റാന്നിയില്‍ പതിമൂന്ന് വയസുകാരിയെ പീഡിപ്പിച്ചെന്ന് പരാതി; അമ്മയുടെ കാമുകന്‍ അറസ്റ്റില്‍

പത്തനംതിട്ട റാന്നിയില്‍ പതിമൂന്ന് വയസുകാരിയെ പീഡിപ്പിച്ചെന്ന പരാതിയില്‍ അമ്മയുടെ കാമുകനെ പൊലീസ് അറസ്റ്റ് ചെയ്തു. റാന്നി സ്വദേശി ഷിജു(40) ആണ് അറസ്റ്റിലായത്.

പെണ്‍കുട്ടി താമസിക്കുന്ന വാടക വീട്ടിലെത്തിയ പ്രതി രണ്ടുതവണ പീഡനത്തിനിരയാക്കിയെന്നാണ് പരാതി. സ്‌കൂള്‍ അധ്യാപികയോടാണ് പെണ്‍കുട്ടി പീഡന വിവരം തുറന്നു പറഞ്ഞത്. പിന്നീട് സ്‌കൂള്‍ അധികൃതര്‍ വഴി പൊലീസില്‍ പരാതി നല്‍കുകയായിരുന്നു.

അച്ഛന്‍ ഉപേക്ഷിച്ച് പോയതിനെ തുടര്‍ന്ന് പെണ്‍കുട്ടിയും അമ്മയും മാത്രമാണ് വാടക വീട്ടില്‍ താമസിക്കുന്നത്. അമ്മയുടെ കാമുകനായ ഷിജു ഈ വീട്ടിലെ നിത്യസന്ദര്‍ശകനായിരുന്നു. ഫെബ്രുവരി 27, മാര്‍ച്ച് എട്ട് തീയതികളിലാണ് ഷിജു പെണ്‍കുട്ടിയെ പീഡിപ്പിച്ചതെന്നാണ് പരാതിയില്‍ പറയുന്നത്. അമ്മ ആരാധനാലയത്തില്‍ പോയ സമയത്തായിരുന്നു പീഡനം. അമ്മയുടെ നിര്‍ബന്ധപ്രകാരം പ്രതിക്കൊപ്പമായിരുന്നു പെണ്‍കുട്ടി സ്‌കൂളില്‍ പോയിരുന്നത്. ഇത് വിഷമിപ്പിച്ചിരുന്നതായും പെണ്‍കുട്ടി വെളിപ്പെടുത്തിയിരുന്നു.