അപകടത്തില്‍ സുഹൃത്ത് മരിച്ച സംഭവം; നടി യാഷിക ആനന്ദിനെതിരെ വാറന്റ്

തമിഴ്‌നടി യാഷിക ആനന്ദിനെതിരെ വാറന്റ് പുറപ്പെടുവിച്ച് ചെങ്കല്‍പ്പട്ട് കോടതി. സുഹൃത്തിന്റെ മരണത്തിന് കാരണമായ തമിഴ്‌നാട്ടിലെ മഹാബലിപുരത്ത് വെച്ച് നടന്ന വാഹനാപകടക്കേസില്‍ ആണ് നടിക്ക് എതിരെ വാറന്റ് പുറപ്പെടുവിച്ചത്.

കേസുമായി ബന്ധപ്പെട്ട് ഈ മാസം 21ന് യാഷിക നേരിട്ട് ഹാജരാകാന്‍ ജഡ്ജി ഉത്തരവിട്ടെങ്കിലും അവര്‍ ഹാജരായില്ല. ഇതേ തുടര്‍ന്നാണ് നടിക്കെതിരെ വാറന്റ് പുറപ്പെടുവിച്ചത്.

സംഭവത്തില്‍ ഏപ്രില്‍ 25ന് യാഷിക ആനന്ദ് കോടതിയില്‍ ഹാജരായില്ലെങ്കില്‍ പൊലീസ് അറസ്റ്റ് ചെയ്യാന്‍ സാധ്യതയുണ്ടെന്നാണ് സൂചന.കഴിഞ്ഞ വര്‍ഷം ജൂലൈയിലായിരുന്നു കേസിന് അടിസ്ഥാനമായ അപകടമുണ്ടാകുന്നത്.

നടിയും സുഹൃത്തുക്കളും പുതുച്ചേരിയില്‍ നിന്നും ചെന്നൈയിലേക്ക് സഞ്ചരിക്കവേ കാര്‍ നിയന്ത്രണം വിട്ട് മീഡിയനില്‍ ഇടിക്കുകയായിരുന്നു. അപകടത്തില്‍ കൂടെ ഉണ്ടായിരുന്ന സുഹൃത്ത് മരണപ്പെട്ടിരുന്നു.

സംഭവ സ്ഥലത്ത് വച്ച് തന്നെ സുഹൃത്ത് മരണപ്പെടുകയായിരുന്നു. അപകടത്തില്‍ നടി ഗുരുതര പരിക്ക് പറ്റിയിരുന്നു.താരത്തിന് നട്ടെല്ലിന് ശസ്ത്രക്രിയയും നടത്തിയിരുന്നു. മാസങ്ങളുടെ വിശ്രമത്തിന് ശേഷമാണ് നടി വീണ്ടും സിനിമകളില്‍ സജീവമായത്.

‘കവലൈ വേണ്ടാം’ എന്ന ചിത്രത്തിലൂടെയാണ് യാഷിക അഭിനയരംഗത്തേക്ക് എത്തുന്നത്. എന്നാല്‍ ബിഗ് ബോസ് തമിഴിലൂടെയാണ് താരം പ്രേക്ഷകര്‍ക്ക് പ്രിയങ്കരിയാകുന്നത്.

ഷോയ്ക്ക് പിന്നാലെ താരത്തിന് വലിയ ആരാധകവൃന്ദം തന്നെ ഉണ്ടായിരുന്നു. ധ്രുവങ്ങള്‍ പതിനാറ്, ‘ഇരുട്ട് അറയില്‍ മുരട്ട് കുത്ത്’, ‘സോംബി’ തുടങ്ങിയ ചിത്രങ്ങളിലും ശ്രദ്ധേയമായ വേഷങ്ങള്‍ അവതരിപ്പിച്ചു.

സോഷ്യല്‍ മീഡിയയിലും വളരെ സജീവമാണ് താരം. ഇതിലൂടെ തന്റെ ഗ്ലാമര്‍ ചിത്രങ്ങള്‍ ആരാധകര്‍ക്കായി താരം പങ്കുവയ്ക്കാറുണ്ട്.