ചാടി കയറി നൃത്തം ചെയ്യുന്നതിനിടെയായിരുന്നു അപകടം; അജിത്ത് ചിത്രം തുനിവയുടെ ആഘോഷത്തിനിടെ ആരാധകന്‍ മരണപ്പെട്ടു

അജിത്ത് മഞ്ജു ചിത്രം ഇന്ന് റിലീസ് ചെയ്തു. ആദ്യ ദിവസം തന്നെ നല്ല പ്രതികരണം ചിത്രം നേടി. സിനിമയുടെ റിലീസ് ദിനത്തില്‍ തന്നെ വലിയ ആഘോഷപരിപാടിയാണ് നടന്നത്. ഇപ്പോഴിതാ ഇതിനിടെ സങ്കടകരമായ വാര്‍ത്തയും പുറത്തുവന്നിരിക്കുകയാണ്.

സിനിമയുടെ റിലീസ് ദിനത്തില്‍ നടന്ന ആഘോഷത്തിനിടയില്‍ അജിത്ത് ആരാധകന്‍ മരണപ്പെട്ടു എന്ന വാര്‍ത്തയാണ് പുറത്തുവന്നത്. ചെന്നൈയിലെ രോഹിണി തീയറ്ററിലെ ആഘോഷത്തിനിടെ ലോറിയില്‍ നിന്ന് വീണാണ് മരണം സംഭവിച്ചത്. ഭരത് കുമാര്‍ എന്ന ആരാധകനാണ് മരണപ്പെട്ടത് എന്നാണ് പൊലീസിനെ ഉദ്ധരിച്ച് എഎന്‍ഐ റിപ്പോര്‍ട്ട് ചെയ്യുന്നത്.

രാവിലെ നടന്ന ഷോയ്ക്ക് ശേഷം ചെന്നൈയിലെ രോഹിണി തിയേറ്ററിന് മുന്നില്‍ വലിയ ആഘോഷത്തിലായിരുന്ന അജിത്ത് ആരാധകര്‍. അതേ സമയം തീയറ്ററിന് മുന്നിലെ പൂനമല്ലി ഹൈവേയിലൂടെ സഞ്ചരിക്കുകയായിരുന്ന ലോറിയിലേക്ക് അജിത്ത് ആരാധകര്‍ ചാടി കയറി നൃത്തം തുടങ്ങി. ഈ സമയം നിയന്ത്രണം വിട്ട് നിലത്തേക്ക് വീണാണ് ഭരത് കുമാറിന് അത്യാഹിതം സംഭവിച്ചത് എന്നാണ് റിപ്പോര്‍ട്ട്.

അതേ സമയം രോഹിണി തീയറ്റിന് മുന്നില്‍ അതിരാവിലെ വിജയ് അജിത്ത് ആരാധകര്‍ ഏറ്റുമുട്ടിയെന്നും വിവരമുണ്ട്. ഇരുവിഭാഗവും സ്ഥാപിച്ച ഫ്‌ലെക്‌സ് ബോര്‍ഡുകള്‍ അടക്കം നശിപ്പിച്ചു. അജിത്തിന്റെയും വിജയിയുടെ ചിത്രങ്ങള്‍ കാണാന്‍ അതിരാവിലെ ഫാന്‍സ് ഷോയ്ക്ക് എത്തിയ ആരാധകരാണ് ഏറ്റുമുട്ടിയത് എന്നാണ് വിവരം.

അതേസമയം ഇന്ന് തീയ്യേറ്ററില്‍ എത്തിയ ചിത്രത്തിന് മികച്ച പ്രതികരണം ആണ് ലഭിക്കുന്നത്. ബാങ്ക് മോഷണം പ്രമേയകമാക്കി ഒരുങ്ങിയ ചിത്രത്തില്‍ അജിത്തിനൊപ്പം തന്നെ തുല്യ വേഷത്തില്‍ മഞ്ജു വാര്യരും അഭിനയിക്കുന്നു. ആക്ഷന്‍ രംഗങ്ങളില്‍ അതിഗംഭീര പ്രകടനമാണ് മഞ്ജുവിന്റേതെന്ന് പ്രേക്ഷകര്‍ അഭിപ്രായപ്പെടുന്നത്.