തലമുറമാറ്റം എന്നൊന്നും പറഞ്ഞ് നിസാരവത്ക്കരണം വേണ്ട, വൃത്തികെട്ട പുരുഷാധിപത്യം എന്ന് പച്ചക്ക് പറയാം; കെകെ ശൈലജയെ ആരോഗ്യമന്ത്രിയായി ഉള്‍പ്പെടുത്താത്തതില്‍ പ്രതികരിച്ച് നടി രേവതി സമ്പത്ത്

രണ്ടാം പിണറായി സര്‍ക്കാരിന്റെ മന്ത്രിസഭയില്‍ കെ.കെ ശൈലജയെ ആരോഗ്യമന്ത്രിയായി ഉള്‍പ്പെടുത്താത്തതില്‍ സോഷ്യല്‍ മീഡിയ വഴി പ്രതിഷേധം ശക്തമാവുകയാണ്. ഇതിനോടകം നിരവധിപേരാണ് തീരുമാനത്തെ എതിര്‍ത്ത് രംഗത്ത് വന്നത്. ജനങ്ങളുടെ പ്രതീക്ഷ തെറ്റിച്ചുകൊണ്ടായിരുന്നു സര്‍ക്കാരിന്റെ തീരുമാനം. ഇതിനോടകം സിനിമാ താരങ്ങളും വിഷയത്തില്‍ ശക്തമായി പ്രതികരിച്ചു. ഇപ്പോള്‍ നടി രേവതി സമ്പത്ത് ആണ് ഇതില്‍ സോഷ്യല്‍ മീഡിയ വഴി പ്രതികരിച്ചത്.

‘തലമുറമാറ്റം’ എന്നൊന്നും പറഞ്ഞ് നിസാരവത്ക്കരണം വേണ്ട. വൃത്തികെട്ട പുരുഷാധിപത്യം എന്ന് പച്ചക്ക് പറയാം, അല്ലാതെ മറ്റ് നിസാരവത്കരണം ആവശ്യം ഇല്ല. ശൈലജ ടീച്ചറിന്റെ ഭരണമികവില്‍ അസ്വസ്തമായതും പേടിക്കുന്നതും പ്രതിപക്ഷം മാത്രം അല്ല,ഭരണപക്ഷം കൂടെ ആണ്..രണ്ടിലെയും ആണ്‍ബോധങ്ങള്‍ ഒന്ന് തന്നെ… ‘പെണ്ണിനെന്താ കുഴപ്പം’എന്ന അടി വീണത് എവിടെയൊക്കെയാണെന്ന് ഇതില്‍ നിന്നും വ്യക്തം. രേവതി ഫേസ്ബുക്കില്‍ എഴുതിയ കുറിപ്പില്‍ പറയുന്നു.

അതേസമയം ഈ വിഷയത്തില്‍ പ്രതികരണം അറിയിച്ച് ഗായിക സിത്താര കൃഷ്ണകുമാറും രംഗത്ത് വന്നിരുന്നു. ശൈലജ ടീച്ചറെ ആരോഗ്യമന്ത്രിയായി നിര്‍ത്താത്തതില്‍ നിരാശയുണ്ടെന്നത് സിത്താരയുടെ വാക്കുകളില്‍ നിന്നും വ്യക്തമാണ്. ഈ സാഹചര്യത്തില്‍ ടീച്ചറുള്ളത് ഒരു ധൈര്യമായിരുന്നെന്നും 5 വര്‍ഷത്തെ പരിചയം ചെറുതല്ലെന്നും സിത്താര കൃഷ്ണകുമാര്‍ പറഞ്ഞു. ടീച്ചറില്ലാത്തതില്‍ കടുത്ത നിരാശ, പുതിയ മന്ത്രിസഭക്ക് ആശംസകളും സിത്താര നേര്‍ന്നിരുന്നു.

അതേസമയം പുതിയ മന്ത്രിസഭ തീരുമാനത്തില്‍ മുഖ്യമന്ത്രി പിണറായി വിജയന്‍ ഒഴികെ ബാക്കിയെല്ലാവരും പുതുമുഖങ്ങളാണ്. എംവി ഗോവിന്ദന്‍, കെ. രാധാകൃഷ്ണന്‍, കെഎന്‍ ബാലഗോപാല്‍, പി. രാജീവ്, വി. ശിവന്‍കുട്ടി, വീണ ജോര്‍ജ്, ആര്‍. ബിന്ദു, സജി ചെറിയാന്‍, വി. അബ്ദുറഹ്‌മാന്‍, മുഹമ്മദ് റിയാസ് എന്നിവരാണ് മന്ത്രിമാരുടെ പട്ടികയില്‍ ഉള്‍പ്പെട്ടത്. ഇവരുടെ വകുപ്പുകള്‍ തീരുമാനിച്ചിട്ടില്ല.