നരസിംഹം എന്ന ചിത്രത്തിൽ ലാലേട്ടൻ ഇടയ്ക്കിടയ്ക്ക് പറയുന്ന “ദിനേശൻ” ആരാണെന്ന് അറിയുമോ?

മലയാള സിനിമാ ചരിത്രത്തിലെ തന്നെ ഏറ്റവും വലിയ വിജയങ്ങളിൽ ഒന്നാണ് നരസിംഹം. ഒരുപക്ഷേ നരസിംഹം എന്ന ചിത്രത്തിന് ലഭിച്ച വരവേൽപ്പ് അതിനു മുൻപോ അതിനുശേഷമോ മറ്റൊരു മലയാള സിനിമയ്ക്കും ലഭിച്ചിട്ടില്ല എന്ന് വേണമെങ്കിൽ പറയാം. ആശിർവാദ് പ്രൊഡക്ഷൻസ് ആദ്യമായി നിർമ്മിച്ച ചിത്രം കൂടിയാണ് നരസിംഹം. മോഹൻലാൽ പൂവള്ളി ഇന്ദുചൂഡൻ എന്ന കഥാപാത്രമായിട്ടാണ് ചിത്രത്തിൽ പ്രത്യക്ഷപ്പെട്ടത്. ഷാജി കൈലാസ് സംവിധാനം ചെയ്ത ചിത്രത്തിന് തിരക്കഥ ഒരുക്കിയത് രഞ്ജിത്ത് ആയിരുന്നു.

ചിത്രത്തിലെ ഒരു ജനപ്രിയ ഡയലോഗ് ആണ് നീ പോ മോനേ ദിനേശാ എന്നത്. ഈ ഡയലോഗ് മലയാള സിനിമയുടെ ചരിത്രത്തിലേക്ക് ആണ് നടന്നുകയറിയത് എന്ന് വേണമെങ്കിൽ പറയാം. പിന്നീട് നിരവധി സിനിമകളിൽ ഈ ഡയലോഗ് ഉപയോഗിച്ചു എന്ന് മാത്രമല്ല, നമ്മൾ നമ്മുടെ നിത്യ ജീവിതത്തിൽ ഏറ്റവും കൂടുതൽ ഉപയോഗിച്ച സിനിമ ഡയലോഗുകളിൽ ഒന്നുകൂടി ആയിരിക്കും ഇത്. എന്നാൽ ഈ ചിത്രത്തിന് വേണ്ടി അല്ല ആദ്യമായി ഈ ഡയലോഗ് എഴുതപ്പെട്ടത്. മറ്റൊരു ചിത്രത്തിലെ ജനപ്രിയ കഥാപാത്രമാണ് ഈ ദിനേശൻ. അത് ആരാണെന്ന് നിങ്ങൾക്ക് അറിയുമോ?

ശ്രീനിവാസൻ തിരക്കഥയെഴുതി സംവിധാനം ചെയ്ത സൂപ്പർ ഹിറ്റ് ചിത്രമാണ് വടക്കുനോക്കിയന്ത്രം. ദിനേശൻ എന്ന കഥാപാത്രമായിട്ടാണ് ശ്രീനിവാസൻ ഈ ചിത്രത്തിൽ പ്രത്യക്ഷപ്പെടുന്നത്. പാർവതി ആണ് ഈ ചിത്രത്തിൽ ശ്രീനിവാസൻ്റെ നായികയായി എത്തുന്നത് വളരെ സുന്ദരിയായ ഒരു ഭാര്യയെ കല്യാണം കഴിക്കുന്ന താരതമ്യേന ഉയരം കുറഞ്ഞതും ഇരുണ്ട നിറവും ആയ ഒരു യുവാവിൻ്റെ വേഷമായിരുന്നു ശ്രീനിവാസൻ ചെയ്തത്. ഒരു സാധാരണക്കാരനു നേരിടേണ്ടിവരുന്ന അരക്ഷിതാവസ്ഥ ആയിരുന്നു ഈ ചിത്രത്തിൽ ശ്രീനിവാസൻ അവതരിപ്പിച്ചത്.

ഈ ചിത്രത്തിൽ ശ്രീനിവാസൻ പോലീസ് സ്റ്റേഷനിൽ പോയി തൻറെ ഭാര്യയെ തട്ടിക്കൊണ്ടു പോകുവാൻ ചില ആളുകൾ ശ്രമിക്കുന്നുണ്ട് എന്ന ഒരു പരാതി നൽകുന്നുണ്ട്. ഒടുവിൽ ഉണ്ണികൃഷ്ണൻ അവതരിപ്പിക്കുന്ന പോലീസ് കഥാപാത്രത്തിനോട് ആണ് ശ്രീനിവാസൻ ഇത്തരത്തിലൊരു പരാതി അവതരിപ്പിക്കുന്നത്. എന്നാൽ പരാതിയിൽ കഴമ്പില്ല എന്ന് തോന്നിയ ഒടുവിൽ ഉണ്ണികൃഷ്ണൻ കഥാപാത്രം ശ്രീനിവാസനെ മടക്കി അയക്കുകയാണ്. മടക്കി അയക്കുമ്പോൾ ഒടുവിൽ ഉണ്ണികൃഷ്ണൻ പറയുന്ന ഡയലോഗ് ആണ് മോനേ ദിനേശാ, നീ പോ എന്നത്. പിന്നീട് ഈ ഡയലോഗ് ചെറിയ രീതിയിൽ അന്ന് വൈറൽ ആവുകയായിരുന്നു. എന്നാലും വലിയ രീതിയിൽ ഈ ഡയലോഗ് ആളുകൾ സ്വീകരിച്ചത് ലാലേട്ടൻ ഉപയോഗിച്ച ശേഷം ആണെന്ന് നിസ്സംശയം പറയാം.