‘ ഇവന് കഴിവൊന്നുമില്ല, ആളുകളെ സോപ്പിടാൻ മാത്രം അറിയുന്ന ഒരു നസ്രാണിയാണ് അവൻ. അവൻറെ വർത്തമാനത്തിൽ നിങ്ങൾ വീഴരുത്.’ ഇങ്ങനെയൊക്കെയാണ് അയാൾ തന്നെക്കുറിച്ച് മമ്മൂട്ടിയോട് പറഞ്ഞത്. വെളിപ്പെടുത്തലുമായി സംവിധായകൻ ലാൽ ജോസ്.

മലയാളത്തിലെ പ്രശസ്ത സംവിധായകരിൽ ഒരാളാണ് ലാൽ ജോസ്. ഒരുപാട് സൂപ്പർ ഹിറ്റ് ചിത്രങ്ങൾ ലാൽ ജോസ് സംവിധാനം ചെയ്തിട്ടുണ്ട്. കമലിൻ്റെയും, ലോഹിതദാസിൻ്റെയും സംവിധാനസഹായിയായി താരം ജോലി ചെയ്തിട്ടുണ്ട്. പിന്നീട് സംവിധായകനായി മികച്ച രീതിയിൽ കഴിവ് തെളിയിക്കാനും ലാൽജോസിന് കഴിഞ്ഞു.

ലാൽജോസിൻറെ ആദ്യ സംവിധാന സംരംഭം ആയിരുന്നു മറവത്തൂർ കനവ് എന്ന ചിത്രം. മമ്മൂട്ടി നായകനായി അഭിനയിച്ച ഈ ചിത്രം സൂപ്പർഹിറ്റായിരുന്നു. ശ്രീനിവാസനായിരുന്നു ചിത്രത്തിൻറെ തിരക്കഥ ഒരുക്കിയത്. ഇപ്പോൾ ആ സിനിമയ്ക്ക് പിന്നിലെ കഥകളെക്കുറിച്ച് പറയുകയാണ് ലാൽജോസ്. തനിക്കെതിരെ മമ്മൂട്ടിക്ക് ആരോ ഊമ കത്തയച്ച കാര്യമാണ് ഇദ്ദേഹം പറയുന്നത്.

ലാൽജോസിൻ്റെ വാക്കുകളിലൂടെ. ചെന്നൈയിൽ ഭൂതക്കണ്ണാടി എന്ന ചിത്രത്തിൻറെ ഡബ്ബിങ് ജോലികൾ നടക്കുകയായിരുന്നു. അതിനിടയിലാണ് ഞാൻ മമ്മൂക്കയുടെ വീട്ടിലേക്ക് പോകുന്നത്. ബാബി എന്നാണ് ഞാൻ ഇക്കയുടെ ഭാര്യയെ അഭിസംബോധന ചെയ്യാറ്. അവിടെ ചെന്നപ്പോൾ ബാബി എന്നോട് ചോദിച്ചു ഒരുപാട് സുഹൃത്തുക്കൾ ഉണ്ടല്ലോ എന്ന്. ഞാൻ ഉണ്ടെന്നും പറഞ്ഞു. അങ്ങനെ ചോദിക്കാനുള്ള കാര്യവും ആരാഞ്ഞു. അപ്പോഴാണ് ബാബി ഒരു കത്ത് കൊണ്ട് തരുന്നത്.

അത് ഞാൻ തുറന്ന് വായിച്ചു. മമ്മൂക്കയ്ക്ക് ആരോ അയച്ചു കൊടുത്ത ഒരു കത്തായിരുന്നു അത്. അതിൽ പറഞ്ഞിരുന്നത് ഇങ്ങനെയായിരുന്നു. കമലിൻ്റെ ചിത്രങ്ങൾ കമലിന് പ്രതിഭയുള്ളതുകൊണ്ടാണ് ഹിറ്റായത്. അത് ജോസിൻ്റെ കഴിവല്ല. നിങ്ങളെപ്പോലെയുള്ള ഒരു നടൻ അയാളുടെ വാക്ക് വിശ്വസിക്കരുത്. അവന് യാതൊരു വിധ കഴിവും ഇല്ല. സ്കൂളിലും കോളേജിലും പഠിക്കുമ്പോൾ പോലും കലാകാരനാണെന്ന് തെളിയിക്കാൻ അവന് കഴിഞ്ഞിട്ടില്ല. ചുരുക്കിപ്പറഞ്ഞാൽ തൻറെ സിനിമയിൽ അഭിനയിക്കരുത് എന്നായിരുന്നു അതിൽ. അതു വായിച്ചപ്പോൾ എനിക്കൊരുപാട് വിഷമമായി. തനിക്ക് ശത്രുക്കളുണ്ടെന്ന് ഒന്നും അറിയില്ലായിരുന്നു. അതാരാണ് എഴുതിയത് എന്നും അറിയില്ല. എൻറെ വിഷമം കണ്ടു ബാബിയോട് മമ്മൂക്ക ചോദിച്ചു എന്തിനാണ് അവന് കത്ത് കൊടുത്തതെന്ന്. ഇങ്ങനെയുള്ള ആളുകൾ ലോകത്തുണ്ടെന്ന് ഇവൻ അറിയണമെന്ന് ബാബി പറഞ്ഞു. ആ കത്ത് താൻ സൂക്ഷിച്ചു വെച്ചിട്ടുണ്ടെന്നും ലാൽജോസ് കൂട്ടിച്ചേർത്തു.