അതൊരു 10 വയസ്സുള്ള കുട്ടിയാണ്, അതിനെയെങ്കിലും വെറുതെ വിടണം – ദേവനന്ദയ്ക്ക് വേണ്ടി അഭ്യർത്ഥനയുമായി തിരക്കഥാകൃത്ത് അഭിലാഷ് പിള്ള

മലയാളികൾക്ക് ഏറെ പ്രിയപ്പെട്ട താരങ്ങളിൽ ഒരാളാണ് ദേവനന്ദ. നിരവധി സിനിമകളിൽ അഭിനയിച്ചിട്ടുണ്ട് എങ്കിലും മാളികപ്പുറം എന്ന സിനിമയിലൂടെയാണ് ഇവർ കൂടുതൽ ശ്രദ്ധിക്കപ്പെടുന്നത്. കല്ലു എന്ന കഥാപാത്രത്തെയാണ് ഇവർ ആ സിനിമയിൽ അവതരിപ്പിച്ചത്. ഒരുപക്ഷേ സ്വന്തം പേരിനേക്കാൾ ആ പേരിൽ ആണ് ഈ കുട്ടി ഇന്ന് കൂടുതൽ അറിയപ്പെടുന്നത്.

ഇവരുടെ ഏറ്റവും പുതിയ സിനിമയാണ് ഗു. കഴിഞ്ഞ കുറച്ചു ദിവസങ്ങളായി ഇവർ ആ സിനിമയുടെ പ്രമോഷൻ പരിപാടികളിലാണ്. വളരെ പക്വതയോടെയാണ് ഇവർ ഇൻറർവ്യൂകളിൽ സംസാരിക്കുന്നത്. തങ്ങളുടെ പ്രായത്തിലുള്ള കുട്ടികൾ എല്ലാവരും ഓവർ ക്യൂട്ട്നെസ്സ് വാരി വിതറുന്നവർ അല്ല എന്നും നല്ല പക്വതയുള്ളവർ ആണ് എന്നുമായിരുന്നു ഇവർ അഭിമുഖത്തിൽ പറഞ്ഞത്. ഇത് വലിയ രീതിയിലുള്ള ട്രോളുകൾക്ക് കാരണമായി മാറി. അകാലത്തിൽ വാർദ്ധക്യം പിടിപെട്ട ബാലിക എന്നൊക്കെ പറഞ്ഞുകൊണ്ട് നിരവധി ആളുകൾ ആയിരുന്നു ട്രോൾ ചെയ്തത്. ഇപ്പോൾ ഈ വിഷയത്തിൽ പ്രതികരിക്കുകയാണ് തിരക്കഥാകൃത്ത് അഭിലാഷ് പിള്ള.

“ആരെയും എന്തും പറയുവാനുള്ള സ്ഥലമാണ് സോഷ്യൽ മീഡിയ എന്നു കരുതി ജീവിക്കുന്ന സുഹൃത്തുക്കളോട് എനിക്ക് ഒരു കാര്യം മാത്രമാണ് പറയുവാനുള്ളത്. അതൊരു പത്തു വയസ്സുള്ള കുട്ടിയാണ്. അവരെയെങ്കിലും വെറുതെ വിടണം” – ഇതായിരുന്നു അഭിലാഷ് പിള്ള എഴുതിയത്.

അതേസമയം നിരവധി ആളുകൾ ആണ് ഇതിന് താഴെ കമൻറ് ആയി എത്തിയിരിക്കുന്നത്. ഇന്നത്തെ കുട്ടികൾ നല്ല അറിവും തിരിച്ചറിവും ഉള്ളവരാണ് എന്നും അറിവും വിദ്യാഭ്യാസവും മാത്രം ഉണ്ടായിട്ട് കാര്യമില്ല, തിരിച്ചറിവ് കൂടി വേണം എന്നൊക്കെയാണ് ആളുകൾ സപ്പോർട്ട് ചെയ്തു കൊണ്ട് പറയുന്നത്. എന്നാൽ ദൗർഭാഗ്യവശാൽ ഇന്നത്തെ സമൂഹത്തിൽ ജീവിക്കുന്ന ബഹുഭൂരിപക്ഷം ആളുകൾക്കും അത് ഇല്ലാതെ പോയി എന്നും പരിതപിക്കുന്നവർ ഉണ്ട്. ഇതൊന്നും കേട്ടിട്ട് മോൾ വിഷമിക്കേണ്ട എന്നും ഇങ്ങനെ തന്നെ മുന്നോട്ടു പോകണം എന്നും അഭിമുഖം കണ്ടപ്പോൾ ഒത്തിരി സന്തോഷമായി എന്നുമാണ് പ്രായമായവർ പറയുന്നത്.