മുത്തച്ഛനെ അപമാനിച്ച ബാലയ്യയെ എയറില്‍ കയറ്റി നാഗചൈതന്യ; കൈയടിച്ച് ആരാധകര്‍-താരം പറഞ്ഞത് കേട്ടോ

തെലുങ്ക് സൂപ്പര്‍താരം നാഗാര്‍ജുനയുടെ അച്ഛന്‍ അക്കിനേനി നാഗേശ്വരറാവുവിനെ കുറിച്ച് തെലുങ്ക് നടന്‍ നന്ദമൂരി ബാലകൃഷ്ണ നടത്തിയ പ്രസ്താവനകള്‍ വലിയ വിമര്‍ശനം ഏറ്റുവാങ്ങിയിരുന്നു.

പുതിയ ചിത്രമായ വീരസിംഹ റെഡ്ഡിയുടെ പ്രമോഷന്‍ പരിപാടിയ്ക്കിടെ നടത്തിയ പരാമര്‍ശമായിരുന്നു വിവാദമായത്.’എന്റെ അച്ഛന്‍ സീനിയര്‍ എന്‍ടിആറിന് ചില സമകാലികര്‍ ഉണ്ടായിരുന്നു, രംഗ റാവു (എസ് വി രംഗ റാവുവിനെ പരാമര്‍ശിച്ച്), അക്കിനേനിയോ തൊക്കിനേനിയോ മറ്റോ ‘ എന്നായിരുന്നു ബാലകൃഷ്ണ പറഞ്ഞത്.

ഈ പരാമര്‍ശത്തിനെതിരെ അക്കിനേനി കുടുംബത്തിന്റെ ആരാധകര്‍ രംഗത്ത് വന്നിരുന്നു. തെലുങ്ക് ഇതിഹാസ താരമായ അക്കിനേനി നാഗേശ്വരറാവുവിനെ അപമാനിക്കുന്ന രീതിയില്‍ സംസാരിച്ച ബാലയ്യ മാപ്പ് പറയണം എന്നായിരുന്നു അക്കിനേനി കുടുംബത്തിന്റെ ആരാധകര്‍ പറഞ്ഞത്.

ഇതിനിടയില്‍ ഇപ്പോഴിത ബാലകൃഷ്ണയുടെ അഭിപ്രായത്തോട് പ്രതികരിച്ച് എത്തിയിരിക്കുകയാണ് എഎന്‍ആറിന്റെ ചെറുമകനും നടനുമായ നാഗ ചൈതന്യ. പ്രസ്താവനയിലൂടെയായിരുന്നു നാഗചൈതന്യ അതൃപ്തി അറിയിച്ചത്.

‘നന്ദമുരി താരക രാമറാവു ഗാരു, അക്കിനേനി നാഗേശ്വര റാവു ഗാരു, എസ് വി രംഗ റാവു ഗാരു എന്നിവരുടെ സര്‍ഗ്ഗാത്മക സംഭാവനകള്‍ തെലുങ്ക് സിനിമയുടെ അഭിമാനവും നെടുംതൂണുകളുമാണ്. അവരോട് അനാദരവ് കാണിക്കുന്നത് നമ്മളെത്തന്നെ അപകീര്‍ത്തിപ്പെടുത്തുകയാണ്- എന്നാണ് നാഗചൈതന്യ പറഞ്ഞത്.

നാഗചൈതന്യയുടെ സഹോദരന്‍ അഖില്‍ അക്കിനേനിയും ഇതേ വാക്കുകള്‍ തന്നെ സോഷ്യല്‍ മീഡിയയില്‍ പങ്കുവെച്ചു എത്തിക്കഴിഞ്ഞു. നാഗചൈതന്യയുടെ പ്രസ്താവനയ്ക്ക് പിന്നാലെ ബാലയ്യയെ എയറില്‍ കയറ്റിയിരിക്കുകയാണ് നാഗചൈതന്യ ആരാധകര്‍.