ഈ സമയം അദ്ദേഹത്തിനുവേണ്ടി സംസാരിക്കാന്‍ ഞാന്‍ വേണ്ടതുണ്ട്; മേതില്‍ ദേവിക പറയുന്നു

നടന്‍ മുകേഷിന്റെ വിവാഹ മോചന വാര്‍ത്തയാണ് ഇപ്പോള്‍ സോഷ്യല്‍ മീഡിയയിലെ ചര്‍ച്ച. ഭാര്യ മേതില്‍ ദേവികയാണ് മുകേഷില്‍ നിന്നും വിവാഹ മോചനം ആവശ്യപ്പെട്ട് കുടുംബകോടതിയെ സമീപിച്ചത്. എന്നാല്‍ ഇതില്‍ ഇതുവരെ മുകേഷ് പ്രതികരണം അറിയിച്ചിട്ടില്ല. ഇതിനിടെ തികച്ചും വ്യക്തിപരമായ കാര്യം വളച്ചൊടിച്ച് പല തരത്തിലും വാര്‍ത്തകള്‍ പ്രചരിക്കുന്നുണ്ട്. ഇപ്പോള്‍ ഇതേക്കുറിച്ചാണ് മേതില്‍ ദേവിക പറയുന്നത്. പിരിയാനുള്ള കാരണം വീട്ടിലെ പ്രശ്‌നമാണെന്നും അത് കേരളവുമായി ബന്ധമില്ലെന്നും ദേവിക പറയുന്നു.

പിരിയാനുണ്ടായ കാരണങ്ങളെ കുറിച്ച് പറയുന്നതില്‍ ബുദ്ധിമുട്ടുണ്ട്. ഗാര്‍ഹിക പീഡനം എന്നത് ഞാന്‍ നല്‍കിയ ആരോപണത്തിലില്ല. മുകേഷേട്ടന്റെ നിലപാട് ഇപ്പോഴും വ്യക്തമല്ല, എന്റെ ഭാഗത്തുനിന്നാണ് ഇപ്പോള്‍ നോട്ടീസ് നല്‍കിയിരിക്കുന്നത്. ഞങ്ങള്‍ തമ്മില്‍ ദേഷ്യപ്പെട്ട് പിരിയേണ്ട കാര്യമൊന്നുമില്ല. ഞങ്ങള്‍ ഇടയ്ക്ക് സംസാരിക്കാറുണ്ട്. എല്ലാ ബന്ധങ്ങളും പ്രാധാന്യമുള്ളതാണ്. അദ്ദേഹത്തിന് മേലെ ചളി വാരിയിടാനൊന്നും എനിക്ക് താല്‍പര്യമില്ല.

നാല്‍പത് വര്‍ഷത്തിലേറെയായി അഭിനയരംഗത്തുള്ള, രാഷ്ട്രീയത്തിലുള്ള അദ്ദേഹത്തെ ഒരു തരത്തിലും അപമാനിക്കാന്‍ ആഗ്രഹിക്കുന്നില്ല. ഞങ്ങള്‍ സൗഹാര്‍ദ്ദപരമായി പിരിയാനാണ് ഇപ്പോള്‍ ശ്രമിക്കുന്നത്. പക്വതയുള്ള ആളുകളാണല്ലോ ഞങ്ങള്‍.

ഈ വേര്‍പിരിയല്‍ എനിക്കും അദ്ദേഹത്തിനും വേദനാജനകമാണ്, ഈ സമയം കടന്നുപോകാന്‍ ഏവരും അനുവദിക്കണം. ഇത് വീട്ടിലെ പ്രശ്‌നമാണ്, ഇത് കേരളവുമായി ബന്ധമുണ്ടെങ്കില്‍ പറയുമായിരുന്നു, ഇത് തികച്ചും വ്യക്തിപരമായിരുന്നു.

അദ്ദേഹം വില്ലനൊന്നുമല്ല, അങ്ങനെയാണ് ഇപ്പോള്‍ പലരും ചിത്രീകരിച്ചിരിക്കുന്നത്.  രാഷ്ട്രീയത്തിലേക്ക് വരുന്നതിനുള്ള തീരുമാനം അദ്ദേഹത്തിന്റേതായിരുന്നു. അതിനാല്‍ തന്നെ ഇപ്പോള്‍ വിവാഹമോചനം രാഷ്ട്രീയമായി ചിലര്‍ ഉപയോഗിക്കുമ്പോള്‍ അതിനെ നേരിടാന്‍ അദ്ദേഹം തയ്യാറായിരിക്കും എന്നാണ് എനിക്ക് തോന്നുന്നത്. അത്തരത്തിലൊന്നും ചെയ്യരുത് എന്നാണ് എനിക്ക് പറയാനുള്ളത്.

നിശ്ശബ്ദമായി സമാധാനപരമായി ഇത് പരിഹരിക്കണമെന്നായിരുന്നു ആഗ്രഹം. ഈ സമയം അദ്ദേഹത്തിനുവേണ്ടി സംസാരിക്കാന്‍ ഞാന്‍ വേണ്ടതുണ്ട്, മേതില്‍ ദേവിക പറഞ്ഞു.