പത്തനംതിട്ട: റോബിന് ബസിനെതിരെ കടുത്ത നടപടിയുമായി മോട്ടോര് വാഹനവകുപ്പ്. തുടര്ച്ചയായി പെര്മിറ്റ് ലംഘിച്ച് സര്വീസ് നടത്തിയെന്ന് ആരോപിച്ച് മോട്ടര് വാഹന വകുപ്പ് റോബിന് ബസ് പിടിച്ചെടുത്തു.
വെള്ളിയാഴ്ച പുലര്ച്ചെ ഒന്നിന് കോയമ്പത്തൂരില് നിന്നും പത്തനംതിട്ടയിലേക്ക് മടങ്ങിയെത്തിയപ്പോഴാണ് വന് പൊലീസ് സന്നാഹത്തോടെ പിന്തുടര്ന്നെത്തി മോട്ടോര് വാഹന വകുപ്പിന്റെ നടപടി. ബസ് പത്തനംതിട്ട പൊലീസ് ക്യാംപിലേക്ക് മാറ്റി.
പെര്മിറ്റ് ലംഘിച്ചതിന് ബസിനെതിരെ മോട്ടോര് വാഹനവകുപ്പ് കേസെടുത്തു. ഹൈക്കോടതി ഉത്തരവ് തുടര്ച്ചയായി ലംഘിക്കും വിധം പെര്മിറ്റ് ലംഘനം നടത്തുന്നുവെന്ന് കാട്ടിയാണ് ബസ് പിടിച്ചെടുത്തത്.
ഇതിന് പുറമെ ഡ്രൈവര്മാരുടെ ലൈസന്സ് റദ്ദാക്കുന്നതിനുള്ള നടപടികളും മോട്ടര് വാഹന വകുപ്പ് സ്വീകരിച്ചിട്ടുണ്ട്. വെള്ളിയാഴ്ച പുലര്ച്ചെ ഏരുമേലിക്ക് സമീപവും ബസിന് 7,500 രൂപ പിഴചുമത്തിയിരുന്നു.
അതേസമയം സുപ്രീംകോടതി വിധി അനുകൂലമെന്ന ഉടമയുടെ വാദം തെറ്റെന്ന് മോട്ടര് വാഹന വകുപ്പ് ഉദ്യോഗസ്ഥര് വിശദീകരിക്കുന്നത്. ഇതിനു പുറമെ നിയമലംഘത്തിന് ആഹ്വാനം ചെയ്ത വ്ലോഗര്മാര്ക്കെതിരെയും നടപടിക്ക് നീക്കമുണ്ട്.
എന്നാല് കോടതി ഉത്തരവ് ലംഘിച്ച ഉദ്യോഗസ്ഥരുടെ നടപടി അന്യായമെന്ന് ബസ് നടത്തിപ്പുകാര് പ്രതികരിച്ചു.കോടതി ഉത്തരവിന്റെ ലംഘനമാണ് ഉദ്യോഗസ്ഥര് ചെയ്തതെന്നും റോബിന് ബസ് നടത്തിപ്പുകാര് വാദിച്ചു.