ബോളിവുഡിനെ രക്ഷിച്ച് മോഹന്‍ലാല്‍ ചിത്രത്തിന്റെ ഹിന്ദി റീമേക്ക്; നാല് ദിവസം കൊണ്ട് ദൃശ്യം 75 കോടി ക്ലബ്ബില്‍, മലയാളം ദൃശ്യം തീയറ്ററില്‍ എത്തിയിരുന്നുവെങ്കില്‍ ചിത്രം 200 കോടി ക്ലബ്ബില്‍ കയറുമായിരുന്നുവെന്ന് ആരാധകര്‍

മോഹന്‍ലാല്‍-ജീത്തു ജോസഫ് കൂട്ടുകെട്ടില്‍ എത്തിയ ദൃശ്യം2 സിനിമയുടെ ഹിന്ദി റീമേക്ക് കഴിഞ്ഞ ദിവസമാണ് തീയറ്ററില്‍ എത്തിയത്. അജയ് ദേവ്ഗണിനെ കേന്ദ്രകഥാപാത്രമാക്കി അഭിഷേക് പതക് ആണ് ഹിന്ദി പതിപ്പ് സംവിധാനം ചെയ്തിരിക്കുന്നത്.

റിലീസ് ചെയ്ത ആദ്യ ദിനം മുതല്‍ മികച്ച പ്രതികരണമാണ് ചിത്രം നേടുന്നത്. തകര്‍ന്ന് അടിഞ്ഞു കൊണ്ടിരിക്കുന്ന ബോളിവുഡ് ഇന്‍ഡസ്ട്രിയുടെ രക്ഷകനാണ് ദൃശ്യം 2 എന്നാണ് ആരാധകര്‍ പറയുന്നത്. കാരണം ബോക്‌സ് ഓഫീസില്‍ മികച്ച നേട്ടമാണ് ചിത്രം നേടുന്നത്.

നാലാം ദിനം തന്നെ ചിത്രം 75 കോടി ക്ലബ്ബില്‍ ഇടം പിടിച്ചിരിക്കുകയാണ്. നാല് ദിവസത്തെ കണക്ക് എടുക്കുമ്പോള്‍ ചിത്രം 76.01 കോടി രൂപയാണ് നേടിയിരിക്കുന്നത്. ട്രേഡ് അനലിസ്റ്റായ തരണ്‍ ആദര്‍ശ് ആണ് ഇക്കാര്യം റിപ്പോര്‍ട്ട് ചെയ്തിരിക്കുന്നത്.

ചിത്രം ഇറങ്ങി ആദ്യ ദിവസം 15.38 കോടി രൂപയാണ് നേടിയത്. ഇതോടെ 2022ലെ ഹിന്ദി സിനിമകളില്‍ ഏറ്റവും മികച്ച ആദ്യദിന കളക്ഷന്‍ നേടുന്ന രണ്ടാമത്തെ ചിത്രമെന്ന ഖ്യാതിയാണ് ദൃശ്യം 2വിന് സ്വന്തമായത്.

രണ്ടാം ദിവസം പിന്നീടുമ്പോള്‍ 21.59 കോടി രൂപയാണ് ചിത്രം നേടിയത്. ഞായര്‍- 27.17 കോടി, തിങ്കള്‍- 11.87 കോടി എന്നിങ്ങനെയാണ് ചിത്രം ഇതുവരെ ഓരോ ദിവസവും നേടിയ കണക്ക്.

ഇങ്ങനെയെങ്കില്‍ ചിത്രം ഉടനെ തന്നെ 100 കോടിയിലേക്ക് കുതിച്ച് കയറുമെന്നാണ് അനലിസ്റ്റുകളുടെ പ്രവചനം. ബോളിവുഡിന്റെ സമീപകാലത്തെ ഏറ്റവും വലിയ വിജയങ്ങളിലൊന്നാവും ചിത്രമെന്നാണ് ട്രേഡ് അനലിസ്റ്റുകളുടെ വിലയിരുത്തല്‍.

ശ്രിയ ശരണ്‍, തബു, ഇഷിത ദത്ത, മൃണാള്‍ യാദവ്, രജത് കപൂര്‍, അക്ഷയ് ഖന്ന എന്നിവരാണ് പ്രധാന കഥാപാത്രങ്ങള്‍. സുധീര്‍ കെ ചൗധരിയാണ് ചിത്രത്തിന്റെ ഛായാഗ്രാഹണം നിര്‍വഹിച്ചിരിക്കുന്നത്. ഭുഷന്‍ കുമാര്‍, കുമാര്‍ മങ്കട് പതക്, അഭിഷേക് പതക്, കൃഷന്‍ എന്നിവരാണ് ചിത്രം നിര്‍മിച്ചിരിക്കുന്നത്.