മോനെ നീ പോയതിന്റെ വേദനയുടെ ആഴത്തില്‍ നിന്നും ഇതുവരെ മോചിതരാവാന്‍ സാധിച്ചിട്ടില്ല; നന്ദു മഹാദേവിന്റെ പിറന്നാള്‍ ദിനത്തില്‍ സീമ പറയുന്നു

മെയ് 15ന് ആയിരുന്നു ക്യാന്‍സര്‍ ബാധിച്ച് ചികിത്സയിലായിരുന്ന നന്ദു മഹാദേവ് മരിച്ചത്. അതിജീവനം എന്ന കൂട്ടായ്മയുടെ മുഖ്യ സംഘാടകനായിരുന്നു നന്ദു. സോഷ്യല്‍ മീഡിയയില്‍ സജീവമായ നന്ദു തന്റെ പോരാട്ടത്തെക്കുറിച്ച് പലപ്പോഴും തുറന്നു പറഞ്ഞിരുന്നു. തന്റെ ഉള്ളിലെ ക്യാന്‍സറിനെ ഭയക്കാതെ എന്നും ഒരു പുഞ്ചിരിയോടെ ആയിരുന്നു നന്ദു നേരിട്ടത് . മറ്റുള്ളവര്‍ക്ക് ധൈര്യം പകര്‍ന്നു കൊടുക്കുന്നതിനൊപ്പം തന്നെ തന്റെ മനസ്സിനെ പിടിച്ചുനിര്‍ത്താനും നന്ദുവിന് കഴിഞ്ഞു. രോഗം ശരീരത്തിന്റെ പലഭാഗങ്ങളിലായി പടര്‍ന്നുപിടിച്ചപ്പോള്‍ ഇതിനു മുന്നില്‍ തോറ്റു കൊടുക്കാതെ പോരാടുകയായിരുന്നു ഈ ചെറുപ്പക്കാരന്‍. 

ഒടുവില്‍ രോഗം മൂര്‍ച്ഛിച്ചതോടെ രക്ഷപ്പെടാനുള്ള സാധ്യത കുറവാണെന്ന് ഡോക്ടര്‍മാര്‍ തുറന്നു പറയുകയായിരുന്നു. തനിക്ക് ഈ ഭൂമിയില്‍ കുറച്ചുദിവസമെ ആയുസ്സുള്ള എന്ന് മനസ്സിലാക്കിയ നന്ദു തന്റെ ആഗ്രഹങ്ങള്‍ ഓരോന്ന് നിറവേറ്റാന്‍ തുടങ്ങി പിന്നീട്. വലിയ പിന്തുണ തന്നെയായിരുന്നു നന്ദുവിന് ലഭിച്ചത്. സിനിമ സീരിയല്‍ നടി സീമ ജി നായര്‍ നന്ദുവിന് താങ്ങായും തണലായും കൂടെ തന്നെ ഉണ്ടായിരുന്നു. ഇന്ന് നന്ദുവിന്റെ ജന്മദിനമാണ്. നന്ദുവിനെ കുറിച്ചുള്ള ഓര്‍മ്മകള്‍ പങ്കുവച്ച് എത്തിയിരിക്കുകയാണ് സീമ .

ഇന്ന് സെപ്റ്റംബർ 4.. ഞങ്ങളുടെ പ്രിയ നന്ദുട്ടന്റെ ജന്മദിനം.. അവൻ പോയിട്ട് 4 മാസങ്ങൾ ആവുന്നു.. നീ പോയതിനു ശേഷമുള്ള ആദ്യത്തെ പിറന്നാൾ ദിനം.. അറിയാത്ത ഏതോ ലോകത്തിരുന്ന് (അല്ല,ഈശ്വരന്റെ തൊട്ടടുത്തിരുന്നു) പിറന്നാൾ ആഘോഷത്തിന്റെ തയ്യാറെടുപ്പുകൾ നടത്തുന്നുണ്ടാവും.. മോനെ നീ പോയതിന്റെ വേദനയുടെ ആഴത്തിൽ നിന്നും ഇതുവരെ മോചിതരാവാൻ സാധിച്ചിട്ടില്ല.. എത്ര വേദനകൾ സഹിക്കുമ്പോളും വേദനയാൽ നിന്റെ ശരീരം വലിഞ്ഞു മുറുകുമ്പോളും നിന്റെ പുഞ്ചിരിക്കുന്ന മുഖമേ ഞങ്ങൾ കണ്ടിട്ടുള്ളു.. നിന്നെ സ്നേഹിച്ചവർക്കെല്ലാം വേദനകൾ സമ്മാനിച്ച് വേദനയില്ലാത്ത ലോകത്തേക്ക് നീ പറന്നകന്നപ്പോൾ ഞങ്ങൾ വേദനകൊണ്ട് തളരുകയായിരുന്നു.. പലപ്പോളും പിടിച്ചു നിൽക്കുന്നത് നിന്റെ ചില വാക്കുകളുടെ കരുത്തു കൊണ്ടാണ്.. ഒരു നിമിഷമെങ്കിൽ ഒരു നിമിഷം പുകയരുത് ജ്വലിക്കണം.. എന്റെ പ്രിയപ്പെട്ട മോന് യശോദമ്മയുടെ ഹൃദയം നിറഞ്ഞ പിറന്നാൾ ആശംസകൾ..

അതേസമയം ഈ അടുത്തായിരുന്നു നടി ശരണ്യ ക്യാന്‍സര്‍ ബാധിച്ച് മരിച്ചത് . സീരിയല്‍ രംഗത്ത് സജീവമായി നില്‍ക്കുന്ന സമയത്തായിരുന്നു ശരണ്യക്ക് ക്യാന്‍സര്‍ പിടിപെടുന്നത്. പിന്നീട് കുറച്ചുകാലം അഭിനയത്തില്‍ നിന്ന് മാറി നിന്ന ശരണ്യ വീണ്ടും സീരിയലിലേക്ക് തന്നെ തിരിച്ചു വന്നിരുന്നു. 12 ശസ്ത്രക്രിയ ശരണ്യയുടെ ശരീരത്തില്‍ നടത്തേണ്ടിവന്നു. എന്നാല്‍ അവസാനഘട്ടം കോവിഡും കൂടെ പിടി പെട്ടതോടെ ശരണ്യയുടെ ആരോഗ്യസ്ഥിതി വഷളാവുകയായിരുന്നു , പിന്നീടാണ് മരണം സ്ഥിരീകരിച്ചത് .