി മാപ്പ് പറഞ്ഞു. മൂന്ന് മാസങ്ങള്‍ക്ക് ശേഷം ഇരുവര്‍ക്കും കുഞ്ഞ് പിറന്നു. എന്നാലിപ്പോള്‍ വീണ്ടും തങ്ങള്‍ വേര്‍പിരിഞ്ഞുവെന്ന് അറിയിച്ചിരിക്കുകയാണ് ബ്രൂണ.