ഷെറിന്‍ ആത്മഹത്യ ചെയ്തത് വിഡിയോ കോള്‍ ചെയ്ത്; മരണത്തില്‍ ദുരൂഹതയുണ്ടെന്ന് സുഹൃത്തുകള്‍

കൊച്ചിയില്‍ മരിച്ച നിലയില്‍ കണ്ടെത്തിയ ട്രാന്‍സ്‌ജെന്‍ഡര്‍ ഷെറിന്‍ സെലിന്‍ മാത്യു ജീവനൊടുക്കിയത് വിഡിയോ കോള്‍ ചെയ്‌തെന്ന് സുഹൃത്തുക്കള്‍. മാധ്യമങ്ങളോടാണ് ഷെറിന്റെ സുഹൃത്തുക്കള്‍ ഇക്കാര്യം അറിയിച്ചത്. ഫോണ്‍ ഓണ്‍ ചെയ്ത നിലയിലായിരുന്നു. ഷെറിന്‍ ആര്‍ക്കാണ് വിളിച്ചത് എന്നതില്‍ വ്യക്തതയില്ല. മരിക്കാന്‍ മാത്രമുള്ള കാരണങ്ങളെന്തെന്ന് അറിയില്ലെന്നും സുഹൃത്തുക്കള്‍ പറഞ്ഞു.

രണ്ട് വര്‍ഷങ്ങള്‍ക്ക് മുന്‍പാണ് ഷെറിന് ശസ്ത്രക്രിയ നടത്തിയത്. ആരോഗ്യപ്രശ്‌നങ്ങള്‍ ഉണ്ടായിരുന്നില്ല. ഹോര്‍മോണ്‍ ടാബ്ലറ്റുകള്‍ കഴിച്ചതിന്റെ അവശിഷ്ടങ്ങള്‍ മുറിയിലുണ്ടായിരുന്നുവെന്നും സുഹൃത്തുക്കള്‍ പറഞ്ഞു.

വളരെ ബോള്‍ഡായ കുട്ടിയാണ് ഷെറിന്‍. ആത്മഹത്യ ചെയ്യുമെന്ന് കരുതിയില്ല. ഇന്ന് രാവിലെ 10.30ക്ക് നോക്കുമ്പോള്‍ 15 മണിക്കൂര്‍ മുന്‍പ് ഒരു ബന്ധം ബ്രേക്കപ്പായ പോലെയുള്ള രീതിയില്‍ ഒരു സ്റ്റോറി ഇട്ടിട്ടുണ്ടായിരുന്നുവെന്നും ഷെറിന്റെ സുഹൃത്തുക്കള്‍ പറഞ്ഞു.

ചക്കരപ്പറമ്പിലെ ലോഡ്ജില്‍ ചൊവ്വാഴ്ച രാവിലെ പത്തരയോടെയാണ് ഷെറിനെ തൂങ്ങിമരിച്ച നിലയില്‍ കണ്ടെത്തിയത്. ആലപ്പുഴ സ്വദേശിയായ ഷെറിന്‍ വര്‍ഷങ്ങളായി കൊച്ചിയിലാണ് താമസിക്കുന്നത്. സുഹൃത്തുക്കളുമായി ഇവര്‍ക്ക് ചെറിയ പ്രശ്നങ്ങള്‍ ഉണ്ടായിരുന്നതായി പറയപ്പെടുന്നു. ഇതിന്റെ മാനസിക വിഷമത്തിലായിരുന്നു നടി.