ആയിരം മണിക്കൂറുകൾ കൊണ്ടൊരുക്കിയ വസ്ത്രം അണിഞ്ഞു നവവധു

ബാഹുബലിയിലെ വില്ലനായിട്ടെത്തി തെന്നിന്ത്യന്‍ സിനിമാലോകത്ത് പ്രശസ്തനായ റാണ ദഗ്ഗുപതി വിവാഹിതനായിരിക്കുകയാണ്. മാസങ്ങള്‍ക്ക് മുന്‍പ് പ്രതിശ്രുത വധു മിഹീക ബജാജിനെ പരിചയപ്പെടുത്തി രംഗത്ത് വന്ന റാണ നേരത്തെ അറിയിച്ചിരുന്നത് പോലെ ആഗസ്റ്റ് എട്ടിനാണ് വിവാഹിതനായത്. കഴിഞ്ഞ ദിവസങ്ങളില്‍ സമൂഹ മാധ്യമങ്ങളിലൂടെ വിവാഹാഘോഷങ്ങളുടെ ചിത്രങ്ങള്‍ പുറത്ത് വന്നിരുന്നു.

ഹല്‍ദി ആഘോഷങ്ങളൊക്കെ അതിവിപുലമായിട്ടായിരുന്നു നടത്തിയത്. നടന്‍ രാം ചരണായിരുന്നു റാണയുടെയും മിഹീകയുടെയും വിവാഹചിത്രം ആദ്യം പുറത്ത് വിടുന്നത്. പിന്നാലെ നിരവധി ചിത്രങ്ങളും വീഡിയോസും പുറത്ത് വന്നു. വിവാഹത്തിന് മിഹീക അണിഞ്ഞ ലെഹങ്കയ്ക്ക് വരെ പ്രത്യേകതകളുണ്ടെന്നുള്ളതാണ് ഇപ്പോള്‍ പുറത്ത് വരുന്ന റിപ്പോര്‍ട്ടുകളില്‍ നിന്നും വ്യക്തമാവുന്നത്.

പ്രമുഖ ഡിസൈനറായ അനാമിക ഖന്നയാണ് മിഹീകയുടെ വിവാഹവസ്ത്രങ്ങള്‍ ഡിസൈന്‍ ചെയ്തത്. മിഹീകയും അമ്മ ബണ്ടി ബജാജും എലഗന്റ് ലുക്കിലുള്ള വസ്ത്രങ്ങളാണ് മോഹിക്കുന്നത്. ക്രീമും സ്വര്‍ണനിറവും ചേര്‍ന്ന ലെഹങ്കയാണ് വിവാഹവസ്ത്രമായി തിരഞ്ഞെടുത്തത്. സര്‍ദോസി, ചിങ്കക്കാരി ത്രെഡ് വര്‍ക്ക് ചെയ്ത ബ്ലൗസും സ്വര്‍ണനിറത്തിലുള്ള മെറ്റല്‍ വര്‍ക്ക് ചെയ്‌തെടുത്ത ദുപ്പട്ടയും. അമിതാഡബരമില്ലാത്ത വസ്ത്രങ്ങളോടാണ് മിഹീകയ്ക്ക് താല്‍പര്യം. ആയിരം മണിക്കൂറുകള്‍ കൊണ്ടാണ് മിഹീകയുടെ വസ്ത്രം നെയ്‌തെടുത്തതെന്നും അനാമിക ടൈംസ് ഓഫ് ഇന്ത്യയ്ക്ക് നല്‍കിയ അഭിമുഖത്തില്‍ പറയുന്നു.