നായകനാകണമെന്ന് നിര്‍ബന്ധമില്ല, കഥാപാത്രമാണ് പ്രധാനം -ടോവിനോ

നല്ല കഥാപാത്രങ്ങൾ ചെയ്യാനാണ് താൽപര്യമെന്നും ചിത്രത്തിൽ നായകനാകണമെന്ന് തനിക്ക് നിർബന്ധമില്ലെന്നും നടൻ ടോവിനോ തോമസ്. പാർവതി പ്രധാന കഥാപാത്രത്തെ അവതരിപ്പിക്കുന്ന ഉയരെ കണ്ടശേഷം മാധ്യമങ്ങളോട് സംസാരിക്കുകയായിരുന്നു ടോവിനോ. ചിത്രത്തിൽ ഒരു കഥാപാത്രത്തെ ടോവിനോയും അവതരിപ്പിക്കുന്നുണ്ട്.

ഷൂട്ടിന്റെ സമയത്തും ഇപ്പോൾ പൂർണ സിനിമയായിട്ട് കണ്ടപ്പോഴും എനിക്ക് സംതൃപ്തി നൽകിയ ചിത്രമാണിത്. ത്രില്ലർ ചിത്രങ്ങളെ സംബന്ധിച്ച് അതിന്റെ മെയ്ക്കിങ് ആണ് പ്രധാനം. കഥ പറയുമ്പോൾ കിട്ടുന്ന ത്രിൽ സിനിമയാകുമ്പോൾ കിട്ടണമെന്നില്ല. എന്നാൽ, ഉയരെയിൽ മനു (സംവിധായകൻ മനു അശോകൻ) അക്കാര്യത്തിൽ നൂറ് ശതമാനവും വിജയിച്ചിട്ടുണ്ട്.

നായകനായിട്ട് മാത്രമേ അഭിനയിക്കാവൂ എന്നൊന്നുമില്ല. ഹോളിവുഡിലൊക്കെ വലിയ നടൻമാരും ചെറിയ റോളുകളൊക്കെ ധാരാളം ചെയ്യാറുണ്ട്. അത് മാതൃകയാക്കാവുന്നതാണ്. നല്ല കഥാപാത്രങ്ങൾ ചെയ്യുന്നതാണ് എനിക്ക് കൂടുതൽ സംതൃപ്തി നൽകുന്നത്. നായകനാകുന്ന സിനിമകളിലും അവ നല്ല കഥാപാത്രങ്ങൾ കൂടിയായിരിക്കണമെന്നാണ് ആഗ്രഹം. നല്ല കഥാപാത്രമാണെങ്കിൽ നായകനാകണമെന്നോ മുഴുനീള കഥാപാത്രമാകണമെന്നോ നിർബന്ധമില്ലെന്നും ടോവിനോ കൂട്ടിച്ചേർത്തു