ആ ക്ലാസിക് മോഹൻലാൽ – സിബി മലയിൽ ചിത്രത്തിന് രണ്ടാം ഭാഗം വരുന്നു, ദയവുചെയ്ത് ഒറിജിനലിനെ നശിപ്പിക്കരുത് എന്ന് മലയാളികൾ, സംഭവം ഇങ്ങനെ

മലയാളികൾക്ക് ഏറെ പ്രിയപ്പെട്ട സംവിധായകരിൽ ഒരാളാണ് സിബി മലയിൽ. ലോഹിതദാസ് തിരക്കഥയെഴുതിയ നിരവധി ചിത്രങ്ങളാണ് സിബിമലയിൽ സംവിധാനം ചെയ്തത്. ഏഴു വർഷം കൊണ്ട് 14 സിനിമകളാണ് ഇവർ അണിയിച്ചൊരുക്കിയത്. എല്ലാം ഒന്നിനൊന്നു വ്യത്യസ്ത സിനിമകളും മികച്ചതും ആയിരുന്നു. അതിൽ ഒരു സിനിമയായിരുന്നു ദശരഥം. മലയാളികൾക്ക് എന്നും പ്രിയപ്പെട്ട ഒരു സിനിമ ആയിരുന്നു 1989 വർഷത്തിൽ പുറത്തിറങ്ങിയ ഈ ചിത്രം. വാടക ഗർഭധാരണം എന്ന വളരെ ഗൗരവമുള്ള വിഷയത്തെക്കുറിച്ച് ആയിരുന്നു സിനിമ സംസാരിച്ചത്.

രാജീവ് മേനോൻ എന്ന കഥാപാത്രത്തെയാണ് മോഹൻലാൽ ഈ സിനിമയിൽ അവതരിപ്പിച്ചത്. വാടക ഗർഭധാരണം വഴി രാജീവിന് ഒരു മകനെ ലഭിക്കുകയും പിന്നീട് എന്ത് സംഭവിക്കും എന്നതുമായിരുന്നു സിനിമയുടെ കഥ. കരിയറിലെ ഏറ്റവും മികച്ച പ്രകടനങ്ങളിൽ ഒന്ന് ആയിരുന്നു മോഹൻലാൽ ഈ സിനിമയിൽ പുറത്തെടുത്തത്. ഇന്നും സിനിമ ഗ്രൂപ്പുകളിൽ എല്ലാംതന്നെ മോഹൻലാലിൻറെ ഈ സിനിമയിലെ അഭിനയം ചർച്ചാവിഷയമാണ്. ഇപ്പോൾ ഈ സിനിമയ്ക്ക് രണ്ടാം ഭാഗം വന്നേക്കുമെന്ന സൂചനകളാണ് സിബിമലയിൽ തന്നെ നൽകുന്നത്.

ദശരഥം സിനിമയുടെ രണ്ടാം ഭാഗത്തിൻ്റെ തിരക്കഥ പൂർത്തിയായിട്ടുണ്ട് എന്നാണ് സംവിധായകൻ സിബി മലയിൽ പറയുന്നത്. സിബിമലയിൽ പുതുതായി സംവിധാനം ചെയ്യുന്ന ചിത്രമാണ് കൊത്ത്. ഈ സിനിമയുടെ രചന നിർവഹിക്കുന്നത് ഹേമന്ത് കുമാർ ആണ്. ഇരുവരും ചേർന്ന് ആദ്യം ആലോചിച്ചു പൂർത്തിയാക്കിയത് ദശരഥം സിനിമയുടെ രണ്ടാം ഭാഗമാണ് എന്നാണ് ഇവർ പറയുന്നത്. നമ്മളെ വിട്ടു പിരിഞ്ഞ ലോഹിതദാസിന് ആദരാഞ്ജലികൾ കൂടി ആയിട്ടാണ് ഈ സിനിമ ചെയ്യാൻ ഉദ്ദേശിച്ചത് എന്നും ഇവർ പറയുന്നു. എന്നാൽ ഈ ചിത്രത്തിലെ വലിയ ഒരു കഥാപാത്രത്തെ അവതരിപ്പിച്ചത് നെടുമുടി വേണു ആയിരുന്നു. കഥ കേട്ടപ്പോൾ അദ്ദേഹവും വലിയ ത്രില്ലിൽ ആയിരുന്നു. സിനിമയുടെ ചർച്ചകൾ നടന്നുകൊണ്ടിരിക്കവെ ആയിരുന്നു അദ്ദേഹത്തിൻറെ വിയോഗം.

അതേസമയം ഏഴ് വർഷത്തെ ഇടവേളയ്ക്ക് ശേഷം സിബി മലയിൽ തിരിച്ചു വരുന്ന ചിത്രം കൂടിയാണ് കൊത്ത്. ആസിഫ് അലി ആണ് ചിത്രത്തിൽ കേന്ദ്രകഥാപാത്രത്തെ അവതരിപ്പിക്കുന്നത്. ഒരു പൊളിറ്റിക്കൽ ത്രില്ലറായിട്ടാണ് ചിത്രം ഒരുക്കുന്നത്. നിഖില വിമൽ ആണ് സിനിമയിലെ നായിക. റോഷൻ മാത്യു, സുദേവ് നായർ, സുരേഷ് കൃഷ്ണ എന്നിവരാണ് സിനിമയിലെ മറ്റ് കേന്ദ്ര കഥാപാത്രങ്ങളെ അവതരിപ്പിക്കുന്നത്.