പാലക്കാട്ടെ ഇരട്ടക്കൊലപാതകത്തില് കര്ശന നടപടിയുമായി ജില്ലാ ഭരണകൂടം. ജില്ലയില് ഈ മാസം 20 വൈകീട്ട് ആറ് മണിവരെ നിരോധനാജ്ഞ പ്രഖ്യാപിച്ചു. ജില്ലാ കളക്ടറാണ് ഉത്തരവ് പുറപ്പെടുവിച്ചത്. ജില്ലാ പൊലീസ് റിപ്പോര്ട്ടിന്റെ അടിസ്ഥാനത്തിലാണ് നടപടി.
പൊതുസ്ഥലങ്ങളില് അഞ്ചോ അതിലധികമോ പേര് ഒത്തുചേരുന്നത് നിരോധിച്ചിട്ടുണ്ട്. പൊതുസ്ഥലങ്ങളില് യോഗങ്ങളോ, പ്രകടനങ്ങളോ, ഘോഷയാത്രകളോ പാടില്ല. ഊഹാപോഹങ്ങള് പരത്താന് ശ്രമിക്കരുത്. പ്രകോപന സന്ദേശങ്ങള് പ്രചരിപ്പിച്ചാല് കര്ശന നടപടിയുണ്ടാകുമെന്നും ഉത്തരവില് വ്യക്തമാക്കിയിട്ടുണ്ട്. അവശ്യസേവനങ്ങള്ക്കും ലോ എന്ഫോഴ്സ്മെന്റ് ഏജന്സികള്ക്കും നിര്ദേശം ബാധകമല്ലെന്ന് ഉത്തരവില് പറയുന്നു.
പാലക്കാട് നടന്ന കൊലപാതകങ്ങളെ തുടര്ന്ന് സമൂഹമാധ്യമങ്ങളിലൂടെ മതസ്പര്ദ്ധ വളര്ത്തുന്ന തരത്തില് പ്രചാരണം നടത്തുന്നവര്ക്കെതിരെ നിയമ നടപടി സ്വീകരിക്കുമെന്ന് ഡിജിപി അനില്കാന്ത് അറിയിച്ചു. സമൂഹമാധ്യമങ്ങളിലൂടെ വ്യാജപ്രചാരണം നടത്തുകയോ അക്രമ സംഭവങ്ങള്ക്ക് ആഹ്വാനം ചെയ്യുകയോ ചെയ്യുന്നവര്ക്ക് എതിരെ നിയമനടപടി സ്വീകരിക്കും. എല്ലാത്തരം സമൂഹമാധ്യമങ്ങളിലും 24 മണിക്കൂറും സൈബര് പട്രോളിംഗ് നടത്താന് സൈബര് ഡോം, ഹൈടെക് ക്രൈം എന്ക്വയറി സെല്, സൈബര് പൊലീസ് സ്റ്റേഷന് എന്നിവയ്ക്ക് നിര്ദേശം നല്കിയിട്ടുണ്ടെന്നും ഡിജിപി അറിയിച്ചു.