വണ്ടിയില്‍ പോവുമ്പോള്‍ വെള്ള സാരിയുടുത്ത രൂപം കണ്ട് ബ്രേക്ക് ഇട്ട് നിര്‍ത്തിയ അനുഭവം; പൃഥ്വിരാജ് പറയുന്നു

പൃഥ്വിരാജും അതിഥി ബാലനും കേന്ദ്ര കഥാപാത്രമായി എത്തുന്ന ചിത്രമാണ് ‘കോള്‍ഡ് കേസ്’ . ഛായാഗ്രാഹകനും പരസ്യചിത്ര സംവിധായകനുമായ തനു ബാലക് ആദ്യമായി സംവിധാനം ചെയ്യുന്ന ചിത്രം കൂടിയാണിത്. പോലീസ് ഉദ്യോഗസ്ഥന്‍ എസിപി സത്യജിത് ആയാണ് ചിത്രത്തില്‍ പൃഥ്വി എത്തുന്നത്. സിനിമയിലെ പ്രധാന സ്ത്രീ കഥാപാത്രത്തെയാണ് അതിഥിയും അവതരിപ്പിക്കുന്നത്.

ഇപ്പോള്‍ ചിത്രം റിലീസിന് ഒരുങ്ങുകയാണ്. അതിന്റെ സന്തോഷത്തിലാണ് താരങ്ങള്‍ ചിത്രത്തിന്റെ പ്രമോഷനുമായി ബന്ധപ്പെട്ട് പൃഥ്വിരാജും അദിതിയും നിരവധി അഭിമുഖങ്ങള്‍ നല്‍കി കഴിഞ്ഞു, ഇതിനിടെ ചിത്രത്തിന്റെ കഥ വെച്ച് തങ്ങളുടെ ജീവിതത്തില്‍ അങ്ങനെയുള്ള അനുഭവം ഉണ്ടായിട്ടുണ്ടോ എന്നാണ് ഒരു അഭിമുഖത്തിനിടെ പൃഥ്വിയോട് ചോദിച്ചത്.

ലോകത്ത് നിന്ന് പോയ ആത്മാക്കള്‍ പറയാന്‍ ബാക്കി വച്ചത് പൂര്‍ത്തിയാക്കാന്‍ ജീവിച്ചിരിയ്ക്കുന്നവരുടെ സഹായം ആവശ്യമാണ്’ എന്ന് കേള്‍ഡ് കേസിന്റെ ട്രെയിലറില്‍ പറയുന്നുണ്ട്. അത്തരത്തിലൊരു അമാനുഷിക സംഭവത്തിന് സാക്ഷിയായിട്ടുണ്ടോ എന്നാണ് ചോദ്യം. ഇതിന് താരം കൊടുത്ത മറുപടി ഇങ്ങനെ.

എന്റെ കോളേജ് കാലം ഓസ്ട്രേലിയയിലായിരുന്നു. അവിടെ ലോകപ്രസിദ്ധമായ ഒരു സെല്ലുലര്‍ ജയില്‍ ഉണ്ട്. പോര്‍ട്ട് അര്‍തര്‍ എന്ന ആ സെല്ലുലര്‍ ജയില്‍ ഇപ്പോള്‍ ടൂറിസ്റ്റ് കേന്ദ്രമാണ്. പഠിക്കുന്ന കാലത്ത് ഞാന്‍ അവിടെ പോയിട്ടുണ്ട്. അവിടെ കയറുമ്പോള്‍, റിസപ്ഷനില്‍ തന്നെ വലിയൊരു ചുമരില്‍ നൂറില്‍ പരം ആളുകള്‍, അവിടെ വച്ച് ഫോട്ടോ എടുക്കുമ്പോള്‍ അനുഭവപ്പെട്ട സൂപ്പര്‍ നാച്വറല്‍ പവറിന്റെ സാന്നിധ്യം ഒട്ടിച്ചു വച്ചത് കാണാം.

ഉള്ളിലേക്ക് കടന്നാല്‍, മാസങ്ങളോളം ആളുകളെ പിടിച്ച് ഒറ്റയ്ക്ക് അടച്ചിട്ട ചില ജയില്‍ അറകളുണ്ട്. അവിടെ എത്തുമ്പോള്‍ നമുക്കൊരു ഊര്‍ജ്ജം അനുഭവിക്കാന്‍ കഴിയും. ഒരുപാട് ആളുകളുടെ മാനസികവും ശാരീരകവുമായ വേദനകള്‍ ഏറ്റുവാങ്ങിയ ചുമരുകളാണ് ഇതെന്ന് ഉള്‍ക്കൊള്ളുമ്പോള്‍ അവിടെ നമുക്ക് പ്രത്യേകം ഒരു ഊര്‍ജ്ജം അനുഭവപ്പെടും. അതല്ലാതെ വണ്ടിയില്‍ പോവുമ്പോള്‍ വെള്ള സാരിയുടുത്ത രൂപം കണ്ട് ബ്രേക്ക് ഇട്ട് നിര്‍ത്തിയ അനുഭവം എനിക്ക് ഉണ്ടായിട്ടില്ല പൃഥ്വിരാജ് പറയുന്നു.