‘ലാലേട്ടന്റെ സജീവ സാന്നിധ്യമാണ് ഇങ്ങനെയായി മാറാൻ കാരണം. ഇന്ത്യയിൽ ഏറ്റവും മികച്ച ബിഗ് ബോസ് റേറ്റിംഗ് മലയാളത്തിനാണ്.’ പ്രേക്ഷകർക്ക് നന്ദി അറിയിച്ചു കെ മാധവൻ.

നൂറു ദിവസങ്ങൾ പിന്നിട്ട് മലയാളം ബിഗ് ബോസ് നാലാം സീസണിലെ വിജയിയെ പ്രഖ്യാപിച്ചിരുന്നു. ദിൽഷാ പ്രസന്നൻ ആണ് ഷോയിൽ വിജയ് ആയി എത്തിയത്. റണ്ണർ അപ്പ് ആയത് ബ്ലെസ്ലി ആണ്. ഇപ്പോഴിതാ പ്രേക്ഷകർക്ക് നന്ദി പറഞ്ഞു എത്തിയിരിക്കുകയാണ് വാൾട്ട് ഡിസ്നി കമ്പനി ഇന്ത്യയുടെയും സ്റ്റാർ ഇന്ത്യയുടെയും പ്രസിഡൻറ് ആയ കെ മാധവൻ. നാല് സീസൺ കഴിയുമ്പോൾ ഇന്ത്യയിലെ മറ്റൊരു ഭാഷയിലെയും ബിഗ് ബോസ് ഷോ ഇത്രയധികം പ്രേക്ഷകരെ സമ്പാദിച്ചിട്ടില്ല എന്ന് ഇദ്ദേഹം പറയുന്നു.

ബിഗ് ബോസ് മലയാളം തുടങ്ങി നാലു സീസൺ കഴിയുന്നു. ഈ സീസണിലെ മഹത്തായ വിജയത്തിനും സ്നേഹത്തിനും പിന്തുണയ്ക്കും ഒപ്പം തന്നെ ക്രിയാത്മകമായ വിമർശനങ്ങളും നൽകുന്ന പ്രേക്ഷകർ ഇതിനെ ഒരു ഗ്ലോബൽ പ്രോഡക്റ്റ് ആക്കിമാറ്റി. ഇത്തരത്തിൽ വളരെയേറിയ ചെലവുള്ള ഒരു ഷോ മലയാളത്തിൽ ചെയ്യാൻ സാധിക്കുമോ എന്ന് ഏതാണ്ട് നാലു വർഷങ്ങൾക്കു മുൻപ് ആശങ്ക ഉണ്ടായിരുന്നു. പ്രത്യേകിച്ചും പ്രേക്ഷകർ ഇത് സ്വീകരിക്കുമോ എന്നായിരുന്നു ആശങ്ക.

ഇപ്പോൾ നാലു വർഷങ്ങൾ കഴിയുമ്പോൾ ഇന്ത്യയിലെ തന്നെ നമ്പർ വൺ ഷോ ആയി മാറിയിരിക്കുകയാണ് മലയാളം ബിഗ് ബോസ്. പ്രായഭേദമന്യേ എല്ലാവരും ആസ്വദിക്കുന്ന ഒരു ഷോ ആയി ബിഗ് ബോസ് മാറിയിട്ടുണ്ട്. ലാലേട്ടന്റെ സജീവസാന്നിധ്യമാണ് ഷോ ഇത്രയും മികച്ചതായി മാറുവാൻ ഉള്ള കാരണം. ഇന്ത്യയിൽ തന്നെ ആറോ ഏഴോ ഭാഷകളിൽ ബിഗ് ബോസ് ഉണ്ട്. എന്നാൽ അതിൽ ഒന്നും തന്നെ ഡബിൾ ഡിജിറ്റ് റേറ്റിംഗ് കിട്ടുന്ന ഒരു ഷോ ഇല്ല. മുഴുവൻ ക്രെഡിറ്റും ലാലേട്ടനാണ്.

ബിഗ് ബോസ് വീട്ടിലെ ഓരോ സ്പന്ദനവും കൃത്യമായി തിരിച്ചറിഞ്ഞ് അവരെ സ്നേഹിച്ചും ഉപദേശിച്ചും ആവശ്യം വരുമ്പോൾ ശകാരിച്ചും അദ്ദേഹം ഒപ്പമുണ്ട്. മത്സരാർത്ഥിക്ക് പുറംലോകവുമായുള്ള ഏക കണ്ണിയും ലാലേട്ടൻ തന്നെ ആയിരുന്നു. ഏഷ്യാനെറ്റ് തുടങ്ങിയപ്പോൾ മുതൽ മോഹൻലാലും ആയുള്ള ബന്ധം വളരെ വിലപ്പെട്ടതാണ്. കെ മാധവൻ പറയുന്നു.