ഡിവൈഎഫ്ഐ മേഖലാ സെക്രട്ടറി ഷിജിനും ജോയ്സ്നയും ഒളിച്ചോടി വിവാഹം കഴിച്ചതോടെ പ്രദേശത്തെ മതവികാരം വ്രണപ്പെട്ടുവെന്നത് സത്യമാണെന്ന് മുന് തിരുവമ്പാടി എംഎല്എ ജോര്ജ് എം. തോമസ്. കന്യാസ്ത്രീകള് പോലും പ്രതിഷേധവുമായി തെരുവിലിറങ്ങി. ഇത് പാര്ട്ടിക്ക് പ്രദേശത്ത് വലിയ പ്രശ്നമുണ്ടാക്കിയെന്നും ജോര്ജ് എം. തോമസ് പറഞ്ഞു. ലൗ ജിഹാദുമായി ബന്ധപ്പെട്ട് തന്റെ വാക്ക് തെറ്റായി വ്യാഖ്യാനിക്കപ്പെടുകയായിരുന്നു. ലൗ ജിഹാദ് എന്നൊന്നില്ലെന്നും ജോര്ജ് എം. തോമസ് തിരുത്തി.
മിശ്രവിവാഹത്തെ പാര്ട്ടി എന്നും അംഗീകരിക്കുന്നതാണ്. അവിടെയല്ല പ്രശ്നം. വിവാഹം കഴിക്കാന് തീരുമാനിച്ച കാര്യം ആദ്യം അവര് പാര്ട്ടിയെ അറിയിക്കണമായിരുന്നു. അങ്ങനെയെങ്കില് പാര്ട്ടി ഇടപെട്ട് കാര്യങ്ങള് ചെയ്യുമായിരുന്നു. ലൗ ജിഹാദ് വിഷയത്തില് പാര്ട്ടി സെക്രട്ടറി പറഞ്ഞതാണ് നയമെന്നും ജോര്ജ് എം. തോമസ് പറഞ്ഞു.
സമൂഹത്തില് ലൗ ജിഹാദ് നടക്കുന്നുണ്ടെന്നും സിപിഐഎമ്മിന്റെ പാര്ട്ടി രേഖകളില് ഇക്കാര്യം വ്യക്തമായി പറയുന്നുണ്ടെന്നും ജോര്ജ് എം. തോമസ് ഇന്നലെ പറഞ്ഞിരുന്നു. പ്രൊഫഷണല് കോളജുകളില് പഠിക്കുന്ന വിദ്യാസമ്പന്നരായ പെണ്കുട്ടികളെ മിശ്രവിവാഹത്തിന് പ്രേരിപ്പിക്കുന്നത് അപൂര്വമായി നടക്കുന്നുണ്ടെന്നും അദ്ദേഹം പറഞ്ഞിരുന്നു. ഇത് വിവാദമായിരുന്നു.