ഡോണള്‍ഡ് ട്രംപിന്റെ വസതിയില്‍ എഫ്.ബി.ഐ റെയ്ഡ്

മുന്‍ അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ വസതിയില്‍ എഫ്.ബി.ഐ റെയ്ഡ്. ഫ്‌ളോറിഡയിലെ മാര്‍ അ ലാഗോ എസ്റ്റേറ്റിലാണ് എഫ്.ബി.ഐ ഏജന്റുമാര്‍ റെയ്ഡ് നടത്തുന്നത്. ട്രംപ് തന്നെയാണ് ഇക്കാര്യം അറിയിച്ചത്. തന്റെ എസ്റ്റേറ്റ് നിലവില്‍ എഫ്.ബി.ഐയുടെ അധീനതയിലാണെന്നും എന്തിന്റെ പേരിലാണ് റെയ്‌ഡെന്ന് തനിക്കറിയില്ലെന്നും ട്രംപ് പറഞ്ഞു.

ഇത് തികച്ചും അന്യായമാണ്. നീതിന്യായ വ്യവസ്ഥയുടെ ആയുധവത്ക്കരണമാണ്. 2024ലെ പ്രസിഡന്റ് സ്ഥാനത്തേക്ക് താന്‍ മത്സരിക്കരുതെന്ന് ആഗ്രഹമുള്ള തീവ്ര ഇടതുപക്ഷ ഡെമോക്രാറ്റുകളുടെ ആക്രമണമാണിതെന്നും ട്രംപ് പറഞ്ഞു. റെയ്ഡ് നടക്കുന്നുണ്ടെന്നോ എന്തിനാണ് റെയ്‌ഡെന്നോ എഫ്.ബി.ഐ വ്യക്തമാക്കിയിട്ടില്ല.

മാര്‍-എ-ലാഗോയിലേക്ക് അയച്ച രഹസ്യരേഖകള്‍ തെറ്റായി കൈകാര്യം ചെയ്യുന്നതുമായി ബന്ധപ്പെട്ട് ഏജന്റുമാര്‍ കോടതിയുടെ അംഗീകൃത തിരച്ചില്‍ നടത്തുകയാണെന്ന് അടുത്ത വൃത്തങ്ങളെ ഉദ്ധരിച്ച് ഒന്നിലധികം യു.എസ് മാധ്യമങ്ങള്‍ റിപ്പോര്‍ട്ട് ചെയ്യുന്നു. ഫെബ്രുവരിയില്‍ ട്രംപിന്റെ ഫ്‌ളോറിഡ എസ്റ്റേറ്റില്‍ നിന്ന് 15 പെട്ടി രേഖകള്‍ കണ്ടെടുത്തതായി നാഷണല്‍ ആര്‍ക്കൈവ്സ് വ്യക്തമാക്കിയിരുന്നു.