സാംസ്കാരിക കേരളവും അതിന്റെ നടത്തിപ്പുക്കാരും ഇപ്പോൾ ഒരു ഫണ്ട് നോക്കി യന്ത്രമാണ്: നടൻ മുരളിയുടെ പ്രതിമ വിവാദത്തിൽ വിമർശനവുമായി ഹരീഷ് പേരടി

കോഴിക്കോട്: നടൻ മുരളിയുടെ പ്രതിമ വിവാദത്തിൽ കേരള സം​ഗീത നാടക അക്കാദമിയെ വിമർശിച്ച് നടൻ ഹരീഷ് പേരടി.

പ്രതിമകളില്ലാതെ തന്നെ ജന മനസ്സുകളിൽ ഇപ്പോഴും നിറഞ്ഞാടുന്ന പ്രതിഭയാണ് മുരളി.ഈ പ്രതിഭയെ നിങ്ങൾക്ക് അഴിമതി നടത്താൻ വേണ്ടി പ്രതിമകളാക്കി അപമാനിക്കാതിരിക്കുക എന്ന് ഹരീഷ് സോഷ്യൽ മീഡിയയിൽ കുറിച്ചു.

സാംസ്കാരിക കേരളവും അതിന്റെ നടത്തിപ്പുക്കാരും ഇപ്പോൾ ഒരു ഫണ്ട് നോക്കി യന്ത്രവും ശിൽപ്പികൾ അതിന്റെ ഇരകളുമാണെന്നും ഹരീഷ് പേരടി ഫേസ്ബുക്കിലെഴുതിയ കുറിപ്പിലൂടെ വിമർശിച്ചു.

ഹരീഷ് പേരടിയുടെ കുറിപ്പ് –

പ്രതിമകളില്ലാതെ ജന മനസ്സുകളിൽ ഇപ്പോഴും നിറഞ്ഞാടുന്ന ഈ പ്രതിഭകളെ നിങ്ങൾക്ക് അഴിമതി നടത്താൻ വേണ്ടി അവരെ പ്രതിമകളാക്കി അപമാനിക്കാതിരിക്കുക…അതിനുള്ള ബഹുമാനം അവർ അർഹിക്കുന്നു…ഗുരുക്കൻമാരെ ക്ഷമിക്കുക…സാംസ്കാരിക കേരളവും അതിന്റെ നടത്തിപ്പുക്കാരും ഇപ്പോൾ ഒരു ഫണ്ട് നോക്കി യന്ത്രമാണ്…ശിൽപ്പികൾ അതിന്റെ ഇരകളും..🙏🙏🙏

നടൻ മുരളിയുടെ അർധകായ വെങ്കല പ്രതിമ നിർമ്മിക്കുന്നതിൽ പിഴവു വരുത്തിയെന്ന് കാണിച്ച് ശിൽപിക്കു നൽകിയ തുക എഴുതിത്തളളി ധനവകുപ്പ് ഉത്തരവിറക്കിയതിന് പിന്നാലെയാണ് വിവാദം പുറത്തുവരുന്നത്. 5.70 ലക്ഷം രൂപയാണ് ധനവകുപ്പ് എഴുതിത്തളളിയത്.

സം​ഗീത നാടക അക്കാദമിയിൽ സ്ഥാപിച്ച പ്രതിമക്ക് മുരളിയുമായി രൂപസാദൃശ്യമില്ലെന്ന ആക്ഷേപം ഉയർന്നതിന് പിന്നാലെയായിരുന്നു സർക്കാർ നടപടി.

അതേസമയം പ്രതിമ വിവാദത്തിന് പിന്നിൽ കേരള സം​ഗീത നാടക അക്കാദമിയാണെന്ന് ആരോപിച്ച് ശിൽപി വിൽസൺ പൂക്കായി രം​ഗത്തെത്തിയിരുന്നു. താൻ നിർമ്മിച്ച മുരളിയുടെ പ്രതിമയുടെ ചിത്രമല്ല മാധ്യമങ്ങളിലൂടെ പ്രചരിക്കുന്നത്.

ലളിത കലാ അക്കാദമിയുമായി ബന്ധപ്പെട്ടവരാണ് വിവാദങ്ങൾക്ക് പിന്നിൽ. കൈക്കൂലി ചോ​ദിച്ചപ്പോൾ കൊടുക്കാത്തതാണ് പ്രശ്നങ്ങൾക്ക് കാരണമെന്നും വിൽസൺ പൂക്കായി ആരോപിച്ചിരുന്നു.

താൻ നിർമ്മിക്കുന്ന മുരളിയുടെ പ്രതിമയുടെ നിർമ്മാണം പൂർത്തിയായിട്ടില്ല.അക്കാദമിക്ക് മുൻപിലുളള മറ്റൊരു ശിൽപത്തിന്റെ ചിത്രമാണ് മാധ്യമങ്ങളിലൂടെ പ്രചരിച്ചത് എന്നും ശില്പി പറഞ്ഞിരുന്നു.