ശബരീനാഥന്റെ വാട്സ്ആപ്പ് ചാറ്റ് പുറത്തുവിട്ടത് ആരാണെന്ന് അറിയാമെന്നും അതിപ്പോള് വെളിപ്പെടുത്തുന്നില്ലെന്നും യൂത്ത് കോണ്ഗ്രസ് സംസ്ഥാന വൈസ് പ്രസിഡന്റ് സ്ഥാനത്തിനിന്ന് സസ്പെന്ഡ് ചെയ്യപ്പെട്ട എന്.എസ് നുസൂര്. ഇത്രയും കാലത്തിനിടെ പാര്ട്ടിയെ ഒറ്റിക്കൊടുത്തിട്ടില്ല. കെ. സുധാകരനെ നേരിട്ട് കണ്ട് കാര്യങ്ങള് ബോധ്യപ്പെടുത്തും. ഇത്രയും കാലം കോണ്ഗ്രസിലായിരുന്നു. ഇനിയും അങ്ങനെത്തന്നെ ആയിരിക്കുമെന്നും പാര്ട്ടിക്കെതിരെ ഒരു കാര്യവും തന്റെ വായില്നിന്ന് പുറത്തുപോയിട്ടില്ലെന്നും നുസൂര് പറഞ്ഞു.
ശക്തമായ നിലപാട് സ്വീകരിച്ചതിന്റെ പേരില് തന്നെ ഒറ്റപ്പെടുത്തുകയാണ്. ദേശീയ നേതൃത്വത്തിന്റെ തീരുമാനം അംഗീകരിക്കും. നിരപരാധിത്വം സമൂഹത്തിന് മുന്നില് വ്യക്തമാക്കും. നിയമപരമായി നേരിടണമെങ്കില് അങ്ങനെയും ചെയ്യുമെന്നും നുസൂര് കൂട്ടിച്ചേര്ത്തു.
ഷാഫി പറമ്പില് തന്നെ ലക്ഷ്യംവയ്ക്കുന്നു എന്ന് അഭിപ്രായമില്ല. ഷാഫി പറമ്പിലുമായി അഭിപ്രായ വ്യത്യാസമില്ല. ചില കാര്യങ്ങളില് എതിര്പ്പുണ്ടാകുന്നത് സ്വാഭാവികമാണെന്നും അദ്ദേഹം പറഞ്ഞു. യൂത്ത് കോണ്ഗ്രസ് സംസ്ഥാന കമ്മിറ്റിയുടെ ഔദ്യോഗിക വാട്സ്ആപ്പ് ഗ്രൂപ്പിലെ ചാറ്റ് ചോര്ന്നതുമായി ബന്ധപ്പെട്ടാണ് നുസൂറിനെ കഴിഞ്ഞ ദിവസം സസ്പെന്ഡ് ചെയ്തത്.