മരിച്ചുപോയ മകനെ വീണ്ടും കണ്ടതുപോലെ! അമ്മയുടെ സങ്കടത്തിന് ആശ്വാസം പകർന്ന് വിഷ്ണു ജോഷി, വാരിപുണർന്ന് അമ്മ

ബി​ഗ്ബോസ് മലയാളത്തിലൂടെ മലയാളികളുടെ ഇഷ്ട താരമായ വ്യക്തിയാണ് വിഷ്ണു ജോഷി.ടോപ് ഫൈവിൽ എത്തുമെന്ന് ഏവരും വിധിയെഴുതിയ വിഷ്ണുവിന് പക്ഷെ ഫിനാലെയ്ക്ക് തൊട്ട് മുമ്പ് ഷോയിൽ നിന്നും പുറത്തുപോകുകയായിരുന്നു.സോഷ്യൽ മീഡിയയിൽ സജീവമായ വിഷ്ണു അടുത്തിടെ ഒരു യുട്യൂബ് ചാനലും തുടങ്ങിയിരുന്നു.ഖൽ നായകിന് യുട്യൂബ് ചാനലിൽ രണ്ട് ലക്ഷത്തിന് അടുത്ത് സബ്സ്ക്രൈബേഴ്സുണ്ട്.വിഷ്ണു കഴിഞ്ഞ ദിവസം പങ്കിട്ട വീഡിയോയാണ് ഇപ്പോൾ ശ്രദ്ധിക്കപ്പെടുന്നത്. ചെല്ലാനത്തുള്ള ഒരു കുടുംബത്തെ സന്ദർശിച്ചതിന്റെ വീഡിയോയാണ് വിഷ്ണു പങ്കിട്ടത്. ഒരു കുടുംബത്തെ തിരഞ്ഞ് പോയി കണ്ടതിന് പിന്നിൽ ഒരു കാരണവുമുണ്ട്. വിഷ്ണുവിന്റെ മുഖച്ഛായയുള്ള ജിതിൻ എന്ന ചെറുപ്പക്കാരൻ മൂന്ന് വർഷം മുമ്പ് അപകടത്തിൽ മരിച്ചിരുന്നു. അതിനുശേഷം കുടുംബം മുഴുവൻ സങ്കടത്തിലാണ്. വിഷ്ണുവിനെപ്പോലെ മുടി നീട്ടിവളർത്തി ഫിറ്റ്നസിനൊക്കെ പ്രാധാന്യം കൊടുക്കുന്ന യുവാവായിരുന്നു ജിതിനും. വിഷ്ണുവിനെ ബി​ഗ് ബോസിൽ കണ്ടപ്പോൾ മുതൽ മകനെ വീണ്ടും കാണുന്നപോലെയാണ് ജിതിന്റെ അമ്മയ്ക്ക് അനുഭവപ്പെട്ടത്.

ഒരിക്കലെങ്കിലും വിഷ്ണുവിനെ നേരിട്ട് കാണണമെന്ന ആ​ഗ്രഹവുമായി ജിതിന്റെ അമ്മ ജീവിക്കുന്നുവെന്ന് ആരാധകർ വഴി അറിഞ്ഞാണ് വിഷ്ണു ജിതിന്റെ കുടുംബത്തെ ചെല്ലാനത്ത് പോയി സന്ദർശിച്ചത്. വിഷ്ണുവിനെ കണ്ടതോടെ ജിതിന്റെ അമ്മയും ബന്ധുക്കളുമെല്ലാം അതീവ സന്തോഷത്തിലായി. ഞങ്ങളുടെ ജിതിനെപ്പോലെ തന്നെയാണ് കാണാനെന്ന് വിഷ്ണുവിനോട് ജിതിന്റെ കുടുംബാ​ഗങ്ങളും നാട്ടുകാരുമെല്ലാം പറയുന്നുണ്ടായിരുന്നു.ക്രിസ്മസ് അടുത്തതുകൊണ്ട് തന്നെ ഒരു കേക്കും വാങ്ങിയാണ് ജിതിന്റെ കുടുംബത്തെ കാണാൻ വിഷ്ണു ചെന്നത്. വികാരനിർഭരമായ നിമിഷങ്ങളാണ് എന്നതുകൊണ്ട് തന്നെ ജിതിന്റെ കുടുംബത്തിന്റെ അനുവാദം വാങ്ങിയശേഷമാണ് അവിടുത്തെ സന്തോഷ നിമിഷങ്ങൾ വിഷ്ണു വ്ലോ​ഗായി ഷൂട്ട് ചെയ്തത്.