മഴക്കെടുതിയുമായി ബന്ധപ്പെട്ട അവധി നേരത്തേ പ്രഖ്യാപിക്കണം; കളക്ടര്‍ രേണു രാജിനെതിരെ റവന്യുമന്ത്രി

എറണാകുളം കളക്ടര്‍ രേണു രാജിനെതിരെ റവന്യുമന്ത്രി കെ. രാജന്‍. മഴ ശക്തമാകുന്നതിനിടെ സ്‌കൂളുകള്‍ക്ക് അവധി പ്രഖ്യാപിക്കാന്‍ രേണു രാജ് വൈകിയതാണ് വിമര്‍ശനത്തിന് കാരണം. മഴക്കെടുതിയുമായി ബന്ധപ്പെട്ടുള്ള അവധി പ്രഖ്യാപനങ്ങള്‍ നേരത്തേ വേണമെന്ന് റവന്യൂമന്ത്രി പറഞ്ഞു. സ്‌കൂളുകളില്‍ നേരത്തെ അവധി പ്രഖ്യാപിക്കുന്നതാണ് നല്ലത്. എറണാകുളത്ത് എന്താണ് സംഭവിച്ചതെന്ന് പരിശോധിക്കുന്നുമെന്നും മന്ത്രി വ്യക്തമാക്കി.

അവധി പ്രഖ്യാപിക്കാന്‍ വൈകിയ എറണാകുളം കളക്ടര്‍ രേണു രാജിന്റെ ഫേസ്ബുക്ക് പോസ്റ്റിന് താഴെ വിമര്‍ശനവുമായി രക്ഷിതാക്കള്‍ രംഗത്തുവന്നിരുന്നു. കളക്ടര്‍ക്ക് ഉത്തരവാദിത്വമില്ല, മഴ കാരണം കലക്ടര്‍ ഉറങ്ങിപ്പോയതാണ് എന്നൊക്കെയാണ് വരുന്ന ചില കമന്റുകള്‍. കുട്ടികളെ സ്‌കൂളുകളിലേക്ക് വിടുന്നതിന് മുമ്പ് എങ്കിലും കളക്ടര്‍ അവധി പ്രഖ്യാപിക്കാന്‍ ശ്രമിക്കണമെന്നും രക്ഷിതാക്കള്‍ കളക്ടറുടെ പോസ്റ്റിന് താഴെ കുറിച്ചു. ഫേസ്ബുക്ക് പോസ്റ്റിന് കടുത്ത വിമര്‍ശനം ഉയര്‍ന്നതോടെ വിശദീകരണവുമായി കളക്ടറും രംഗത്തെത്തിയിരുന്നു. രാത്രിയില്‍ ആരംഭിച്ച മഴ നിലക്കാതെ തുടര്‍ന്നതിനാലും അപകടങ്ങള്‍ ഒഴിവാക്കുന്നതിനുമാണ് അവധി പ്രഖ്യാപിച്ചതെന്നായിരുന്നു കളക്ടറുടെ വിശദീകരണം.

അതേസമയം, ശക്തമായ മഴയ്ക്ക് നേരിയ ശമനമുണ്ടെങ്കിലും സംസ്ഥാനത്ത് ഇന്നും മഴ തുടരുമെന്നാണ് പ്രവചനം. തിരുവനന്തപുരവും കൊല്ലവും ഒഴികെയുള്ള 12 ജില്ലകളില്‍ ഇന്ന് ഓറഞ്ച് അലര്‍ട്ട് പ്രഖ്യാപിച്ചിട്ടുണ്ട്. കനത്ത മഴയെ തുടര്‍ന്ന് കോട്ടയം, ആലപ്പുഴ, ഇടുക്കി, പത്തനംതിട്ട, തൃശൂര്‍ ജില്ലകളിലെ വിദ്യാഭ്യാസ സ്ഥാപനങ്ങള്‍ക്കും ഇന്ന് അവധി പ്രഖ്യാപിച്ചിരുന്നു.