‘ ഈ പുഞ്ചിരിയുടെ വഴി പിടിച്ചാൽ നിങ്ങൾക്ക് അത് അറിയാൻ സാധിക്കും.’ നഞ്ചിയമ്മയ്ക്ക് എതിരെ ഉയർന്ന വിമർശനങ്ങൾക്ക് മറുപടിയുമായി ബിജിബാൽ. ഈ പറഞ്ഞത് സത്യം എന്ന് പ്രേക്ഷകരും.

ദേശീയ ചലച്ചിത്ര പുരസ്കാരം ലഭിച്ചതിന് പിന്നാലെ നഞ്ചിയമ്മയ്ക്ക് എതിരെ പല ഭാഗങ്ങളിൽ നിന്നും വിമർശനം ഉയർന്നിരുന്നു. ഇത്തരത്തിൽ പുരസ്കാരം വിതരണം ചെയ്തത് കഠിനാധ്വാനം ചെയ്യുന്ന പാട്ടുകാർക്ക് തീർത്തും തെറ്റായ പ്രചോദനം നൽകും എന്നാണ് ലിനൂലാൽ എന്ന വ്യക്തി പറഞ്ഞത്. ഈ വിമർശനത്തിന് പിന്നാലെ നിരവധി പേർ സംഭവത്തിൽ പ്രതികരണമായി രംഗത്ത് എത്തുകയും ചെയ്തു. ഒരുമാസം സമയം കൊടുത്താൽ പോലും സാധാരണ ഒരു ഗാനം അവർക്ക് പാടാൻ കഴിയില്ല എന്ന് ലിനുലാൽ പറഞ്ഞിരുന്നു. ലിനുലാൽ പങ്കുവെച്ച കുറിപ്പ് ഇങ്ങനെ.

ഇന്ത്യയിലെ കഴിഞ്ഞ വർഷത്തെ ഏറ്റവും നല്ല പാട്ടായിരുന്നോ അയ്യപ്പനും കോശിയിലെ നഞ്ചിയമ്മ പാടിയ പാട്ട്, അല്ലെങ്കില്‍ ഏറ്റവും നന്നായി പാടിയ പാട്ടായിരുന്നോ അത്? എനിക്കതില്‍ സംശയമുണ്ട്. നഞ്ചമ്മയോട് എനിക്ക് യാതൊരു വിരോധവുമില്ല. ആ അമ്മയെ എനിക്ക് വളരെ അധികം ഇഷ്ടമാണ്. ആ ഫോക് സോം​ഗ് നല്ല രസമായി പാടിയിട്ടുണ്ട്. ഞങ്ങളുള്ള ഒന്നു രണ്ടു വേദിയില്‍ ഈ അമ്മ വന്നിട്ടുണ്ട്. പിച്ച് ഇട്ടു കൊടുത്താല്‍ അതിനു അനുസരിച്ച് പാടാനൊന്നും സാധിക്കില്ല. അങ്ങനെയുള്ള ഒരാള്‍ക്കാണോ പുരസ്‌കാരം കൊടുക്കേണ്ടത്. മൂന്നും നാലും വയസുമുതല്‍ സംഗീതം അഭ്യസിച്ച് അവരുടെ ജീവിതം സംഗീതത്തിനു വേണ്ടി മാത്രം ഉഴിഞ്ഞുവെച്ച ഒരുപാട് പേരുണ്ട്. അതിൽ പ്രശസ്തരുമുണ്ട്, അല്ലാത്തവരുമുണ്ട്. അവര്‍ തണുത്തതും എരിവുള്ളതും കഴിക്കില്ല, തണുപ്പുള്ള സ്ഥലത്തു പോകില്ല അങ്ങനെയുള്ളവര്‍. പട്ടിണി കിടന്നാലും സംഗീതം എന്നത് അല്ലാതെ മറ്റൊന്നുമില്ലെന്ന് ചിന്തിക്കുന്നവര്‍. അവർക്ക് അത് ബിസിനസല്ല. അങ്ങനെ ഒരുപാട് ആളുകളുണ്ട്. അങ്ങനെയുള്ള ഒരുപാട് പേരുള്ളപ്പോള്‍ നഞ്ചിയമ്മ പാടിയ ഈ പാട്ടിന് മികച്ച ഗായികയ്ക്കുള്ള നാഷണല്‍ അവാര്‍ഡ് കൊടുക്കുക എന്നു പറഞ്ഞാല്‍.

ഒരു പുതിയ ഗാനമൊരുക്കിയ ശേഷം നഞ്ചിയമ്മയെ വിളിച്ച് സ്റ്റുഡിയോയിൽ കൊണ്ടുപോയി പാടിപ്പിക്കാൻ സാധിക്കുമെന്ന് എനിക്ക് തോന്നുന്നില്ല. ഒരു മാസം സമയം കൊടുത്താൽ പോലും നഞ്ചിയമ്മയ്ക്ക് സാധാരണ പാട്ട് പാടാൻ പറ്റുമെന്ന് എനിക്ക് തോന്നുന്നില്ല. ദാസ് സാറൊക്കെ എട്ടും പാത്തും പാട്ടൊക്കെ ലൈവ് ആയി പാടിയത് നമ്മൾ കേട്ടിട്ടുണ്ട്. ചിത്ര ചേച്ചി, മധു ചേട്ടൻ അങ്ങനെ ഒരുപാട് മികച്ച ഗായകരുണ്ട്. അവർക്ക് ഇത് ഒരു അപമാനമായി ആയി തോന്നില്ലേ. അയ്യപ്പനും കോശിയും സിനിമയിലെ ആ ഗാനം ആ അമ്മ നല്ല രസമായി പാടിയിട്ടുണ്ട്. അതുകൊണ്ടു ആ അമ്മയ്ക്ക് ഒരു സ്പെഷ്യല്‍ ജൂറി പുരസ്‌കാരം നല്‍കാമായിരുന്നു. മികച്ച ഗായികയ്ക്കുള്ളത് നല്ലൊരു ഗായികയ്ക്ക് തന്നെ കൊടുക്കാമായിരുന്നു എന്നാണ് എന്റെ അഭിപ്രായം. എന്നെ വിമര്‍ശിക്കാം. ഇതെന്റെ അഭിപ്രായം മാത്രമാണ്.

ഇപ്പോൾ ഇതിന് പ്രതികരണവുമായി എത്തിയിരിക്കുകയാണ് പ്രശസ്ത സംഗീത സംവിധായകൻ ബിജിബാൽ. ശുദ്ധിയുടെ തെളിനീര് ഉറവ അറിയണമെങ്കിൽ ഈ പുഞ്ചിരിയുടെ വഴി പിടിക്ക് എന്നാണ് ബിജിബാൽ കുറിച്ചത്. എന്താണ് സംഗീതത്തിലെ ശുദ്ധി എന്നും താരം ചോദ്യമുയർത്തുന്നു. എന്തായാലും നിരവധി ആളുകളാണ് ഇതിനെ പിന്തുണച്ചുകൊണ്ട് രംഗത്ത് എത്തുന്നത്. ആ പറഞ്ഞത് പൂർണ്ണമായും ശരിയാണ് എന്നാണ് പലരും അഭിപ്രായപ്പെടുന്നത്.