മലയാള സിനിമയിലെ നായക സങ്കൽപങ്ങളെ തിരുത്തിയെഴുതിയ കഥാപാത്രത്തിന് 15 വയസ്സ്

മലയാളത്തിലെ എക്കാലത്തെയും മികച്ച വിജയങ്ങളിൽ ഒന്നാണ് 2005 വർഷത്തിൽ പുറത്തിറങ്ങിയ ജോഷി സംവിധാനം ചെയ്ത നരൻ. മുള്ളൻകൊല്ലി വേലായുധൻ എന്ന മോഹൻലാലിന്റെ കരിയറിലെ തന്നെ ഏറ്റവും മികച്ച പ്രകടനങ്ങളിൽ ഒന്നായിട്ടാണ് വിലയിരുത്തപ്പെടുന്നത്.

ഒരു സാധാരണ മാസ് മസാല സിനിമയ്ക്ക് വേണ്ട പേരുകൾ മാത്രമാണ് ചിത്രത്തിൽ ഉണ്ടായിരുന്നത് എങ്കിലും അസാമാന്യമായ സ്ക്രീൻ പ്രസൻസ് കൊണ്ടും സംഘടന രംഗങ്ങളിലെ അതിസാഹസിക കൊണ്ടും ഇതിഹാസമായി മാറിയ ചിത്രമാണ് നരൻ. ചിത്രം റിലീസ് ചെയ്തത് ഇന്നേക്ക് 15 വർഷം തികയുകയാണ്. ആശിർവാദ് സിനിമാസ് ബാനറിൽ ആൻറണി പെരുമ്പാവൂർ നിർമ്മിച്ച ചിത്രം ആ വർഷത്തെ ഏറ്റവും പണംവാരി ചിത്രങ്ങളിൽ ഒന്നു കൂടി ആയിരുന്നു.

ദീപക്‌ ദേവ് ആണ് ചിത്രത്തിലെ ഗാനങ്ങൾ ഒരുക്കിയത്. ചിത്രത്തിലെ ഗാനങ്ങൾ ഇറങ്ങിയ സമയത്ത് മാത്രമല്ല, ഇപ്പോഴും വലിയൊരു തരംഗം ആയി നിലനിൽക്കുന്നു. “വേൽമുരുകാ ഹരോ ഹരാ” എന്ന ഗാനം ഇപ്പോഴും മലയാളികളുടെ ഉത്സവ മേളകളിലെ സ്ഥിരം സാന്നിധ്യമായി നിലനിൽക്കുന്നു. ഈ ഗാനം ഇല്ലാത്ത ഒരു ഉത്സവ രാത്രിയെക്കുറിച്ച് മലയാളിക്ക് ചിന്തിക്കാൻ പോലും കഴിയാത്ത അത്ര ഉയരത്തിലാണ് ഈ ഗാനത്തിൻറെ ജനപ്രീതി. ചിത്രത്തിലെ മറ്റ് എല്ലാ ഗാനങ്ങളും ഒരുപോലെ സ്വീകരിക്കപ്പെട്ടവ ആയിരുന്നു.

ചിത്രത്തിന്റെ ഏറ്റവും വലിയ ഹൈലൈറ്റ് മോഹൻലാൽ എന്ന താരത്തിന്റെ പ്രകടനം തന്നെ ആയിരുന്നു. സംഘടന രംഗങ്ങളിൽ അതിൻറെ പരമാവധിയും എന്നാൽ അതേ സമയം ഇമോഷണൽ സീനുകളിലും നർമ്മ സന്ദർഭങ്ങളിലും ഒരുപോലെ തിളങ്ങിയ പ്രകടനമായിരുന്നു ചിത്രത്തിൽ മോഹൻലാലിന്. മുള്ളൻകൊല്ലി വേലായുധൻ എന്ന ഒരു ഭീകരനായ ഗുണ്ടയെ ആണ് ചിത്രത്തിൽ ആദ്യം അവതരിപ്പിക്കുന്നത് എങ്കിലും പലപ്പോഴും നിഷ്കളങ്കതയുടെ ആൾരൂപമായി മാറുന്നുണ്ട് ഇതേ വേലായുധൻ.

മോഹൻലാൽ എന്ന നടനിൽ നിന്നും ലഭിച്ച ഒരു കംപ്ലീറ്റ് എന്റർടെയ്ൻമെന്റ് പാക്കേജ് കൂടി ആയിരുന്നു നരൻ. രണ്ടര കോടി ബജറ്റിലാണ് ചിത്രം ഒരുക്കിയത്. ആ വർഷത്തെ ഏറ്റവും വലിയ വിജയങ്ങളിൽ ഒന്നു കൂടി ആയിരുന്നു നരൻ. 100 ദിവസത്തിന് മുകളിൽ പല സെന്ററുകളിലും പ്രദർശനം തുടർന്നിരുന്നു.