മണാലി യാത്രക്ക് പിന്നാലെ ആരാധകര്‍ക്ക് മറ്റൊരു സര്‍പ്രൈസ് നല്‍കി വിജയ് ദേവരക്കോണ്ട; കുടുംബസമേതം ആരാധകരെ കണ്ട് താരം

തെലുങ്ക് സിനിമയുടെ സൂപ്പര്‍ സ്റ്റാറുകളില്‍ ഒരാളാണ് വിജയ് ദേവരക്കോണ്ട. നിരവധി ആരാധകരുള്ള താരമാണ് ദേവരക്കോണ്ട. നടന് ആരാധകരോടുള്ള സ്‌നേഹം സിനിമ മേഖലയില്‍ വളരെ പ്രശസ്തമാണ്.

തന്റെ ആരാധകര്‍ക്ക് സമ്മാനങ്ങള്‍ നല്‍കി സന്തോഷിപ്പിക്കുക എന്നത് വിജയ് ദേവരകൊണ്ടയുടെ പതിവാണ്. ഈ വര്‍ഷം തന്റെ 100 ആരാധകര്‍ക്ക്
മണാലിക്കുള്ള സൗജന്യ യാത്രാ പാക്കേജ് ആയിരുന്നു നടന്റെ സമ്മാനം.

ബാച്ച് യാത്ര തിരിച്ച് ഒരാഴ്ച പിന്നിടവെ ആരാധകര്‍ക്ക് വീണ്ടും സര്‍പ്രൈസ് നല്‍കിയിരിക്കുകയാണ് നടന്‍. തന്റെ കുടുംബത്തിന് ഒപ്പം ആരാധകരെ സര്‍പ്രൈസ് വിസിറ്റ് നടത്തിയിരിക്കുകയാണ് ദേവരക്കൊണ്ട.

ആരാധകരെ നേരിട്ട് മണാലിയില്‍ എത്തിയാണ് കണ്ടത്. നടനും അമ്മയും നൂറുപേര്‍ക്കൊപ്പം സമയം ചെലവഴിക്കുന്ന വീഡിയോ സമൂഹ മാധ്യമങ്ങളില്‍ വൈറല്‍ ആണ്.

നൂറ് ആരാധകരെ വഹിച്ചുകൊണ്ട് വിമാനം പുറപ്പെട്ട വീഡിയോ നടന്‍ തന്നെയാണ് സമൂഹ മാധ്യമങ്ങളില്‍ പങ്കുവച്ചിരുന്നത്. ആവേശഭരിതരായ ആരാധകരെ വീഡിയോയില്‍ കാണാം.

ദേവരസാന്റ എന്ന ഹാഷ് ടാഗില്‍ ആണ് വീഡിയോ പങ്കുവച്ചിട്ടുള്ളത്. രാജ്യത്തിന്റെ പല ഭാഗങ്ങളില്‍ നിന്നുള്ള 100 പേരാണ് മണാലി യാത്രയില്‍ ഉള്ളത്.
2017 മുതല്‍ ആണ് ക്രിസ്മസ് – ന്യൂയര്‍ സമയങ്ങളില്‍ ആരാധകര്‍ക്ക് സര്‍പ്രൈസ് സമ്മാനങ്ങള്‍ നല്‍കി തുടങ്ങിയത്.

കഴിഞ്ഞ ക്രിസ്തുമസിന് 100 ആരാധകര്‍ക്ക് 10000 രൂപ വീതം സമ്മാനിക്കുകയും ചെയ്തിരുന്നു. ഇത്തവണ സോഷ്യല്‍ മീഡിയ പോളിലൂടെയായിരുന്നു വിജയ് ആരാധകര്‍ക്ക് മലനിരകളോടുള്ള താല്പര്യം മനസിലാക്കിയത്.

തുടര്‍ന്നാണ് മണാലി ട്രിപ്പ് ആരാധകര്‍ക്കായി താരം പ്ലാന്‍ ചെയ്തത്. അതേസമയം ‘ഖുശി’യാണ് നിലവില്‍ ചിത്രീകരണത്തിലുള്ള വിജയ് ദേവരകൊണ്ട ചിത്രം.