വയനാട്ടിലെ രാഹുല് ഗാന്ധിയുടെ ഓഫിസില് നടന്ന എസ്.എഫ്.ഐ ആക്രമണത്തിന് പിന്നാലെ ഗാന്ധിചിത്രം തകര്ത്ത സംഭവത്തില് കോണ്ഗ്രസ് പ്രവര്ത്തകര് അറസ്റ്റില്. രാഹുല് ഗാന്ധിയുടെ പേഴ്സണല് അസിസ്റ്റന്റ് അടക്കം നാല് കോണ്ഗ്രസ് പ്രവര്ത്തകരാണ് അറസ്റ്റിലായിരിക്കുന്നത്. ചിത്രം തകര്ത്തത് കോണ്ഗ്രസ് പ്രവര്ത്തകരാണെന്നാണ് പൊലീസ് പറയുന്നത്.
രാഹുല് ഗാന്ധി എം.പിയുടെ ഓഫിസിലെ പേഴ്സണല് അസിസ്റ്റന്റ് രതീഷ് കുമാര്, ഓഫിസ് സ്റ്റാഫ് രാഹുല് എസ്. രവി, കോണ്ഗ്രസ് പ്രവര്ത്തകരായ നൗഷാദ്, മുജീബ് എന്നിവരാണ് അറസ്റ്റിലായത്. മണിക്കൂറുകള് നീണ്ട ചോദ്യം ചെയ്യലിനൊടുവിലാണ് ഇവര് അസ്റ്റിലായത്. ചോദ്യംചെയ്യലിനായി ബുധന്, വ്യാഴം ദിവസങ്ങളില് ഹാജരാകാനായി ഇവര്ക്ക് നേരത്തെ നോട്ടിസ് നല്കിയിരുന്നു. തുടര്ന്നാണ് ഇന്നു രാവിലെ കല്പറ്റ പൊലീസ് സ്റ്റേഷനില് ഇവര് ഹാജരായത്.
രാഹുല് ഗാന്ധിയുടെ വയനാട് കല്പറ്റയിലെ എംപി ഓഫിസ് ആക്രമണ കേസില് കോണ്ഗ്രസ് പ്രവര്ത്തകരെ പ്രതിക്കൂട്ടിലാക്കിയുള്ളതായിരുന്നു എസ്പിയുടെ റിപ്പോര്ട്ട്. ഓഫിസിലെ ചുവരില് തൂക്കിയിരുന്ന മഹാത്മാ ഗാന്ധിയുടെ ചിത്രം തകര്ത്തത് എസ്എഫ്ഐ പ്രവര്ത്തകരല്ലെന്നായിരുന്നു റിപ്പോര്ട്ടില് വ്യക്തമാക്കിയത്. പൊലീസ് ഫോട്ടോഗ്രാഫറുടെ ഫോട്ടോയും മൊഴിയുമായിരുന്നു പ്രധാന തെളിവ്. എസ്എഫ്ഐ പ്രവര്ത്തകര് എംപി ഓഫിസില് എംപിയുടെ കസേരയില് വാഴവയ്ക്കുന്ന സമയത്ത് രാഹുല് ഗാന്ധിയുടെ ചിത്രം ചുമരിലുണ്ടായിരുന്നു. അതിനുശേഷം ചിത്രം ആദ്യം തറയില് കാണുന്നത് കമഴ്ത്തിയിട്ട നിലയിലായിരുന്നു. എം പി ഓഫിസില് അതിക്രമിച്ച് കയറിയ എസ്എഫ്ഐ പ്രവര്ത്തകര് ഗാന്ധി ചിത്രം നശിപ്പിച്ചുവെന്നായിരുന്നു കോണ്ഗ്രസ് പ്രവര്ത്തകര് ആരോപിച്ചത്.