മനുഷ്യബന്ധങ്ങളെ ആഴത്തില്‍ സ്പര്‍ശിക്കുന്ന എത്രയെത്ര കഥാപരിസരങ്ങളാണ് അദ്ദേഹം നമുക്ക് സമ്മാനിച്ചത്; മോഹന്‍ലാല്‍

കഴിഞ്ഞ ദിവസമായിരുന്നു തിരക്കഥാകൃത്ത് ജോണ്‍ പോള്‍ അന്തരിച്ചത്. നിരവധി ചിത്രങ്ങള്‍ക്ക് കഥ ഒരുക്കിയിട്ടുണ്ട് ഇദ്ദേഹം. മലയാള സിനിമാലോകത്തെ നിരവധിപേരാണ് അദ്ദേഹത്തിന് അനുശോചനകുറിപ്പുകൾ രേഖപ്പെടുത്തിക്കൊണ്ട് സോഷ്യൽമീഡിയയിൽ എത്തിയിരിക്കുന്നത്.

ഇപ്പോള്‍ നടൻ മോഹൻലാലും അദ്ദേഹവുമായുള്ള ഓര്‍മ്മകള്‍ അനുശോചന കുറിപ്പിൽ പരാമര്‍ശിച്ചിട്ടുണ്ട്.

‘പ്രിയപ്പെട്ട ജോൺപോളേട്ടൻ നമ്മളെ വിട്ടുപിരിഞ്ഞു. ഉൾക്കരുത്തുള്ള തിരക്കഥകളിലൂടെ മലയാളസിനിമയ്ക്ക് പുതിയ ഭാവുകത്വം പകർന്നുനൽകിയ അത്യപൂർവ പ്രതിഭാശാലിയായിരുന്ന അദ്ദേഹത്തിൻ്റെ നിരവധി കഥാപാത്രങ്ങൾക്ക് ജീവൻ നൽകാൻ സാധിച്ചത് മഹാഭാഗ്യമായി കരുതുന്നു. മനുഷ്യബന്ധങ്ങളെ ആഴത്തിൽ സ്പർശിക്കുന്ന എത്രയെത്ര കഥാപരിസരങ്ങളാണ് അദ്ദേഹം നമുക്ക് സമ്മാനിച്ചത്. സുന്ദരമായ പുഞ്ചിരിയിലൂടെ, അതിലും സുന്ദരമായ ഭാഷയിലൂടെ മലയാളികളുടെ ഹൃദയം കവർന്ന ആ വലിയ കഥാകാരന് കണ്ണീരിൽ കുതിർന്ന പ്രണാമം’, മോഹൻലാൽ

ഫേസ്ബുക്കിൽ കുറിച്ചിരിക്കുകയാണ്. നിരവധി പേരാണ് ഇതിന് താഴെ ഓര്‍മ്മകള്‍ പങ്കുവെച്ച് എത്തുന്നത്.

കാതോടു കാതോരം, യാത്ര, കാറ്റത്തെ കിളിക്കൂട്, ആലോലം, ഇണ, ഉണ്ണികളേ ഒരു കഥ പറയാം, ചമയം, ഒരു യാത്രാമൊഴി തുടങ്ങി നൂറോളം ചിത്രങ്ങൾക്ക് ജോൺ പോൾ തിരക്കഥ എഴുതിയിട്ടുണ്ട്. നിരവധി ചലച്ചിത്രഗ്രന്ഥങ്ങളുടെ രചയിതാവുകൂടിയാണ്. സംവിധായകൻ ഭരതനുവേണ്ടിയാണ് ജോൺ പോൾ ഏറ്റവുമധികം തിരക്കഥകൾ എഴുതിയത്. ഐ.വി.ശശി, മോഹൻ, ജോഷി, കെ.എസ്.സേതുമാധവൻ, പി.എൻ. മേനോൻ, കമൽ, സത്യൻ അന്തിക്കാട്, ഭരത് ഗോപി, ജേസി, കെ.മധു, പി.ജി.വിശ്വംഭരൻ, വിജി തമ്പി തുടങ്ങിയ സംവിധായകർക്കൊപ്പവും പ്രവർത്തിച്ചിട്ടുണ്ട്.