എറണാകുളം : മാനവരാശിയെ വരിഞ്ഞു മുറക്കിയ കോവിഡ് 19 മഹാമാരിയുടെ പ്രതിരോധത്തിനുള്ള സന്ദേശവുമായ് കേരളാ പോലീസ് ഗ്ലോബൽ HR & EDUCATIONനുമായ് സഹകരിച്ച് ജാഗ്രതാ ഗാനം പുറത്തിറക്കി. ഉണരൂ എന്ന പേരിൽ പുറത്തിറക്കിയ ഈ വീഡിയോ ഗാനത്തിലൂടെ കൊറോണാ വൈറസ്സിൻ്റെ അതിസംക്രമണത്തിനെതിരേ പൊതുജനങ്ങൾ സ്വീകരിക്കേണ്ട മുൻകരുതലുകളും, പാലിക്കേണ്ട ശുചിത്വ ശീലങ്ങളും, നിർദ്ദേശങ്ങളും കൃത്യമായ് വിവരിച്ചു കാണിച്ചുതരുന്നു. ലോക് ഡൗൺ കാലത്ത് ഓരോരുത്തരം വീട്ടിൽത്തന്നെ തുടരേണ്ടതിൻ്റെ ആവശ്യകതയെ കൃത്യമായ് ജനങ്ങളിൽ എത്തിക്കുന്നതിന് ഈ ഗാനത്തിൽ സന്ദേശങ്ങളുമായ് പ്രശസ്തരായ ചലച്ചിത്ര താരങ്ങളും, ഉന്നത പോലീസ് അധികാരികളും, ആരോഗ്യ വകുപ്പ് പ്രവർത്തകരും അണിനിരന്നിരിക്കുന്നു.
ഷീ മീഡിയാസ്സിൻ്റെ ബാനറിൽ പുറത്തിറക്കിയ ഈ ഗാനത്തിൻ്റെ സംവിധാനം എറണാകുളം സെൻട്രൽ പോലീസ് സ്റ്റേഷൻ CPO യായ സലീഷ് കരിക്കനാണ്. എറണാകുളം സെൻട്രൽ പോലീസ് സീനിയർ CPO മനോജ്കുമാർ കാക്കൂരിൻ്റ വരികൾക്ക് ശരത് മോഹൻ സംഗീതം നൽകി, എറണാകുളം സെൻട്രൽ സി.ഐ. എസ് വിജയശങ്കറും, ബിനാനിപുരം എസ്.ഐ. സലീം പി.കെ യും ചേർന്ന് ഈ ഗാനം ആലപിച്ചിരിക്കുന്നു. വിനോദ് ആദിത്യ ക്യാമറയും, അരുൺ രാജൻ, അരുൺ അശോക് എന്നിവർ ചേർന്ന് എഡിറ്റിംഗും, ലതീബ് ഓർക്കസ്ട്രേഷനും, മനു മോഹൻ ഡിസൈനും നിർവ്വഹിച്ചിരിക്കുന്ന ഈ ഗാനത്തിൽ പ്രശസ്ത ചലച്ചിത്ര താരങ്ങളായ ഹരിശ്രീ അശോകൻ, വിഷ്ണു ഉണ്ണികൃഷ്ണൻ, ബിബിൻ ജോർജ്ജ്, സുധീ കോപ്പ, മാനസ രാധാകൃഷ്ണൻ എന്നിവരും സഹകരിച്ചിരിക്കുന്നു.
സ്റ്റേറ്റ് പോലീസിൻ്റെ ഒഫീഷ്യൽ പേജിൽ റിലീസ് ചെയ്ത ഈ ഗാനത്തിന് സമൂഹ മാധ്യമങ്ങളിൽ വൻ സ്വീകാര്യതയാണ് ലഭിക്കുന്നത്. റിലീസ് ചെയ്ത് മണിക്കൂറുകൾക്കുള്ളിൽ ആയിരത്തിലധികം ഷെയറുകളും, ഇരുപതിനായിരത്തിലധികം ലൈക്കുകളുമാണ് ഈ ഗാനത്തിന് ലഭിച്ചിരിക്കുന്നത്.