ഭര്‍ത്താവ് വീട്ടിലുണ്ടായിരുന്നപ്പോള്‍ ജോണ്‍ ബിനോയ് ഉപദ്രവിക്കാന്‍ ശ്രമിച്ചു; ഭര്‍ത്താവിന്റെ വീട്ടില്‍ നിന്ന് ഇറങ്ങിയത് അങ്ങനെയെന്ന് ഡിക്‌സി

കൊച്ചിയില്‍ ഒന്നരവയസുകാരിയെ കൊലപ്പെടുത്തിയ ജോണ്‍ ബിനോയ്‌ക്കെതിരെ കുഞ്ഞിന്റെ അമ്മ ഡിക്‌സി രംഗത്ത്. ജോണ്‍ ബിനോയ് ഉപദ്രവിക്കാന്‍ ശ്രമിച്ചതോടെയാണ് ഭര്‍ത്താവിന്റെ വീടുവിട്ടിറങ്ങിയതെന്ന് ഡിക്‌സി പറഞ്ഞു. ഭര്‍ത്താവ് വീട്ടില്‍ ഉണ്ടായിരുന്ന സമയത്താണ് സംഭവം നടന്നത്. അടുക്കളയില്‍ നിന്നിരുന്ന തന്റെയടുത്തേക്ക് ജോണ്‍ ബിനോയ് വാതില്‍ ചവിട്ടിത്തുറന്ന് കടന്നുവരികയായിരുന്നുവെന്ന് ഡിക്‌സി പറഞ്ഞു.

ബഹളം കേട്ട് നാട്ടുകാര്‍ ഓടിക്കൂടി. ഭര്‍ത്താവിനോട് ഇതേപ്പറ്റി ചോദിച്ചപ്പോള്‍ അതേപ്പറ്റി അറിയില്ലെന്നും ഉറങ്ങുകയായിരുന്നുവെന്നുമാണ് പറഞ്ഞത്. ആ സംഭവത്തിന് ശേഷമാണ് ഭര്‍ത്താവിന്റെ വീട്ടില്‍ നിന്ന് കറുകുറ്റിയിലെ സ്വന്തം വീട്ടിലേക്ക് പോയതെന്നും ഡിക്‌സി പറഞ്ഞു.

ആ സംഭവത്തിന് ശേഷം ഭര്‍ത്താവുമായി കുറച്ചു നാള്‍ വാടകയ്ക്ക് താമസിച്ചു. രണ്ട് മാസം വാടകയ്ക്ക് താമസിച്ചപ്പോളും വാടക നല്‍കിയത് തന്റെ സ്വന്തം അമ്മ മേഴ്‌സിയാണ്. സജീവ് എടുത്ത രണ്ട് വായ്പകളുടെ ഗഡുക്കളും അടച്ചത് അമ്മയാണ്. വിദേശത്തേക്ക് പോകുന്നതിന് തടസമാകുമെന്ന് കരുതിയാണ് വിവാഹമോചനത്തിന് കേസ് കൊടുക്കാത്തത്. ഡിസംബറില്‍ വിദേശത്തേക്ക് പോയി. അതിന് ശേഷം തന്റെ വീട്ടില്‍ നിന്നിരുന്ന കുഞ്ഞുങ്ങളെ ഭര്‍ത്താവിന്റെ വീട്ടിലേക്ക് കൊണ്ടുപോയെന്നും ഡിക്‌സി പറഞ്ഞു.