നൂറ് കോടി ചിത്രം ഉണ്ടായത് ഇങ്ങനെ; മാളികപ്പുറം മേക്കിങ് വീഡിയോ പുറത്ത് വിട്ട് അണിയറ പ്രവര്‍ത്തകര്‍-വൈറലായി വീഡിയോ

ഉണ്ണി മുകുന്ദന്റെ കരിയറിലെ ഏറ്റവും വലിയ ഹിറ്റുകളില്‍ ഒന്നാണ് ‘മാളികപ്പുറം’. കഴിഞ്ഞ വര്‍ഷം ഡിസംബറിലാണ് റിലീസ് ചെയ്ത 100 കോടി ക്ലബ്ബില്‍ ഇടം പിടിച്ചിരുന്നു. ഭക്തിയുടെ പശ്ചാത്തലത്തില്‍ കഥ പറഞ്ഞ ചിത്രം ഇമോഷനും ആക്ഷനും കൂടി മികച്ചൊരു ഫാമിലി എന്റര്‍ടെയ്ന്‍മെന്റ് ചിത്രമായിരുന്നു.

തീയറ്റര്‍ വിജയത്തിന് പിന്നാലെ സിനിമ ഒടിടിയിലും എത്തിയിരുന്നു. ഒടിടിയിലും മികച്ച വിജയം നേടി പ്രദര്‍ശനം തുടരുന്നതിന് ഇടയില്‍ മാളികപ്പുറത്തിന്റെ മേക്കിംഗ് വീഡിയോ പുറത്തുവിട്ടിരിക്കുകയാണ് അണിയറ പ്രവര്‍ത്തകര്‍.

മാളികപ്പുറത്തിലെ പ്രധാന രംഗങ്ങള്‍ ഉള്‍ക്കൊള്ളിച്ചാണ് വീഡിയോ തയ്യാറാക്കിയിരിക്കുന്നത്. സിനിമയിലെ അവസാന ഭാഗത്തുള്ള ഗംഭീര സംഘട്ടന രംഗങ്ങള്‍ ചിത്രീകരിക്കുന്നതിലെ വെല്ലുവിളികളും ഗാനങ്ങള്‍ ചിത്രീകരിക്കുന്നതുമെല്ലാം മേക്കിങ് വീഡിയോയില്‍ കാണാം.

യൂട്യൂബില്‍ എത്തിയ മേക്കിങ് വീഡിയോ നിമിഷ നേരം കൊണ്ടാണ് വൈറലായത്. നിരവധി പേരാണ് വീഡിയോയ്ക്ക് താഴെ കമന്റുമായി എത്തുന്നത്. അതേസമയം വിഷ്ണു ശശി ശങ്കര്‍ സംവിധാനം ചെയ്ത് എത്തിയ ചിത്രമാണ് മാളികപ്പുറം.

2022 ഡിസംബര്‍ 30ന് ആണ് ചിത്രം തീയറ്ററില്‍ എത്തിയത്. ഫെബ്രുവരി ആയപ്പോഴേക്കും ചിത്രം 100 കോടി ക്ലബ്ബില്‍ ഇടംനേടി. അഭിലാഷ് പിള്ളയുടേതാണ് മാളികപ്പുറത്തിന്റെ രചന.

സൈജു കുറുപ്പ്, ഇന്ദ്രന്‍സ്, മനോജ് കെ ജയന്‍, രമേശ് പിഷാരടി, സമ്പത്ത് റാം, ദേവനന്ദ, ശ്രീപദ് എന്നിവരാണ് ചിത്രത്തില്‍ പ്രധാന കഥാപാത്രങ്ങളെ അവതരിപ്പിച്ചത്. കാവ്യ ഫിലിം കമ്പനി, ആന് മെഗാ മീഡിയ എന്നീ ബാനറുകളില്‍ പ്രിയ വേണു, നീത പിന്റോ എന്നിവരാണ് ചിത്രത്തിന്റെ നിര്‍മ്മാണം.

അതേസമയം, ഗന്ധര്‍വ്വ ജൂനിയറില്‍ ആണ് ഉണ്ണി മുകുന്ദന്‍ ഇപ്പോള്‍ അഭിനയിച്ചു കൊണ്ടിരിക്കുന്നത്. ചിത്രം സംവിധാനം ചെയ്യുന്നത് വിഷ്ണു അരവിന്ദ് ആണ്. അഞ്ച് ഭാഷകളില്‍ ആണ് ചിത്രം ഒരുങ്ങുന്നത്. ഒരു ഗന്ധര്‍വ്വന്റെ അപ്രതീക്ഷിത വരവ് ഉപകാരവും ഉപദ്രവവും ആവുന്ന നര്‍മ്മ നിമിഷങ്ങളിലൂടെയാണ് ചിത്രം മുന്നോട്ട് പോകുന്നത്.