ഇല്ലാത്ത കുട്ടിയുടെ അവകാശം ഏറ്റെടുക്കാൻ പറ്റില്ല, ഭർത്താവും മകനും അറിഞ്ഞാൽ എന്തു വിചാരിക്കും? സംഘാടകർക്കെതിരെ നവ്യാനായർ

മലയാളികൾക്ക് ഏറെ പ്രിയപ്പെട്ട താരങ്ങളിൽ ഒരാളാണ് നവ്യ നായർ. കുറച്ചു ദിവസങ്ങൾക്കു മുൻപ് ഇവർ ഒരു പരിപാടിയിൽ പങ്കെടുത്തിരുന്നു. അതിൽ ഇവരെക്കുറിച്ച് തെറ്റായ വിവരങ്ങൾ ആയിരുന്നു രേഖപ്പെടുത്തിയത്. പരിപാടിക്ക് വേണ്ടി പുറത്തിറക്കിയ ബുക്ക്ലെറ്റിൽ ആയിരുന്നു തെറ്റായ വിവരങ്ങൾ ഉൾപ്പെടുത്തിയത്. താരം പിന്നീട് ഇതിനെ ചോദ്യം ചെയ്യുകയും ചെയ്തു. ഇതിൻറെ വീഡിയോ സമൂഹമാധ്യമങ്ങളിൽ ഇപ്പോൾ വൈറലായി മാറിക്കൊണ്ടിരിക്കുകയാണ്.

വളരെ സൗമ്യമായ രീതിയിൽ ആയിരുന്നു താരം ഇതുമായി പ്രതികരിച്ചത്. താരത്തിന് രണ്ടു മക്കൾ ഉണ്ട് എന്ന തരത്തിൽ ആയിരുന്നു ബുക്ക്‌ലെറ്റിലെ വിവരം. എന്നാൽ തനിക്ക് രണ്ടു മക്കൾ ഇല്ല എന്നും ഇത് മകനോ കുടുംബമോ അറിഞ്ഞാൽ അവർ എന്തു വിചാരിക്കും എന്നുമാണ് താരം തമാശ കലർന്ന വാക്കുകളിൽ ചോദിക്കുന്നത്.

“എനിക്ക് ഒരു ചെറിയ പരിഭവം പറയാനുണ്ട്. നിങ്ങൾ വിതരണം ചെയ്ത ഒരു ബുക്ക് ലെറ്റ് ഞാൻ ഇവിടെ കണ്ടു. അതിൽ എഴുതിയിരിക്കുന്നത് എനിക്ക് രണ്ടു മക്കൾ ഉണ്ട് എന്നാണ്. ഇത് കണ്ടാൽ എന്റെ കുടുംബവും മകനും എന്തു വിചാരിക്കും? എനിക്ക് യാമിക എന്ന പേരിൽ ഒരു മകൾ ഉണ്ട് എന്നാണ് അതിൽ എഴുതിയിരിക്കുന്നത്. എന്നെപ്പറ്റി അറിയാത്തവർ എനിക്ക് അങ്ങനെ ഒരു മകൾ ഉണ്ട് എന്നല്ലേ മനസ്സിലാക്കുക? കുറച്ചുപേർക്ക് അല്ലേ എന്നെ കുറിച്ചുള്ള സത്യം അറിയുകയുള്ളൂ?” – താരം ചോദിക്കുന്നു.

“ദയവുചെയ്ത് ഇതുപോലെയുള്ള കാര്യങ്ങൾ ഊഹിച്ച് എഴുതരുത്. വിക്കിപീഡിയയിൽ നിന്നും എല്ലാ വിവരങ്ങളും ഇപ്പോൾ ലഭിക്കുമല്ലോ. ഗസ്റ്റുകളെ വിളിക്കുമ്പോൾ അവരെക്കുറിച്ച് കൃത്യമായ കാര്യങ്ങൾ തന്നെ നിങ്ങൾ എഴുതണം. പിന്നെ സന്തോഷമുള്ള ഒരു കാര്യം കൂടിയുണ്ട്. ഞാൻ അഭിനയിക്കാത്ത ചില സിനിമകൾ കൂടി ലിസ്റ്റിൽ എഴുതിയിട്ടുണ്ട്. അത് ഞാൻ നല്ല സ്പിരിറ്റിൽ എടുക്കും. പക്ഷേ എനിക്ക് ഇല്ലാത്ത കുട്ടിയുടെ കാര്യത്തിൽ അവകാശം എടുക്കാൻ പറ്റില്ല. എന്നിരുന്നാലും എന്നെ ഈ പരിപാടിയിൽ വിളിച്ചതിൽ ഒരുപാട് സന്തോഷമുണ്ട്” – നവ്യ നായർ പറയുന്നു.