മാമാങ്കം സിനിമയിലൂടെ ശ്രദ്ധിക്കപ്പെട്ട നടി പ്രാചി തെഹ്ലാന്റെ കാര്‍ പിന്തുടര്‍ന്നെത്തി അസഭ്യം പറച്ചില്‍, സംഭവത്തില്‍ നാലുപേരെ പോലീസ് അറസ്റ്റ് ചെയ്തു

മാമാങ്കം സിനിമയിലൂടെ മലയാളികളുടെ പ്രിയങ്കരിയായ നടി പ്രാചി തെഹ്ലാന്റെ കാര്‍ പിന്തുടര്‍ന്നെത്തി അസഭ്യം വിളിച്ച് പറഞ്ഞ നാലുപേരെ പോലീസ് അറസ്റ്റ് ചെയ്തു. ചൊവ്വാഴ്ച പുലര്‍ച്ചെ പ്രാചി ഭര്‍ത്താവ് രോഹിതിനോടൊപ്പം വീട്ടിലേക്ക് വരുന്നതിനിടെയാണ് സംഭവം. ഡല്‍ഹി രോഹിണിയില്‍ പ്രാചിയുടെ കാറിനെ പിന്തുടര്‍ന്ന് നാലംഗ സംഘം എത്തുകയായിരുന്നു.

കാര്‍ പിന്തുടര്‍ന്ന സംഘം വണ്ടി വീടിന് മുന്നില്‍ എത്തിയതോടെ നാലുപേര്‍ വന്ന് നടിയെ അസഭ്യം പറയുകയായിരുന്നു. തന്നെ അപമാനിച്ചതില്‍ പ്രാചി പോലീസില്‍ പരാതി നല്‍കി. സംഭവത്തിന് പിന്നാലെയാണ് പ്രതികളെ അറസ്റ്റ് ചെയ്തത്. സംഭവ സമയത്ത് നാലുപേരും നന്നായി മദ്യപിച്ചിരുന്നതായി പോലീസ് മാധ്യമങ്ങളോട് പറഞ്ഞിട്ടുണ്ട്.

മമ്മൂട്ടി ചിത്രത്തിലൂടെ നടി മലയാള സിനിമയിലേക്ക് വരുന്നത്. മാമാങ്കത്തിലെ ഉണ്ണിമായ എന്ന കഥാപാത്രം ഏറെ ശ്രദ്ധിക്കപ്പെട്ടിരുന്നു. ഹിന്ദി സീരിയല്‍ രംഗത്ത് നിന്നുമാണ് താരം സിനിമയിലേക്ക് എത്തിയത്. മലയാളത്തില്‍ ഒരു സിനിമയിലെ മുഖം കാണിച്ചുള്ളുവെങ്കിലും മികച്ച പ്രതികരണമാണ് ഉണ്ടായത്. ഒപ്പം മലയാളത്തിലും ഒരുപാട് ആരാധകരെ സ്വന്തമാക്കാന്‍ താരത്തിന് സാധിച്ചു. 2 പഞ്ചാബി സിനിമകളിലും താരം അഭിനയിച്ചിട്ടുണ്ട്.

അഭിനയത്തിന് പുറമെ ഇന്ത്യന്‍ നെറ്റ്ബോള്‍, ബാസ്‌കറ്റ്ബോള്‍ താരവും കൂടിയാണ് പ്രാചി. 2010ലെ കോമണ്‍വെല്‍ത്ത് ഗെയിംസിലും 2010-2011 ലെ മറ്റ് ഏഷ്യന്‍ ചാമ്പ്യന്‍ഷിപ്പിലും ഇന്ത്യയെ പ്രതിനിധീകരിച്ചുകൊണ്ട് ഇന്ത്യ നെറ്റ്ബോള്‍ ടീമിന്റെ ക്യാപ്റ്റനായി എത്തിയത് പ്രാചി ആയിരുന്നു