ആറു തൊഴിലാളികള്‍ ചേര്‍ന്ന് മൂന്നു ആഴ്ച സമയമെടുത്താണ് ഈ സാരി നെയ്‌തെടുക്കുന്നത്; വിവാഹ സാരിയെക്കുറിച്ച് മൃദുല

വിവാഹം ഉറപ്പിച്ചതോടെ സോഷ്യല്‍ മീഡിയയില്‍ സജീവമായിരിക്കുകയാണ് യുവയും മൃദുലയും. ഇവരുടെ വിവാഹ നിശ്ചയ ചിത്രം മുതല്‍ വിശേഷ ചിത്രങ്ങളെല്ലാം ആരാധകരുമായി പങ്കുവെയ്ക്കാറുണ്ട്. താരങ്ങളുടെ പ്രണയ വിവാഹം ആണെന്നായിരുന്നു ആദ്യം പരന്നത്. എന്നാല്‍ തങ്ങളുടെത് പക്കാ അറേഞ്ചഡ് മാര്യേജാണെന്ന് രണ്ടു പേരും തുറന്ന് പറഞ്ഞിരുന്നു.

വിവാഹ തീയ്യതി പ്രഖ്യാപിച്ചില്ലെങ്കിലും വിവാഹം ഉടനെ ഉണ്ടാവും എന്ന് നടി പറഞ്ഞിരുന്നു. നേരത്തെ യുവയും വിവാഹത്തെക്കുറിച്ച് പറഞ്ഞിരുന്നു. ഇപ്പോള്‍ വിവാഹത്തിന്റെ ഒരുക്കങ്ങള്‍ എല്ലാം തുടങ്ങി. ഇപ്പോള്‍ വിവാഹസാരി നെയ്യുന്ന ഒരു വീഡിയോയാണ് താരം പങ്കുവെച്ചിരിക്കുന്നത്. ബാലരാമപുരം കൈത്തറിയില്‍ ഒരുങ്ങുന്ന കസവു മംഗല്യപ്പുടവയാണ് താരം വിവാഹത്തിന് ഉടുക്കുന്നത്.

സാരി നെയ്‌തെടുക്കുന്ന വീഡിയോ നിമിഷന്നേരം കൊണ്ടാണ് വൈറലായത്. മൂന്നു ആഴ്ച സമയമെടുത്താണ് ഈ സാരി നെയ്‌തെടുക്കുന്നത്, ഇതിനായി ആറു തൊഴിലാളികളും ഉണ്ട്. വീഡിയോ വൈറല്‍ ആയതോടെ, വിവാഹപെണ്ണായി മൃദുലയെ കാണാന്‍ കൊതിയാവുന്നു എന്നാണ് ആരാധകര്‍ പറയുന്നത്.

‘എന്റെ ജീവിതത്തിലെ ആ മറക്കാനാകാത്ത ദിവസത്തിനായി ഇത്രയും പേരുടെ അധ്വാനവും പ്രവര്‍ത്തിയും ചേരുന്നു എന്ന് അറിയുന്നതില്‍ വലിയ അഭിമാനം തോനുന്നു,’ വീഡിയോ ഷെയര്‍ ചെയ്തുകൊണ്ട് മൃദുല എഴുതി. ഈ മനോഹര വേഷത്തില്‍ അണിഞ്ഞൊരുങ്ങി വരുന്ന നിന്നെ കാണുവാന്‍ കാത്തിരിക്കുകയാണ് ഞാന്‍ എന്നാണ് ബിഗ് ബോസ് താരവും മൃദുലയുടെ മുന്‍ സഹ താരവുമായിരുന്ന അലീന പടിക്കല്‍ കമന്റ് ചെയ്തിരിക്കുന്നത്.