നരസിംഹത്തിൽ മമ്മൂട്ടി വന്നതുപോലെ വല്യേട്ടനിൽ മോഹൻലാൽ ഉണ്ട് എന്നൊരു വാർത്ത ആദ്യദിവസം പരന്നു, അങ്ങനെ ഫസ്റ്റ് ഡേ സിനിമയ്ക്ക് കയറിയവരുടെ മുന്നിലേക്ക്

മമ്മൂട്ടി നായകനായ എക്കാലത്തെയും വലിയ സൂപ്പർ ഹിറ്റ് ചിത്രങ്ങളിൽ ഒന്നാണ് വലിയേട്ടൻ. നരസിംഹം എന്ന സൂപ്പർഹിറ്റ് ചിത്രം ഒരുക്കിയതിനുശേഷം ഷാജി കൈലാസ് ആയിരുന്നു ചിത്രം സംവിധാനം ചെയ്തത്. നരസിംഹം എന്ന സിനിമയിൽ മമ്മൂട്ടി ഒരു പ്രധാന കഥാപാത്രത്തെ അവതരിപ്പിച്ചിരുന്നു. അതുപോലെ മോഹൻലാൽ വല്യേട്ടൻ എന്ന സിനിമയിൽ ഒരു അതിഥി വേഷത്തിലെത്തുന്നുണ്ട് എന്ന വാർത്ത പരന്നിരുന്നു. നിരവധി സിനിമ മാസികകളും ഈ വാർത്ത നൽകി. ഇപ്പോൾ ഈ സംഭവത്തെ കുറിച്ചുള്ള ഒരു കുറിപ്പ് ആണ് സമൂഹ മാധ്യമങ്ങളിൽ വൈറലായി മാറുന്നത്.

“നരസിംഹത്തിൽ മമ്മൂട്ടിയെ ഗസ്റ്റ് റോളിൽ കൊണ്ട് വന്നത് പോലൊരു സർപ്രൈസ് തിരിച്ചു വല്ല്യേട്ടനിൽ ഷാജി കൈലാസ് മോഹൻലാലിനെ കൊണ്ട് വരുന്നു എന്നൊരു വാർത്ത ഷൂട്ടിങ് ടൈമിൽ തന്നെ എങ്ങനെയോ ഉണ്ടായി. റിലീസ് ദിവസം പത്ര പരസ്യങ്ങളിൽ, ” ഈ സിനിമയിൽ മോഹൻലാൽ ഉണ്ടോ?” എന്നൊരു ക്യാപ്ഷൻ പോലും വെച്ച് സിനിമയുടെ അണിയറക്കാരും അത് വെച്ചൊരു പബ്ലിസിറ്റിയും ഇറക്കി.

സിനിമ തുടങ്ങി ആകാംക്ഷയിൽ മോഹൻലാൽ ഫാൻസും എന്തെങ്കിലും ആകട്ടെ എന്ന് ഇക്കാ ഫാൻസും വിചാരിച്ചു പടം കാണുന്നു. മുക്കാൽ ഭാഗം ആയപ്പോൾ സൈക്കിളിൽ ഒരാൾ ചെറുതായിട്ട് തോൾ ചെരിച്ചു വരുന്ന പുറകിൽ നിന്നൊരു ഷോട്ട്. മോഹൻലാൽ ഫാൻസ്‌ ഉറപ്പിച്ചു ഇത് അണ്ണൻ തന്നെ കയ്യടികളും ആർപ്പുവിളികളും ഉയർന്നു പക്ഷേ ക്യാമറ പതിയെ കറങ്ങി ഫ്രണ്ടിൽ വന്നപ്പോൾ ദേ നിൽക്കുന്നു കൊല്ലം അജിത്.

അങ്ങനെ ആള് മാറി ലാലേട്ടന് കിട്ടേട്ട കയ്യടി കൊല്ലം അജിത്തിന് കിട്ടിയ കഥ. വല്ല്യേട്ടൻ റിലീസ് ടൈമിൽ കേട്ടത് ഓർമ്മയുണ്ട്. മോഹൻലാലിന്റെ കയ്യിൽ നിന്ന് ഏറ്റവും കൂടുതൽ ഇടി വാങ്ങിയ നടൻ എന്ന് പേരുള്ള കൊല്ലം അജിത്തിന് ലാലേട്ടന് കിട്ടേണ്ട കയ്യടി മാറി കിട്ടിയതും ഒരു നിയോഗം ആകാം” – ഇതായിരുന്നു സമൂഹ മാധ്യമങ്ങളിൽ വന്ന കുറിപ്പ്. ഈ കുറിപ്പ് ഇപ്പോൾ സമൂഹമാധ്യമങ്ങളിൽ തരംഗമായി മാറുകയാണ്.