എന്തുകൊണ്ടാണ് ചില അവാർഡുകൾ ആണുങ്ങൾക്കും പെണ്ണുങ്ങൾക്കും വെവ്വേറെ കൊടുക്കുന്നത്? ജെൻഡർ ന്യൂട്രൽ ആശയം ഇവിടെ ബാധകമല്ലേ?

ചില അവാർഡ് കാറ്റഗറിയിൽ എന്തിനാണ് പുരുഷവിഭാഗം/സ്ത്രീ വിഭാഗം എന്നിങ്ങനെയുള്ള തരംതിരിവ്? എന്തിനാണ് ബെസ്റ്റ് ആക്ടർ (മെയിൽ), ബെസ്റ്റ് ആക്ടർ (ഫീമെയിൽ) എന്നിങ്ങനെ രണ്ടു കാറ്റഗറി? ഏതെങ്കിലുമൊരു പ്രത്യേക ജണ്ടറിൽ ഉൾപ്പെടുന്നു എന്നതുകൊണ്ട് അഭിനയത്തിൽ എന്തെങ്കിലും നേട്ടം/കോട്ടം ഉണ്ടാകുമോ? ബെസ്റ്റ് ആക്ടർ എന്ന കാറ്റഗറി മാത്രം പോരേ? മാത്രവുമല്ല മെയിൽ/ഫീമെയിൽ എന്നിങ്ങനെ അല്ലാതെ മറ്റു ജെണ്ടറുകൾ ഇല്ലെ? അഭിനയം/പിന്നണി ഗാനാലാപനാം എന്നീ രണ്ട് കാറ്റഗറിയിൽ മാത്രമേ പൊതുവേ ഈ തരംതിരിവ് കണ്ടിട്ടുള്ളൂ. ബാക്കി കാറ്റഗറികൾ എല്ലാം തന്നെ ഒരുവിധം ജെൻഡർ ന്യൂട്രൽ ആണ്.

ആൺ കുട്ടികളും പെൺ കുട്ടികളും തുല്യരാണ് എന്ന് ചെറുപ്പം മുതൽ തന്നെ നമ്മൾ പറഞ്ഞു പഠിപ്പിക്കുന്ന കാലഘട്ടമാണ് ഇത്. അപ്പോൾ പിന്നെ സർക്കാർ നൽകുന്ന അവാർഡുകളിൽ എന്തിനാണ് ഇങ്ങനെ തരംതിരിവ് കാണിക്കുന്നത്. സംസ്ഥാന ദേശീയ അവാർഡുകളിൽ മാത്രമല്ല മറ്റുള്ള അവാർഡ് ചടങ്ങുകളിലും ഇതുതന്നെയാണ് അവസ്ഥ. അതേസമയം കൊറിയോഗ്രാഫി, സംഗീത സംവിധാനം, വസ്ത്രാലങ്കാരം തുടങ്ങി നിരവധി മേഖലകളിൽ ഈ തരംതിരിവ് നമ്മൾ കാണുന്നുമില്ല. അപ്പോൾ പിന്നെ എന്തിനാണ് രണ്ടു മേഖലകളിൽ മാത്രം ഇങ്ങനെ ആണുങ്ങൾക്കും പെണ്ണുങ്ങൾക്കും വേർതിരിച്ചു അവാർഡ് നൽകുന്നത്? അതിന് ശാസ്ത്രീയമായ ഒരു ന്യായീകരണവുമില്ല.

ഈ വിഷയം എത്രയും പെട്ടെന്ന് തന്നെ സർക്കാർ അധികൃതരുടെ ശ്രദ്ധയിൽപ്പെടുത്തണം. സമൂഹമാധ്യമങ്ങളിൽ സിനിമ ഗ്രൂപ്പുകളിൽ എങ്കിലും ഈ വിഷയം ചർച്ച ആവണം. അടുത്തവർഷം മുതലെങ്കിലും അവാർഡുകളിൽ ആൺ-പെൺ വേർതിരിവ് പാടില്ല എന്ന നിയമം കൊണ്ടുവരണം. സ്കൂളുകളിൽ അടക്കം ജെൻഡർ ന്യൂട്രൽ യൂണിഫോം എന്ന ആശയം നടപ്പിലാക്കുന്ന കാലഘട്ടമാണ് ഇത്. അപ്പോൾ പിന്നെ സിനിമ മേഖലയിലും ഈ വേർതിരിവ് ആവശ്യമില്ല.

അതല്ലെങ്കിൽ പിന്നെ എന്തിനാണ് ഈ രണ്ട് കാറ്റഗറിയിൽ മാത്രം ആണുങ്ങളെയും പെണ്ണുങ്ങളെയും വേർതിരിച്ചു കാണുന്നത് എന്ന് സർക്കാർ വിശദമാക്കണാം. ജെൻഡർ വേർതിരിവ് മാത്രമല്ല ഇവിടെയുള്ള പ്രശ്നം. പുരുഷൻ, സ്ത്രീ എന്നിങ്ങനെ രണ്ട് ജണ്ടറുകൾ മാത്രമാണ് അംഗീകരിക്കപ്പെടുന്നത്. ഇത് രണ്ടും മാത്രം അല്ലാതെ വേറെയും ജണ്ടറുകൾ ഉണ്ട് എന്ന് നമ്മൾ അംഗീകരിക്കേണ്ട കാലഘട്ടം അതിക്രമിച്ചിരിക്കുന്നു. പൊളിറ്റിക്കൽ കറക്ട്നസ് 1980കളിലെയും തൊണ്ണൂറുകളിലെയും സിനിമകളിൽ മാത്രം ഓഡിറ്റ് ചെയ്യപ്പെടേണ്ട ഒരു ആശയം അല്ല. നിലവിലെയും ഭാവിയിലേയും സാമൂഹിക രാഷ്ട്രീയ അവസ്ഥയെ കൂടി പരിഗണിച്ചുകൊണ്ട് ആവണം അത്.