സ്ത്രീകളെ ഭയം; ഇവര്‍ കയറാതിരിക്കാന്‍ 15 അടി ഉയരത്തില്‍ മതില്‍, 55 വര്‍ഷമായി ഭയന്ന് സ്വന്തം വീട്ടില്‍ നിന്ന് പുറത്ത് ഇറങ്ങാത്ത 71 കാരന്‍

പാമ്പിനെ പേടി, എട്ടുകാലിയെ പേടി, പല്ലിയെ പേടി എന്നിങ്ങനെ പല പേടികളെ കുറിച്ചും നമ്മള്‍ കേട്ടിട്ടുണ്ടാകും. എന്നാല്‍ സ്ത്രീകളെ പേടി എന്ന് കേട്ടിട്ടുണ്ടോ.

എന്നാല്‍ അങ്ങനെയൊരു പേടിയുടെ വാര്‍ത്തയാണ് റുവാണ്ടയില്‍ നിന്നു കേള്‍ക്കുന്നത്. റുവാണ്ടയിലെ ഒരു 71 കാരനാണ് സ്ത്രീകളെ ഭയം. ഈ സ്ത്രീ ഭയം കാരണം 55 വര്‍ഷമായി ഇയാള്‍ വീട്ടില്‍ സ്വയം തടവില്‍ കഴിയുകയാണ്.

കാലിറ്റ്‌സെ സാംവിറ്റ എന്ന 71 കാരനാണ് 55 വര്‍ഷമായി വീട്ടില്‍ സ്വയം തടവില്‍ കഴിയുന്നത്. 16ാം വയസ്സിലാണ് ഇയാള്‍ക്ക് സ്ത്രീകളോട് ഭയം തുടങ്ങുന്നത്.

അന്ന് മുതല്‍ സ്ത്രീകളില്‍ നിന്നും അകന്ന് കഴിയുകയാണ് കാലിറ്റ്‌സെ.വീടിന് ചുറ്റും 15 അടി ഉയരത്തില്‍ വേലി കെട്ടി മറച്ചാണ് അദ്ദേഹം താമസിക്കുന്നത്.

ഗ്രാമത്തിലെ സ്ത്രീകളെ പുറത്തു കണ്ടാല്‍ സാംവിറ്റ ഓടി വീടിനകത്ത് കയറുകയാണ് പതിവ്. എല്ലാവരും പോയെന്ന് ഉറപ്പു വരുത്തിയതിന് ശേഷം മാത്രമാണ് പുറത്തിറങ്ങുക.

അതേസമയം സ്ത്രീകളെ ഭയമാണെങ്കിലും സ്ത്രീകള്‍ കാരണമാണ് അദ്ദേഹം ജീവിച്ചിരിക്കുന്നത് തന്നെ.

പ്രദേശത്തെ സ്ത്രീകള്‍ വീടിന്റെ മുറ്റത്തേക്ക് വലിച്ചെറിയുന്ന ഭക്ഷണ സാധനങ്ങള്‍ കഴിച്ചാണ് അദ്ദേഹം ജീവന്‍ നിലനിര്‍ത്തുന്നത്.

അതേസമയം കാലിറ്റ്‌സെ സാംവിറ്റയുടെ ഈ സ്ത്രീ പേടിക്ക് കാരണം ഒരു മാനസിക അവസ്ഥയാണ്. ‘ഗൈനോഫോബിയ’ എന്ന മാനസികാവസ്ഥ കൊണ്ടാണ് സാംവിറ്റ സ്ത്രീകളെ ഭയപ്പെടുന്നത്.

സ്ത്രീകളോടുള്ള അമിതമായ ഭയവും അവരെ കുറിച്ചുള്ള അതീവ ഉത്കണ്ഠയുമാണ് ഈ രോഗാവസ്ഥയ്ക്ക് കാരണം. പാനിക് അറ്റാക്ക്, അമിതമായി വിയര്‍ക്കല്‍, ശ്വസിക്കാന് ബുദ്ധിമുട്ട് തുടങ്ങിയവയാണ് ഗൈനോഫോബിയയുടെ ലക്ഷണങ്ങള്‍.