ഈ ലോകത്തിലെ ഏറ്റവും വലിയ സിനിമാ വ്യവസായം ഹോളിവുഡ് ആണ്. ഇത് കഴിഞ്ഞാൽ വരുന്നത് ഇന്ത്യൻ സിനിമ വ്യവസായം ആണ്. ഒരു കാലം വരെ ഇന്ത്യൻ സിനിമ എന്നു പറഞ്ഞാൽ ഹിന്ദി സിനിമ മാത്രമായിരുന്നു. എന്നാൽ ഇന്ന് അങ്ങനെയല്ല. ഹിന്ദി സിനിമകളെക്കാൾ കൂടുതൽ സ്വീകാര്യത ലഭിക്കുന്നത് സൗത്ത് ഇന്ത്യൻ സിനിമകൾക്ക് ആണ്. എങ്കിലും ഈ വളർച്ചയിൽ തെലുങ്ക്, കന്നട സിനിമകളാണ് കൂടുതൽ പങ്കുവഹിച്ചിട്ടുള്ളത്. മലയാളം ഇപ്പോഴും വളർച്ചയുടെ പാതയിലാണ്. അടുക്കളയിൽ ഇറങ്ങിയ ചില മലയാളം സിനിമകൾ അയൽ സംസ്ഥാനങ്ങളിൽ വലിയ രീതിയിൽ തരംഗം സൃഷ്ടിച്ചു എങ്കിലും നോർത്ത് ഇന്ത്യൻ സ്റ്റേറ്റുകളിൽ ഇപ്പോഴും മലയാളം സിനിമകൾ സ്വീകരിക്കപ്പെടുന്ന അവസ്ഥയിലേക്ക് എത്തിയിട്ടില്ല. ഇതിനിടയിൽ രസകരമായ ഒരു കണക്ക് ആണ് ഇപ്പോൾ ശ്രദ്ധിക്കപ്പെടുന്നത്.
മീഡിയ സ്ഥാപനമായ ഓർമാക്സ് മീഡിയ ആണ് ഈ റിപ്പോർട്ട് പുറത്തുവിട്ടിരിക്കുന്നത്. 2023 വർഷത്തിലെ വാർഷിക റിപ്പോർട്ട് ആണ് ഇത്. ഇന്ത്യയിലെ എത്ര ശതമാനം ആളുകൾ സിനിമ തിയേറ്ററിൽ പോയി സിനിമ കാണുന്നുണ്ട് എന്ന ഒരു കണക്ക് ആണ് ഇത്. ഇവരുടെ കണക്ക് അനുസരിച്ച് ഇന്ത്യയിൽ സിനിമ കാണുന്നവരുടെ എണ്ണം 15.7 കോടിയാണ്. 2023ലെ കണക്ക് മാത്രമാണ് ഇത്. 2022 വർഷത്തിലെ കണക്ക് വെച്ച് നോക്കുമ്പോൾ 29 ശതമാനം വളർച്ചയാണ് രേഖപ്പെടുത്തിയിട്ടുള്ളത്. കോവിഡ് കാലത്തിന് മുൻപുള്ള സ്ഥിതിയെക്കാൾ 8% വളർച്ചയും ഉണ്ട്.
എങ്കിലും എന്തൊക്കെ പറഞ്ഞാലും 15 കോടി എന്നു പറയുന്നത് ഇന്ത്യയുടെ മൊത്തം ജനസംഖ്യയുടെ 11.1% മാത്രമാണ്. അതേസമയം കഴിഞ്ഞവർഷം ഇന്ത്യയിൽ വിറ്റു പോയത് 94.2 കോടി സിനിമ ടിക്കറ്റുകൾ ആണ്. അതായത് ഒരു ശരാശരി സിനിമ പ്രേമി വർഷം ആറു സിനിമകൾ വീതം കാണാറുണ്ട് എന്നർത്ഥം. പ്രേക്ഷകരുടെ എണ്ണത്തിൽ ഏറ്റവും കൂടുതൽ വളർച്ച രേഖപ്പെടുത്തിയത് ഹിന്ദി സിനിമയാണ്. 2022 വർഷത്തെ അപേക്ഷിച്ച് നോക്കുമ്പോൾ 2023 വർഷത്തിൽ 58 ശതമാനം വളർച്ചയാണ് ബോളിവുഡ് നേടിയിട്ടുള്ളത്. അതേസമയം സൗത്ത് ഇന്ത്യൻ സിനിമയിലേക്ക് വരുമ്പോൾ മലയാളം സിനിമ മാത്രമാണ് വളർച്ച രേഖപ്പെടുത്തിയിട്ടുള്ളത് എന്നത് നമ്മളെ സംബന്ധിച്ച് അഭിമാനിക്കാൻ വകയുള്ളതാണ്.
2022നെ അപേക്ഷിച്ചു നോക്കുകയാണെങ്കിൽ 2023 വർഷത്തിൽ പ്രേക്ഷകരുടെ എണ്ണത്തിൽ മലയാളത്തിൽ ഉണ്ടായിരിക്കുന്നത് 19 ശതമാനം വളർച്ചയാണ്. വളരെ വലിയ ഒരു വളർച്ച തന്നെയാണ് ഇത്. അതേസമയം തമിഴ് ഇൻഡസ്ട്രി 3% താഴേക്ക് പോവുകയാണ് ചെയ്തിരിക്കുന്നത്. തെലുങ്ക് സിനിമ ആവട്ടെ 6% ആണ് താഴേക്ക് പോയിരിക്കുന്നത്. കെജിഎഫ് സിനിമയിലൂടെ വലിയ ഒരു മുന്നേറ്റം കാഴ്ചവച്ച കന്നട സിനിമ കഴിഞ്ഞവർഷത്തെ അപേക്ഷിച്ച് നോക്കുമ്പോൾ 9% ആണ് താഴേക്ക് പോയിരിക്കുന്നത്.