ചിരഞ്ജീവിയും രാംചരണ് തേജയും ഒന്നിച്ചെത്തിയ ചിത്രമാണ് ആചാര്യ. ഏപ്രില് 29ന് റിലീസ് ചെയ്ത ചിത്രത്തിന് ബോക്സോഫീസില് കാര്യമായ ചലനം സൃഷ്ടിക്കാനായില്ല. ഇപ്പോഴിതാ ചിത്രം വരുത്തിയ നഷ്ടം നികത്താനായി ചിരഞ്ജീവിയോട് സഹായാഭ്യര്ത്ഥന നടത്തിയിരിക്കുകയാണ് വിതരണക്കാരന്.
കര്ണാടകയിലെ റായ്ച്ചൂര് ജില്ലയിലെ വിതരണക്കാരനായ രാജഗോപാല് ബജാജാണ് ചിരഞ്ജീവിയോട് കത്ത് മുഖാന്തരം സഹ്യാഭ്യര്ത്ഥന നടത്തിയത്. സിനിമ പ്രതീക്ഷിച്ച രീതിയില് കളക്ഷന് നേടിയില്ലെന്നും തനിക്ക് വലിയ തോതില് നഷ്ടമുണ്ടായെന്നും അദ്ദേഹം ചിരഞ്ജീവിയ്ക്ക് അയച്ച കത്തില് പറയുന്നു. മുടക്ക് മുതലിന്റെ 25 ശതമാനം മാത്രമാണ് തങ്ങള്ക്ക് തിരിച്ചുപിടിക്കാന് സാധിച്ചത്. വലിയൊരു തുക കടമെടുത്താണ് സിനിമയില് നിക്ഷേപിച്ചത് എന്നും ഇപ്പോള് വലിയ തോതില് ബാധ്യതകളുണ്ടെന്നും അദ്ദേഹം പറയുന്നു.
കൊരടാല ശിവയാണ് ആചാര്യ സംവിധാനം ചെയ്തത്. പൂജ ഹെഗ്ഡെയാണ് ചിത്രത്തില് നായിക കഥാപാത്രത്തെ അവതരിപ്പിച്ചത്. സോനു സൂദ്, ജിഷു സെന്ഗുപ്ത, സൗരവ് ലോകോഷേ, കിഷോര് പൊസനി കൃഷ്ണ മുരളി, തനികെല്ല ഭരണി, അജയ്, സംഗീത് കൃഷ് തുടങ്ങി വന് താരനിരയാണ് ചിത്രത്തില് അണിനിരന്നത്.