ഡേറ്റിംഗ് സൈറ്റില്‍ ഉണ്ണി മുകുന്ദന്‍ ‘ചെറി’; സെല്‍ഫി പോസ്റ്റ് ചെയ്യുന്നത് നിര്‍ത്തിയെന്ന് താരം

മലയാള സിനിമയിലെ മസിൽ മാൻ എന്നറിയപ്പെടുന്ന നടനാണ് ഉണ്ണി മുകുന്ദന്‍. മലയത്തിനുപുറമെ തെലിങ്കിലും കന്നഡയിലുമെല്ലാം വിജയക്കൊടി പാറിച്ച ആളാണ് ഉണ്ണി. സോഷ്യല്‍മീഡിയയില്‍ വളരെ സജീവമായ നടന്റെ പേരില്‍ വ്യാജ അക്കൗണ്ടുകളും പ്രചരിക്കുന്നുണ്ട്. തന്റെ പേരിലും ചിത്രം ഉപയോഗിച്ചുമുളള വ്യാജ പ്രൊഫൈലുകള്‍ ഇതിനു മുമ്ബും ഉണ്ണി മുകുന്ദന്‍ തെളിവു സഹിതം ‘പൊക്കിക്കൊണ്ടു’ വന്നിട്ടുണ്ട്. ഇപ്പോളിതാ ഡേറ്റിങ് ആപ്പില്‍ തന്റെ ചിത്രം വച്ച്‌ വ്യാജ പ്രൊഫൈല്‍ പ്രചരിക്കുന്നതിന് മുന്നറിയിപ്പുമായി എത്തിയിരിക്കുകയാണ് നടന്‍.

ചെറി എന്ന പേരിലുള്ള പ്രെഫൈലിന്റെ സ്‌ക്രീന്‍ ഷോട്ട് സഹിതം പങ്ക്വെച്ചുകൊണ്ട് ഇനി സോഷ്യല്‍ മീഡിയയില്‍ സെല്‍ഫികള്‍ പോസ്റ്റ് ചെയ്യുന്നത് നിര്‍ത്തിയെന്ന് ഉണ്ണി പറഞ്ഞു. ഇന്‍സ്റ്റാഗ്രാമിലൂടെയായിരുന്നു നടന്റെ പ്രതികരണം. ഇരുപത്ത് അഞ്ച് വയസുള്ള ചെറി എന്ന അക്കൗണ്ടിനാണ് ഉണ്ണി മുകുന്ദന്റെ ചിത്രം നല്‍കിയിരിക്കുന്നത്. അവിവാഹിതനാണെന്നും ഡേറ്റിങ്ങിന് പെണ്‍കുട്ടികളെ തേടുന്നു എന്നും പ്രെഫൈലില്‍ പറയുന്നു. സ്‌ക്രീന്‍ഷോട്ട് പങ്ക്വെച്ച്‌ ഇന്‍സ്റ്റാഗ്രാമില്‍ ഉണ്ണി മുകുന്ദന്‍ ഇങ്ങനെ കുറിച്ചു.

അബദ്ധത്തില്‍ ആരെങ്കിലും ഈ അക്കൗണ്ടില്‍ കയറിയിട്ടുണ്ടെങ്കില്‍ ഞാനിപ്പോഴെ പറയുകയാണ്. ഇത് ഞാനല്ല. എനിക്ക് 25 വയസ്സല്ല പ്രായം. ഞാന്‍ ബിരുദധാരിയുമില്ല. ഈ ഡേറ്റിങ് പരിപാടിക്ക് പോകാന്‍ എനിക്ക് വട്ടൊന്നുമില്ല. എന്റെ പേര് ചെറി എന്നുമില്ല.

നടന്റെ പേരില്‍ വ്യാജ അക്കൗണ്ടുകള്‍ ഉണ്ടാക്കിയ ശേഷം പെണ്‍കുട്ടികളുമായി സൗഹൃദം നടിച്ച്‌ പറ്റിക്കുന്നുണ്ടെന്ന് നടന്റെ അച്ഛന്‍ പോലീസില്‍ പരാതി നല്‍കിയതും വാര്‍ത്തയായിരുന്നു. തന്റെ ഫോട്ടോ വെച്ച്‌ വൈവാഹിക വെബ്സൈറ്റില്‍ ഐഡി ഉണ്ടാക്കുന്നവര്‍ക്ക് എതിരെയും താരം പരാതി നല്‍കിയിട്ടുണ്ട്.