ഏതെങ്കിലും തരത്തില്‍ മനസിനെ വേദനിപ്പിച്ചിട്ടുണ്ടെങ്കില്‍ ക്ഷമിക്കണം ;ഒടുവില്‍ പരസ്പരം ക്ഷമ ചോദിച്ച് ലക്ഷ്മിപ്രിയയും റിയാസും

മലയാളം ബിഗ്‌ബോസ് സീസണ്‍ ഫോര്‍ അവസാനിക്കാന്‍ ഇനി ദിവസങ്ങള്‍ മാത്രമേ ബാക്കിയുള്ളൂ. നിലവില്‍ ഏഴ് പേരാണ് ഷോയില്‍ ഉള്ളത്. ഇതില്‍ ബ്ലെസി സേഫ് ആണെന്ന് കഴിഞ്ഞ ദിവസം മോഹന്‍ലാല്‍ അറിയിച്ചിരുന്നു. ഇനി ആരൊക്കെ ആയിരിക്കും പുറത്തുപോവുക എന്നറിയാനുള്ള ആകാംഷയിലാണ് പ്രേക്ഷകന്‍.

അതേസമയം ഈ ബിഗ് ബോസിന്റെ തുടക്കം മുതല്‍ തന്നെ മത്സരാര്‍ത്ഥികള്‍ തമ്മിലടി തുടങ്ങിയിരുന്നു. വൈല്‍ഡ് കാര്‍ഡ് എന്‍ട്രിയിലൂടെ റിയാസും വിനയും കൂടി ഷോയില്‍ എത്തിയതോടെ അഭിപ്രായവ്യത്യാസങ്ങളും വഴക്കും സ്ഥിരം സംഭവങ്ങളായി. ഇതിനിടെ ബിഗ് ബോസ് വീട്ടിലെ ശക്തമായ മത്സരാത്തി റോബിന്‍ പുറത്തേക്ക് പോവുകയും ചെയ്തു. ബിഗ് ബോസിലെ നിയമം തെറ്റിച്ചതിന് പിന്നാലെയാണ് റോബിനെ പുറത്താക്കിയത്. മറ്റൊരു മത്സരത്തില്‍ ജാസ്മിന്‍ സ്വന്തം ഇഷ്ടപ്രകാരമാണ് പുറത്തേക്ക് പോയത്.

ഏറ്റവുമൊടുവില്‍ ലക്ഷ്മിപ്രിയയും റിയാസും തമ്മിലായിരുന്നു ഏറ്റവും കൂടുതല്‍ വഴക്ക് നടന്നത്. പലപ്പോഴും സഹ മത്സരാര്‍ത്ഥികളും ഇവരുടെ പ്രശ്‌നങ്ങളില്‍ ഇടപെടേണ്ടി വന്നിട്ടുണ്ട്. കഴിഞ്ഞ ദിവസം മോഹന്‍ലാല്‍ പരസ്പരം ആരെയെങ്കിലും മുറിവേല്‍പ്പിച്ചിട്ടുണ്ടെങ്കില്‍ ക്ഷമ ചോദിക്കാനുള്ള അവസരം അവര്‍ക്ക് നല്‍കിയിരുന്നു.

ഇതില്‍ ലക്ഷ്മിപ്രിയ റിയാസിന്റെ പേരാണ് പറഞ്ഞത്. റിയാസിന്റെ സംസാരശൈലിയെ ലക്ഷ്മി മുന്‍പ് പരിഹസിച്ചിരുന്നു. ചിലര്‍ക്ക് ജന്മനാ ഉള്ള തകരാറ് ആണെന്നും പറഞ്ഞിരുന്നു. എന്നാല്‍ താന്‍ മോശമായൊന്നും ഉദ്ദേശിച്ചല്ല അങ്ങനെ പറഞ്ഞതെന്നും സ്‌റ്റൈലൈസ്ഡ് ആയി സംസാരിക്കുന്ന ആളാണ് റിയാസ് എന്നും അതിനെയാണ് കളിയാക്കിയതെന്നും ലക്ഷ്മി പറഞ്ഞു. ഏതെങ്കിലും തരത്തില്‍ മനസിനെ വേദനിപ്പിച്ചിട്ടുണ്ടെങ്കില്‍ തന്നോട് ക്ഷമിക്കണമെന്നും ലക്ഷ്മി പറഞ്ഞു. ഇരുവരും കണ്ണീരണിഞ്ഞ് ആശ്ലേഷിച്ച കാഴ്ച മറ്റു മത്സരാര്‍ഥികള്‍ക്കും മറക്കാനാവാത്ത ഒന്നായി മാറി.