ഇന്ത്യൻ ടെസ്റ്റ് ടീം ക്യാപ്റ്റൻ സ്ഥാനം ഒഴിയാനുള്ള വിരാട് കോലിയുടെ തീരുമാനം വ്യക്തിപരമെന്ന് ബിസിസിഐ പ്രസിഡന്റ് സൗരവ് ഗാംഗുലി. ബിസിസിഐ അതിനെ വളരെയധികം ബഹുമാനിക്കുന്നുവെന്നും ഗാംഗുലി പറഞ്ഞു. കോലി സ്ഥാനമൊഴിഞ്ഞതിനോട് പ്രതികരിച്ചുള്ള ട്വീറ്റിലാണ് ഗാംഗുലി ഇക്കാര്യം വ്യക്തമാക്കിയത്.
വിരാടിന്റെ നേതൃത്വത്തിൽ ക്രിക്കറ്റിന്റെ എല്ലാ ഫോർമാറ്റിലും ഇന്ത്യൻ ക്രിക്കറ്റ് അതിവേഗമാണ് കുതിച്ചുയർന്നത്. ഭാവിയിൽ ടീമിനെ പുതിയ ഉയരങ്ങളിലേക്ക് കൊണ്ടുപോകുന്നതിൽ അദ്ദേഹം ഒരു പ്രധാന അംഗമായിരിക്കുമെന്നും ഗാംഗുലി പറഞ്ഞു.
ഇന്നലെയാണ് ടെസ്റ്റ് ടീം ക്യാപ്റ്റൻ സ്ഥാനം ഒഴിയുകയാണെന്ന് കോലി പ്രഖ്യാപിച്ചത്. ഇൻസ്റ്റഗ്രാമിലൂടെയായിരുന്നു പ്രഖ്യാപനം.